Injilo No Saŋ 16 - Gúloku Díino

¹ Yensa aŋoolin ayéj ñantaalibehinem: - Inini, ninkinan, horaŋ akanne k'íteekinoonuŋ hómáráŋ nip? Íteekinoonuŋteekin hómáráŋ nip ki nim biki úduk úbááhálahaŋ a binaam.

² Ingah! Andíigunkunoonuŋ guŋano a jaameŋeŋo. Waat inno bim n'adékireh ambujhunoonuŋ k'anlah karo na ambúuñabuuña Díino. Nim gandékehne ba buféginkinan.

³ Angu, aji úfegeŋ n’andékehne gúfeginkánan nim, immereŋ, ii, pájiireŋeŋ me, pájiireŋeŋ Bááhum Díino mees. Gúmár akanne andékeh ba guféginkinan.

^4-6 Íteekinoonuŋteekin gu bandór ki nim, da hómár ayikhinehne, dúbááhálahaŋ a binaam. Ulentálahánaŋ maro isaarahoonuŋsaara gu bandór. Jadaŋ búyej nim fam mara mintor ginkokayuhoŋne. Kanda inini me ba guŋoolin ba imbi m'abúuñureemne gídekehne. Gúmár akanne iŋay búteekinkinan inho manini. Kanda, ninkinan! Ikoroskoros mara bíyejoonuŋ, me ba guŋoolin ba imbi m'abúuñureemne, abemahoonuŋbema dáde. Kanda ninkinan, dumiihemuŋ b'ídekehne?

⁷ Ingah! Ídek, akohumoonuŋne. Marigeno gílobohne. Fégeŋ baŋ, iñantay ídek maro aji dékiri, m’ayéjuhne Úkááñinumo dapiren k’adéker ba a binanan. Kanda aji ídeki, íbuuñokunom ba a binanan. Gúmár akanne iñantay iliiŋun hadékum.

⁸ Inini, aji Úkááñinumo apútodir, inini gadékehne bukaano: Úmár ajellihinkineh jamaŋo maro wuturoŋoŋ h'agune hójondoŋo. Ajellihinkineeniŋ mara wuturoŋoŋ h'awúuhne. Ajellihinkineeniŋ mara Díino ba bukitinkinin gadékehne.

⁹ Afak ajellihinkineeniŋ mara anyikyik júnub mara fiyundum. Nim Úkááñinumo gadékehne bujellihinku jamaŋo.

¹⁰ Ingah! Jamaŋo anniimniim fereŋ maro pájiireŋeŋ h'awúuhne. Inini, me angu ba guŋoolin ba imbi Bááhum gídekehne ki dufak úfegemuŋ.

¹¹ Kanda jamaŋo anniimniim mara pájiireŋeŋ kunyoho ku Díino ayohenkineeniŋne. Agida Iblisa, uŋanhu jamaŋo a hójondoŋo akitihaakiti a sabaabhu dohohunom. Hómáráŋ nip, Úkááñinumo gadékehne ba bujellihinku jamaŋo. Yensa aŋoolin ayéj:

¹² - Ingah! Holabahi gifallunne búteekinkinan, kanda difant íteekinoonuŋ manini maro dúdek upireneŋ gudoohunahu hómáráŋ nip mara amenuhmenuh.

¹³ Kanda, Jamméejhu Díino, jámár gadékehne bujellihinku jamaŋo marigeno. Jámár agune Úkááñinumo m'ílobohne. Angu, jámár apútodir a binanan, akankunoonuŋ k’úpájáláŋ marigeno nómár nip. Datéekinoonuŋ h'afúruntne a siwosenkinem. Kanda atéekinkunoonuŋ h'afúruntne imbi Bááhum Díino. Afak atéekinkunoonuŋ mees a gubaarhu h'adékehne ba buyiko.

¹⁴ Jamméejhu Díino Jarenninno ajellihinkineh jamaŋo bafukum, maro agátundukunoonuŋ h'élobne.

¹⁵ Ingah! Ho Bááhum amune nip, hómár mees honaam. Gúmár gíyejoonuŋne maro Jamméejhu Díino Jarenninno agátundukunoonuŋ h'élobne.

Jihooŋo adék akúbulahne aguy ñankil

¹⁶ Yensa aŋoolin ayéj: - Ninkinan! Ingah! Damiñ dúfegemuŋ, afak amiñiladir hotir ufak úfekunumuŋ.

¹⁷ Fo Yensa alóbne nim ñantaalibehinem índukoŋo ankomb simmiihayo, anyéjeh: - Angu na, neeraŋ gasíibane búyejhintor? K'ayéjehne «Damiñ dúfegemuŋ, ki amiñiladir hotir ufak úfekunumuŋ.» Angu na, neeraŋ gasíibane búyejhintor? Ingi faka, k’ayéjne ba imbi Báábám gadékehne, na mees nuko, neeraŋ gasíibane balóbo?

¹⁸ Ñantaalibeŋo anfak ammiihora anyéjeh: - Angu k'ayéjne «damiñ», na mees, neeraŋ gasíibane búyejhintor? Eke mintoroŋ yikireŋ m’apájul h’asíibane balóbo?

¹⁹ Agida Yensa apápájul maro ansíibáásiib bumikinem a gubaarhu h’alóbne. Angu ayéjeeniŋ: - Ninkinan! Karo n'íyejne: «Damiñ ki dúfegemuŋ, ki amiñiladir hotir ufak úfekunumuŋ», karo na gumiihayheŋne?

²⁰ Janteneŋ baŋ k’íteekinoonuŋ marigeno! Ninkinan uhonkunumuŋ dáde, kanda ñammi duniyaŋo anséwohuneh. Ingah! Hadékhum aléerunkunoonuŋ dáde, kanda damiñ afak akúbulaháneh aguy ñankil ingi básuum.

²¹ Ingah! Udikaamo m'adékehne ba guŋano, gúduk gahooŋohooŋ maro waathu kunyokunom apútput. Kanda aŋandir afiiram kunyokunom. Aséwone dáde n’ayikne wolo.

²² Maŋ nim gadékehne ba buguyo a binanan, maro iŋaydir hadéko, abémahunoonuŋ dáde. Kanda ingah! Iŋoolinekineh ba búfekánan. D'éputokunehne a binanan, aséwohunoonuŋ dáde f’adék apút a hafitenkinan. Te wúur dapiren k’awatumoonuŋ a básuumo bámár.

²³ Oo! Janteneŋ baŋ k’íteekinoonuŋ marigeno! Inini, bísibaŋo bímár apútodir, duhaajahaŋ bumiku me me haman honj! Ningeŋ baŋ! Afúrumi dam, h’okiinahánaŋne Bááho nip a barakehum alókirukunoonuŋ.

²⁴ Ninkinan! Baman manini, kiinahadoŋ honj Bááho a barakehum. Kuku údekeŋ imbi Bááho a barakehum, nim akanduroonuŋ h’okiinahemeŋne. Aji ukiinaheŋ Bááho a barakehum, ajahuroonuŋdir úsewohunoŋ dáde.

²⁵ Ingah! Inho nip h’élobne, a gubaarhu funaareŋeŋo gílobunkoonuŋne, kanda waat inno bim n'adékireh dílob funaare. A waato nómár, iŋaydir balóbo gu Bááho, ílobhunoonuŋ arennumoonuŋ fet.

²⁶ Bísibaŋo bímár apútodir, ukiinahánaŋ Bááho a barakehum. Na yéjiri ukiinahamuŋ ki me ídek ikiinaroonuŋ imbi Bááho. Wówo! Nim gireŋ. Ninkinan ukiinahánaŋ Bááho a barakehum.

²⁷ Fégeŋ baŋ, Bááho fankánam apokunoonuŋpokun dáde. Aji úfegeŋ n'apokunoonuŋne dáde, maro ninkinan úbuuñahemuŋbuuña dáde. Ninkinan ufak údomoŋ mees maro me imbi Bááho gífuruntne. Gúmár akanne Bááho apokunoonuŋ fanfaŋ.

²⁸ Me, imbi Bááho gífuruntne k'ídeker a duniyaŋo. Kanda ífurhuneh bísiba bíduk a duniyaŋo k'iŋoolin ba imbi Bááhum.

²⁹ Yensa balóbi nim, ñantaalibehinem aŋŋoyindem anyéj: -Iyoo! Inini ukur úlob arenn ni lóburo funaare.

³⁰ Inini ípájulmiŋpájul maro fi úpápájul honjoroŋo nip. Haani ísiibamiŋ bumiken honj, fi gúpájulápájul ni fanti bimiihulmiŋ. Gúmár akanne ifiyummiŋ maro fi imbi Díino gúfuruntne.

³¹ Banyéji nim Yensa ayéjeeniŋ: - Hom! Ufiyumemuŋfiyum angu!

³² Fégeŋ baŋ, waat inno bim n'adékireh, ninkinan úgirhineŋ moŋon moŋon ba a gufachánam, k'úbennemuŋ na me bareŋ. Ingah! Waato nómár adasridas. Nim gúdekheŋne bukaano, kanda dupireneŋ k’úbennemuŋ na me bareŋ, maro Bááhum Díino ummo na a binaam.

³³ Inini, inho nip gíteekinoonuŋne ki nim uguyoŋ a básuum a hafitenkinan a gubaarhu me. Uyokunoŋ a duniyaŋo, kanda haman nim lahareŋ hafitenkinan, k'umuñahaŋ. Me ifaŋánafaŋána duniyaŋo.