Injilo No Saŋ 18 - Gúloku Díino

K’anlahne Yensa

¹ Angu Yensa, bakiinay nim Díino mees, afúr na, úmár ingi ñantaalibehinem. Banfúrumi na, andék f'andék anlibila koraaŋo k'aretuhne Sedáron. Agida gúbido gúmár ayikyik búkáár. Angu, banlibilay koraaŋo k'aretuhne Sedáron, andék ba a búkááro búmár.

² Agida Judas, m'ajuliyane bigoku Yensa, kokayreŋeŋ ingi immereŋ, kanda apápájul búkááro búmár maro Yensa ingi ñantaalibehinem gara anfama na.

³ Angu fo Yensa ampútne na a búkááro ingi ñantaalibehinem, miñireŋ mees Judas apútor. Agida ñanlaameku alimaamaŋo ingi ñanfarasiyaŋo, immereŋ ambúuñne gusiirhu ñammi básedeŋo mi Rom ingi ñammarahu Jaameŋo Adénno ba na. Angu immereŋ nip ankokayer ingi Judas ba a búkááro. K'angu ampútor ingi jooraŋankinin no biñaamo ingi lampaŋo n’anwúnnumohne.

⁴ Angu Yensa n'apájulne h’adékehne buyikhinem, bafégeeniŋ adék arahálineeniŋ. Barahálineeniŋ ayéj: - Ninkinan, hantaŋ gútibheŋne?

⁵ Anyéjem: - Yensa mu Nasaret gítibehminne. Yensa ayéjeeniŋ: - Me ingine maŋ úmár. Agida Judas, m'ajuliyane bigoku Yensa, n'awonn maŋ na ingi ñammi básedeŋo ingi ñammarahu Jaameŋo Adénno.

⁶ Angu fo Yensa ayéjeeniŋne «Me ingine maŋ úmár,» Judas ingi m'ankokayrine ambááhála f’annen guyeereŋo.

⁷ Angu banneni guyeereŋo Yensa aŋoolin ayéjeeniŋ: - Úyejeŋ hantaŋ gútibheŋne? Aŋŋoyindem anyéjem: - Yensa mu Nasaret gítibehminne.

⁸ Yensa ayéjeeniŋ: - Íyejoonuŋyej me igune maŋ úmár. Aji Yensa gútibheŋne maŋ me ingine úmár. Inini bénteŋ ñantaalibehum k'andék.

⁹ Angu inho, hómár apútulinne ho Yensa alóbne fam. Yensa miñireŋ f’aŋane saliŋo ayéjyejer: «Bááhum, ikooñeeniŋkooñ immereŋ nip. Yikireŋ m’apahaam.» Nim Yensa ayéjerne.

¹⁰ Kanda Simon Piyer, bafégi maro ba bulaku Yensa gandékehne, afúnn busandihinem. Bafúnni busandihinem, adék awaliŋ údoolhu alimaamo adénno k'adék alek bulaahánam bu jiyaaho. Údoolo gurethinem Malkus.

¹¹ Fo Piyer akanne nim, Yensa ayéjem: - Ŋoyint busandiŋo a kábálo. Eke me iñantay iruuh a gulandáku kunyoho gu Bááhum ásiibane k’iruuh?

F’andékurne Yensa imbi Hann

^12-13 Yensa balóbi nim mees ñammi básedeŋo mi Rom ingi seefhinin ingi ñammarahu Jaameŋo Adénno anlaham k'annébem. Bannébem mees, annohum andékirem imbi údiigeeno m'aretuhne Hann. Hann, úmár aguyeriguy alimaamo adénno. Agida, díino nómár, alimaamo adénno gurethinem Kayif. Kanda imbi Hann gandékurne Yensa. Hann agune bááhu udikanku Kayif.

¹⁴ Agida, Kayif, miñireŋ f'adoyane ñanlaameku Ñanyahudo a gubaarhu Yensa. Ayéjeeniŋer: «Ingah! Jandiŋ siyhintor nip baniirom, akohne ki úmánduk aniiro.» Nim Kayif alóberne.

Ka Piyer añopne buguyhu utaalibehu Yensa

¹⁵ F'anlahne Yensa k'andékirem imbi Hann, Simon Piyer ingi utaalibe úduk antifilineeniŋ. Agida utaalibeŋo úmár ampájulaypájulay ingi alimaamo adénno. Angu a gubaarhu símpájulayhinin apiren aŋŋan ingi Yensa a buteereŋo búmár.

¹⁶ Piyer mungu, bapúti ŋandaŋ, awonn na a burukumbaano búdenno. Pirendeŋ k'aŋan maro alimaamo adénno pájiirom. Angu utaalibeŋo úduko m’ampájulayne ingi alimaamo adénno, adék alahun udikaamo m'amarahne burukumbaano. Balahunem, anwooñ ingi udikaamo. Banwooñi mees, aŋan Piyer.

¹⁷ Kanda baŋay guŋano, udikaamo ayéj Piyer: - Hóge fi guyro utaalibehu údiigeeno úmár? Angu udikaamo balóbi, babollay, Piyer añop ayéjem: - Wówo. Me guyri utaalibehinem. Nim Piyer añopemne.

¹⁸ Agida n'agillen, angu ñandóolo ingi ñammarahu Jaameŋo Adénno n'andooher jaŋañ k’anjakálin kuulo. Angu, Piyer bapútri mees adék awonn maŋ na k'aŋay bígetaŋo.

Ka alimaamo adénno amiihmiihinehne Yensa

¹⁹ Angu fo Yensa apútne imbi alimaamo adénno amiihmiihinkem a gubaarhu ñantaalibehinem ingi a gubaarhu h'akawandinehne.

²⁰ Yensa ayéjem: - Me, ii, káriman fam h'ekawandinehne jamaŋo giri isutura. Giwonnowonn a barumuno ki nim jamaŋo nip anyennehin h'ekawandinehne. Gídekedek a jaameŋeŋo ingi a Jaameŋo Adénno k'ikawandinkeeniŋ a barumuno. Ingah! Me suturahadi h’élobohne.

²¹ Inini, horaŋ akanne k'umiihmiihinkum ineeŋ? Inini, miiher jamaŋo m'anjantendukumne. Immereŋ ampájihineh hóbun h'ekawandinne.

²² Yensa balóbi nim umarahu Jaameŋo Adénno m’awonnáne na adék aleehem maŋ na k'ayéjem: - Ineeŋ gujaabiyehne alimaamo adénno?

²³ Yensa ayéjem: - Inini, aji h'élobne íyuulenyuulen, jellihint jamaŋo k'éyuulenne. Aji fana h'élobne yúulendi, maŋ marigeno gílobne, na mungu ímikuno h'oleehumeemne.

²⁴ Fo Yensa alóbne nim Hann ayéj ñammarahu Jaameŋo Adénno m'anlahahne Yensa: - Inini dékitemeŋ imbi alimaamo adénno Kayif. K'angu andékirem ba na, agida n'anébaa ingi ceeneŋo.

Ka Piyer añopne fo rankuluŋo ahooŋ

²⁵ Agida f'aŋŋane bumiihmiihinku Yensa, Piyer mungu úmár bim a kuulo bígetaŋo. Angu índukoŋo ammiihem anyéjem: - Fi mees, guyro utaalibehu údiigeeno úmár? Aŋoyindeeniŋ ayéjeeniŋ: - Wówo. Guyri utaalibehinem.

²⁶ Balóbi nim údool úduk mu alimaamo adénno alób. Agida úmár agune baarinku údiigeeno mu Piyer alekne bulaaŋo. Ayéj Piyer: - Hóge me fégurower beŋen a búkááro ingi úmár?

²⁷ Piyer afak añop. Bañopi, rankuluŋo ahooŋ.

Ka gúfánááro amiihmiihinne Yensa

²⁸ Afúrumi na, harennaamo, anfúnnor Yensa imbi Kayif k’andékirem a palehu gúfánááro. Ñanlaameku alimaamaŋo ankokay ba na, kanda bampút na, ñanlaameku alimaamaŋo m’ankokayne ŋandaŋaŋ na. Aji úfegeŋ ni ŋandaŋaŋne na, mara aji aŋŋanŋaner, danrenn imbi Díino. Te aji rennireŋeŋ imbi Díino dampirener k'anyaahála guyaahálahu Gújunku Guwusunaamo.

²⁹ Gúmár akanne buruhu k'aŋŋan, gúfánááro m'aretuhne Pilat, úmár afútne a bílido adék alahunteeniŋ na. Bafúti ayéjeeniŋ: - Ninkinan! Ingah! Údiigeeno ummu, horaŋ gakanne h’odooremeŋne?

³⁰ Balóbi nim anyéjem: - Ingah! Aji guyroŋer urifa digumb idoorhemmiŋ imbi.

³¹ Banlóbi nim Pilat aŋoyindeeniŋ ayéjeeniŋ: - Inini, doohoremeŋ k'úduk ukitihemeŋ ingi Luwaŋankánan. Fo Pilat alóbne nim Ñanyahudo aŋŋoyindem anyéjem: - Kanda ninkinan ñammi Rom, ninkinan ulaheŋne binaal ba bubujhu wúuro. Agida mint mungu yikirimiŋ binaalo bímár.

³² Angu, ni ñammi Rom andékehne ba bubujhu Yensa, hómár apútilinkinehne Yensa h’alóbne fam a gubaarhu n'aniirorunkunehne.

³³ Angu fo Ñanyahudo anyéjne maro immereŋ yikireŋeŋ binaal ba bubujhu wúur, Pilat aŋan a paleŋo k'ahuyor Yensa. Bahuyem amiihem ayéjem: - Yensa, inini hóge f’ugune Umaasahu Ñanyahudo?

³⁴ Ayéjem: - Hóge n'úlobne, karo a siwosenken gafúruntne, karo maŋ imbi jamaŋo guyennehintne?

³⁵ Balóbi nim, Pilat aŋoyindem ayéjem: - Ingah! Me Uyahud gireŋ! Ñammi didiirahan ingi ñanlaameku alimaamaŋo, immereŋ andékitenne a binaam. Angu inini, hójondoŋ horaŋ gukanne k’andooro a binaam?

³⁶ Fo Pilat alóbne nim, Yensa aŋoyindem ayéjem: - Ingah! Maasayahum mídeŋeŋ ingi maasayahu duniyaŋo inno. Aji ininkaman maasayahum ammímiir ingi no duniyaŋo inno, ñantifilinkum angumb aññaamayer ki nim dahi ñanlaameku Ñanyahudo anlahaam. Kanda ñaamáraŋaŋ maro maasayahum amburayburay ingi maasayahu duniyaŋo inno.

³⁷ Ayéjem: - Hom? Fi umaasa? Yensa ayéjem: - Fi úloboorane me umaasa. Ingah! Me ibosaabos ba honj ínhonduk. Aji úfegi ibosaa a duniyaŋo inno, ba búteekinkinan marigeno a gúbidhu Díino. Hómár gídekuntne. Moŋon moŋon agune a marigen gabentenebenten gúlokum.

³⁸ Angu fo Yensa alóbne nim Pilat ayéjem: - Marigeno! Horaŋ ingine marigeno? Pilat balóbi nim, afúror k’adék alahun ñanlaameku Ñanyahudo k'anwonnáne a bílido, ayéjeeniŋ: - Kanda ninkinan, me me fégiri kayúuleno ka ummu ayúulenne.

³⁹ Inini, inkaanoŋ cosankintor no Gújunku Guwusunaamo. Eke díin díin gíbendukoonuŋbendur úmánduk m'akimbenaa. Inini, karo úsiibaáheŋsiib k'íbendutoonuŋ umaasahánan?

⁴⁰ Fo Pilat alóbne nim ankomb bupeejo anyéjhem: - Wówo! Úmár gireŋ! Béndutulo mint Barabas! Agida Barabas, úmár urifa.