Injilo No Saŋ 15 - Gúloku Díino

Funaareŋo a nintiku sinohu reseŋo

¹ Angu, Yensa afúnnfunn funaare ayéj ñantaalibehinem: - Ingah! Me ingine sinohu reseŋo si marigeno. Bááhum Díino, úmár agune m’amarahne búkááro.

² Inini, umarahu búkááro, aji afégi gukaan gu gara adímeh a sinokum, alekhineh gukaano gúmár. Nim gakankánehne, ki aji afégi gukaan g'adímeh, alaaŋunam k’afaŋunum n’areeb k'apiren adím dáde.

³ Inini ninkinan urenneŋrenn a sabaabhu kawandhum.

⁴ Kuku uguyoŋ ingi me, ki me iguy ingi ninkinan. Ingah! Gukaano g'alekaane dapiren k’adím, fo aguy a sinoŋo k'apiren adím. Gúmár gíyejoonuŋne, ninkinan mees kuku uguyoŋ ingi me kantíg inkanduk, ki nim upireneŋ k’údimeheŋ.

⁵ Ingah! Me igune sinoŋo ki ninkinan uguyeŋne hakankum. Inini, moŋon moŋon agune ingi me, me iguy ingi úmár, areebhineh k’adím jup. Kanda ninkinan, aji úfegeŋ n'íyejne nim, maro aji me gireŋ, dupireneŋ bukanku honj h'asúumunehne Díino. Gúmár gíyejoonuŋne uñantaheŋ uguyoŋ ingi me waatowaat.

⁶ Ugurumaareŋ guyroŋne ingi me, úmár adabunkunuh. Akankáneh iniman gukaan g'alekaa. Gukaano gúmár alekaadir, alaafháneh k'atotaa akaanaa jábinna k’añufaa.

⁷ Inini, aji uguyeŋ ingi me k'úbuuñahaŋ kawandhum, hoŋon hoŋon gukiinaheŋne Díino, uyikhineŋ a sabaabhum.

⁸ Angu, aji bídimirenkinan alabahi, jamaŋo anfékineh na bafuku Díino. Te bídimereno bímár ajellihinkineeniŋ maro ninkinan uguyeŋne ñantaalibehum.

⁹ Bááhum Díino apokuneempokun biriman cuk. Angu, maŋ ni Bááhum Díino apokuneemne, maŋ nim gipokunoonuŋne. Inini ninkinan kuku uguyoŋ na a simpokunayo símár ingi mint.

¹⁰ Ingah! Me íbuuñabuuña Bááhum Díino k’ikaan h’ayéjeemne. N’ikanne nim, iguy a simbabo ingi úmár k’ipokunaymiŋ. Ninkinan mees, aji úbuuñaheŋ kawandhum, uguyhunoŋ a simbabo símár ingi mint k’impokunayoŋ.

¹¹ Inini, aji úfegi n’íteekinoonuŋne inho nip, ki nim uyikeŋ básuum a hafitenkinan, maŋ ni me iyikne básuum a hafithum. Angu, íteekinoonuŋ inho ki nim básuumo b’oyikhineŋne a hafitenkinan aguy básuum báde.

¹² Horaŋ agune luwankum? Luwankum ingine upokunayeŋ iniman ni me ipokunoonuŋne.

¹³ Fégeŋ baŋ, wúuro m’adoohne ñankindenkinem a gubaarhu índinenkinem, yikireŋ bupok b'afak afaŋ búmár.

¹⁴ Inini, ninkinan, moŋon moŋon akanne h’éteekinemne, úmár uñankum.

¹⁵ Ingah! Difak ihuyoonuŋ ñansókum, maro ulaameku ñansóogo gara atéekineh ñansókunom h’adékehne bukaano. Angu, dihuyoonuŋ ñansóogo. Ihuyhunoonuŋ ñaññankum, maro ho Bááhum Díino atéekineemne, hómár nip gíteekinoonuŋne, ki nim upireneŋ k’utohoŋ na.

¹⁶ Ninkinan, karo ulaheŋlah karo ninkinan ucaabenemuŋne k’uguyoŋ ñantaalibehum? Hey! Ninkinan caabendumuŋ deh! Me icaabenoonuŋne k’uguyoŋ ñantaalibehum. Bicaabenoonuŋ mees, íneeroonuŋ badooh. Badooŋo bámár agune k’úduk údimeŋ dáde. Hómár ingine úduk údimeŋ bídimereno bi dakoomahar. Aji ukaaneŋ nim, Díino anékunoonuŋ hogurumaareŋ h’okiinaheŋne a barakehum.

¹⁷ Inho giyikne ba búteekinkinan: Ninkinan uñantaheŋ upokunayeŋ. Hómár giyikne búteekinkinan. Yensa abocin ayéjeeniŋ:

Ni jamanku duniyaŋo anfoyhunehne Yensa ingi m’anfiyumemne

¹⁸ Ingah! Ñammi duniyaŋo anfoyhunoonuŋ deh! Kanda úfegeŋdir n'anfoyoonuŋne, kuku ulentálahaŋ maro me gannohumerne anfoy.

¹⁹ Aji ininkaman utoheŋtoh ingi immereŋ jamanku duniyaŋo, angu angumb ampokunkoonuŋer. Kanda ninkinan tohároŋ na ingi immereŋ, maro me ífunnoonuŋfunn a binanin k'ídekuroonuŋ a binaam. Gúmár akanne anfoyoonuŋ.

²⁰ Inini, kuku ulentahaŋ h'éteekinoonuŋne. Eke íyejoonuŋyej: «Yikireŋ údool m'afankunehne ulaamekinem?» Nim gíyejoonuŋne. Angu, gúmár gíyejoonuŋne, n'anféguneemne, afeero mara andak anfégunkunoonuŋ, ninkinan mees. Kanda índukoŋo imme na m’ambúuñahne kawandhum. Maŋ nim gadékehne ba buguyo a binanan mees. Índukoŋo ambúuñahánehne kawandhánan. Índukoŋo mungu dambúuña kawandhánan.

²¹ Aji úfegeŋ n’andékehne búfegunkánan, maro n'utoheŋne ingi me. Fégeŋ baŋ, immereŋ pájiireŋeŋ wúuro m'abúuñureemne.

²² Aji ininkaman dékiririyer ki yennehinahadaŋaŋ kawandhumer, na danyik jínub. Kanda inini ikawandineeniŋkawandin mees. Anjantenjanten h'élobne kanda dómuroŋoŋ. Gúmár gíyejhoonuŋne, inini imbi immereŋ, kamaanen gireŋ na. Yensa abocin ayéj:

²³ - Ingah! Wúuro m'afoyeemne, afoyfoy Bááhum Díino mees.

²⁴ Ingah! Me ikankaan imbi immereŋ tamaseereŋo no índukoŋo kaanahadaŋaŋne. Aji ininkaman fégireŋeŋer tamaseereŋo n’ekanne, dangumb anyiker júnub. Kanda immereŋ anféfeg h’ekanne nip, kanda haman maŋ nim anfoyfoy Bááhum ingi me mees.

²⁵ Agida n'anfoyeemne, hómár apútulinne h'aññaañne a Hañaañeno. Aññaañaañ na anyéj a gubaarhu Umaasaŋo mu Díino Acaabenne: Me, anfoyeemfoy ni kandideeniŋ honj. Nim gaññaañne. Agida hómár añantay apútulinaa. Yensa abocin ayéjeeniŋ:

²⁶ Kanda Úkááñinumo m’íloboherne falino, úmár afúrumokuneh imbi Bááhum Díino k'adéker aguy ingi ninkinan moŋon moŋon. Úmár ingine Jamméejhu Díino Jarenninno j'ajellihinumehne jamaŋo marigeno a gúbidhu Díino. Angu me ii, iguydir imbi Bááho, íbuuñokunom ba a binanan. Apútodir a binanan, aséediyaháneh gu me.

²⁷ Ninkinan mees ba gúseediya a gubaarhu me gúdekheŋne. Agida, ninkinan káriman kankirumo f'etooŋne kawando, ingi me gukokayeŋne. Ninkinan úfegeŋfeg h’ekanne nip. N'úfegeŋne nip, gúmár gíyejoonuŋne, ninkinan ba gúseediya a gubaarhu me gúdekheŋne.