Injilo No Saŋ 19 - Gúloku Díino

¹ Afúrumi na, Pilat ayéj ñammi básedeŋo anlah Yensa k’andooh ñanhonjo ammalam. Angu andék ankaan maŋ nim.

² Aŋŋayam bukaano iniman úmár umaasa ba buyeefihinem. K'angu andooh jakanku jálindo anyab akaan ininkaman bompenku umaasa. Bambollay, anhooburindem a bigofo. Angáágárám tabén takeen iniman ni ñammaasaŋo angáágáhne tabéno takeeno.

³ Bangáágárem tabéno támár, moŋon moŋon atéejaham k’ayeefihem ayéjehem: - Umaasahu Ñanyahudo, Díin akaan usimaya! Aŋŋoolinteh anlehlehinkem.

⁴ Afúrumi na, gúfenááro Pilat afúror k'alób ingi jamaŋo ayéjeeniŋ: - Inini, túyoreŋ k'ífunndutoonuŋ Yensa ki nim úfegeŋ maro me fégiri kayúulenkinem.

⁵ Angu, Yensa afúror ingi jakanku jálindo j’anhoobárindemne a bigofo ingi tabéno takeeno t’angááguremne. Bafúti na angu Pilat ayéj barumuno: - Iyoo! Angu údiigeeno umomiye!

⁶ Angu, ñanlaameku alimaamaŋo ingi ñammarahu Jaameŋo Adénno banfégem anlób kabaŋ k'anyéjeh: - Iyoo! Faaŋuntemeŋ a dinlihano! Faaŋuntemeŋ a dinlihano! F'anlóbne nim Pilat ayéjeeniŋ: - Ninkinan, faaŋuntemeŋ a dinlihano, kanda me mungu fégiri kayúulenkinem k’ólobhoŋne.

⁷ K'anyéjem: - Ingah! Ummu, ii, ayikyik luwahint n'ajégum. N'ayéjne úmár Úbáku Díino, úmár añantay aniiro.

⁸ Angu Pilat bayennehini hómár afaŋunum n’abenuh

⁹ k'afak aŋŋoolin aŋŋan a paleŋo ingi Yensa. Baŋŋani, amiihem ayéjem: - Inini, fi, údin beeraŋ? Fo Pilat amiihemne nim Yensa fankánam akota.

¹⁰ Pilat ayéjem: - Inini, fi, inini dujahárinem? Karo pájiiro maro me iyikyik sembe ba bupahálinken, me iyikyik sembe no bufaaŋunkan a dinlihano?

¹¹ F’alóbne nim Yensa ayéjem: - Ingah! Sembeŋo n’olahne ba bubujhum, maŋ Díino anéerenne. Kanda aji Díino nédoyer, duyiker sembeŋo nómár ba bubujhum. Angu gúmár gíyejenne maro wúuro m'adékiteemne a binankan, úmár afaŋumne n’ayik kayúuleno.

¹² Gúfenááro Pilat bayennehini hómár, aŋay bútibhu bufeere ba bupahunku Yensa. Kanda ñanlaameku Ñanyahudo immereŋ lókiireŋeŋ ki Yensa apahunaa. Anyéjem: - Ingah! Aji upahuni údiigeeno ummu, jamaŋo anfékineh mara fi búuñaaro umaasaŋo údenno Sesar. Ingah! Ugurumaareŋ úyejne «Me umaasa!» uguyhuneh m’ahacay ingi Sesar.

¹³ Nim ñanlaameku Ñanyahudo anyéjne Pilat. Angu Pilat bayennehini hómár, afak afúnnor Yensa a bílido. Angu bafúndurem a bílido mees, úmár Pilat adék anooh. A bunoohunku ukitumo ganoone. Agida bunoohumo búmár, aninkaanink a kantígo k'aretuhne «Pereŋo no Paafeŋo». «Gabata» ganyéjehne ingi gúlokinin guhebároŋo. Na Pilat anoone.

¹⁴ Agida waato ámár, anaman ni bísibaŋo abáári ki gucunkunom agune Gújunku Guwusunaamo. Angu na Pilat alóbne Ñanyahudo ayéjeeniŋ: - Ingah! Umaasahánan ummooŋe!

¹⁵ Fo Pilat alóbne nim jamaŋo ankomb balóbo kabaŋ anyéjeh: - Ingah! Abujaa! Faaŋuntemeŋ a dinlihano! Faaŋuntemeŋ a dinlihano! F'anlóbne nim, Pilat ayéjeeniŋ: - Hom! Ingah! Kanda ummu umaasahánan de! Inini, úsiibaáheŋsiib ki umaasahánan abujaa a dinlihano? F'alóbne nim, ñanlaameku alimaamaŋo anyéjem: - Ingah! Ummu guyroŋ umaasahint. Mint yikirimiŋ umaasa úduk, fo umaasaŋo údenno Sesar ba bareŋ. Ummu agune umaasahint.

¹⁶ F'anlóbne nim, Pilat abéndureeniŋ Yensa ki ñammi básedo andoohom andék ba bufaaŋunkánam a dinlihano. Afúrumi na, ñammi básedo andooh Yensa

K’anfaaŋunne Yensa a dinlihano

¹⁷ andoohálindem dinlihano. Bandoohálindem, andék anfúr a saariŋo. Banfúri a saariŋo, andékirem ba a kantígo k'aretuhne «Jahunku bigofo.» Ingi gúlokunin guhebároŋo «Golgota» ganyéjehne.

¹⁸ Bampút na a kantígo, andooh Yensa k'anfaaŋánam a dinlihano d'ankilenne. Bambollay, anwonnálin dinlihano. Anfak anfaaŋun na índiigeen inak, ummu a jiyakánam, ummu a jigondinkinem, Yensa a jégeneŋo.

¹⁹ Agida Pilat n'ayéjeeniŋ aññaañ tamaseer k'ankoten a dinlihano. Ayéjeeniŋ aññaañ na: «Yensa mu Nasaret, Umaasahu Ñanyahudo.» Angu ankaan maŋ nim k'andooh tamaseero k'ankoten na.

²⁰ Agida kantígo k'anfaaŋunne Yensa ŋantinayireŋeŋ ingi saariŋo. Angu gúmár akanne barumunku Ñanyahudo m'aŋŋane guwusunaŋo, ankoroskoros h'aññaañne a tamaseero. Agida, tamaseero nómár ingi guhebároŋo ingi gulateŋo ingi gugáreko gaññaañne.

²¹ Angu ñanlaameku alimaamaŋo banfégi n'aññaañne tamaseero, andék ba imbi Pilat. Bampút anyéjem: - Ingah! A tamaseero aññañaañ: «Yensa, umaasahu Ñanyahudo.» Nim gaññaañne na. Kanda ñantaaraŋaŋ aññaañer nim. Aññantañanta aññaañ na anyéj: «Údiigeeno ummu ayéjyej úmár agune umaasahu Ñanyahudo». Nim gaññantaherne aññaañ. Inini kuku úyejeeniŋ anfúnn tamaseero nómár k'aññaañ maŋ ni íyejominne, ankoten na.

²² Pilat bayennehini hómár jahárindeeniŋ k’aŋoyindeeniŋ ayéjeeniŋ: -Ingah! H'éyejeeniŋne aññaañ, aññañaañ mees.

²³ Angu ñammi básedo banfaaŋuni Yensa mees, andooh bayakánam b'anwuraŋamerne k’ankibay, moŋon moŋon adooh úngonduk, immereŋ ireneko. Angu afalla gusolo gúdenno. Kanda n’ayabumaane ingi simmoto ínsenduko f'adék adét

²⁴ anyéj: - Inini, ungu, dahi infacoonuŋ! Indoohoonuŋ ñolihano ki wúuro mu harjehinem agune na adooh. Angu ankaan maŋ nim. Angu f’ankanne nim, hómár apútulinne h’aññaañne fam a Hañaañeno. Aññañaañ anyéj: Ankibaykibay bayakum ki gusolhum gúdenno, gúmár gandoone ñolihano ki wúuro mu harjehinem agune na adooh. Maŋ ni aññaañne a Hañaañeno, maŋ nim ñammi básedo ankanne dam.

²⁵ F'anfaaŋunne Yensa a dinlihano, ayikyik indikaam m'andéker andék anwonn antéeja na. Immereŋ ingine nunku Yensa ingi asonku Yensa daŋat ingi Mariyama udikanku Kálopas ingi Mariyama ummu saariŋo n'aretuhne Magdala. Indikaamo immereŋ anwonnáne na dam.

²⁶ Agida ayikyik na utaalibeŋo mu Yensa aninkne a hafithinem. Angu Yensa bafégi utaalibeŋo m'aninkne a hafithinem n'awonnáne na a gúbidhu nunom, ayéj nunom: - Ingah! Lahar ummu ininkaman n’ulahne úbákán.

²⁷ Aŋoolin ayéj utaalibeŋo úmár: - Ingah! Lahar ummu ininkaman n'ulahne nunkon. Angu afúrumi a waato ámár, utaalibeŋo úmár adooh nunku Yensa akaanam nunom k’adoohom ba a díkinem.

Biniirohu Yensa

²⁸ Angu Yensa n'afeeremne maro dohohunom adédet ayéj: - Naham baaru k'iruuh! Kanda aji úfegi ayéji nim, ki nim apútulin Hañaañeno h’aññaañne fam a gubaarhu biniirohánom.

²⁹ Agida ayikyik na guno g’ayik bineegaro. Angu fo Yensa ayéjne: «Naham baaru k'iruuh,» údiigeen úduk m'awonnáne na adék adooh jalihanku tiwugo k’adooh kopoculenku eponso anum a bineegaro. Banumi a bineegaro, ajohund Yensa a buruhunom k'asoos.

³⁰ Yensa baruuhi mees ayéj: - Iyoo! H’eñantane ikaan nip ikankaan mees. Adédet! Balóbi nim mees ajíigun k'aniiro.

³¹ Angu Yensa, bísibahu arjumo ganiirone. Gucunkunom agune bísibaŋo bi guyohálaŋo. Agida n’agune Gújunku Guwusunaamo, bísibaŋo bi guyohálaŋo bímár, bísiba bíde. Angu ñanlaameku Ñanyahudo lókiireŋeŋ ki bísibaŋo bímár alahun agááráŋo a dinlihano. Gúmár akanne andék ammiih Pilat úgufenááro anyéjem: - Úgufánáár! Inini, ísiibáámiŋsiib ki soldaareŋo ammuñmuñin hádihenku índiigeeno m’anfaaŋunaane a dinlihano, ki nim anniiro waas. Nim ungu ganniirohi, ampiren anhájul agááráŋo k'andék ansutura. Hómár gísiibaminne. Angu Pilat alóki k’abúuñam ba imbi ñammi básedo m'aŋŋane gumarahu m'anfaaŋunaane a dinlihano.

³² Angu ñammi básedo banyennehini, andék ammuñmuñin hádiku úmánduk. Bammuñmuñini hámár anfaalen k’andék ba imbi úduko m'afaaŋunaane ingi Yensa, andék ammuñmuñin hananam mees.

³³ Angu f'andékne imbi Yensa, anlahunam n'aniiro, k'angu muñmuñindeŋeŋ hananam.

³⁴ Kanda usoldaaro úduko adooh kilibithinem k'acuk Yensa a gusaal. Bacukem, muheeno m'alahunne ingi baaruŋo afúror.

³⁵ Ingah! Wúuro m'aŋane búseediyahánan, ígihinem aféfeg hómár arenn. Arennunemrennun maro hómár ayikyik. Aji úfegeŋ n’añaañuroonuŋne inho nip, ki ninkinan mees upireneŋ k’údomoŋ maro hómár hoyiki.

³⁶ Agida, hómár apútulinne h’aññaañne fam a Hañaañeno. Aññañaañ na anyéj: Dammuñmuñin jahunkunom, haani úngonduk. Nim gaññaañne a Hañaañeno. Mara ñammi básedo muñmuñindeŋeŋ hádiku Yensa.

³⁷ Bíduko aññañaañ a Hañaañeno mees anyéj: Anninghineh wúuro m'ancukne.

Ka búgáku Yensa asuturahaane

³⁸ Angu, ayikyik údiigeen úduk m'aretuh Isuf. Isuf, úmár údin saariŋo n'aretuhne Arimate. Isuf atohtoh a dayrahu Yensa kanda bollendeŋ gureej maro abenuhbenuh ñanlaameku Ñanyahudo. Angu Yensa baniirohi mees, Isuf adék amiih Pilat ayéjem: - Hóge ipirenkineh idooh búgáku Yensa k’isutura a búyindo? Bamiihem nim, Pilat alóki. Angu Isuf adék adooh búgáku Yensa k’adék adooh ba gusuturaŋo a búyindo.

³⁹ Kanda ayikyik údiigeen úduk m’akááñinahinem dam. Gurethinem Nikodem. Agida Nikodem, úmár agune údiigeeno m'adék adékerne fam jaketo buwooño ingi Yensa. Angu, da Yensa aniirone, Nikodem apútor k’adoohor kárámánjo n'aññantane ankaan a búgááro. Kárámánjo nómár andoodooh h'ayéjuhne mááro ingi h'ayéjuhne alowe k'angatahin. Nikodem anaman nómáráŋ kiloŋ buruhur ingi haala gadoorne.

⁴⁰ Angu índiigeeno, immereŋ inako, andék anhájul búgáku Yensa a dinlihano. Banhájulem, andooh angubahinem a kasankeŋo ingi kárámánjo, ininkaman ni Ñanyahudo ankaanahne a cosankánin.

⁴¹ Agida ayikyik búkáár b'antéejay ingi kantígo k’anfaaŋunne Yensa a dinlihano. Agida búkááro búmár ayikyik ránkáb r’anjóonin ba gusuturahu agááráŋo. Kanda ránkábo rámár ni fanti bannink na bugáár.

⁴² Angu ni gucunkunom agune bísibaŋo bi guyohálaŋo n’angu n’atéejane, andooh búgáku Yensa andék annink na.