Injilo No Saŋ 13 - Gúloku Díino

Ka Yensa ayicne hádiku ñantaalibehinem

¹ Afúrumi na, banyéji Gújunku Guwusunaamo gucum, Yensa anguy na Jerusalem ingi ñantaalibehinem. Agida Yensa apápájul maro waathánam adasdas n’afúrhunehne a duniyaŋo inno k'aŋoolin imbi Báábám Díino. Inini Yensa, káriman fam gapokunne jamaŋo m’anfiyumemne, kanda dam gaŋane bujellihinkinin maro bupoko búmár yikireŋ k’amuk.

² Angu dam, Yensa aŋŋay na guyaahálahu dibugaanigo ingi ñantaalibehinem. Utaalibeŋo m'aretuhne Judas, úbáku Simon Iskariyot, úmár na. Agida Iblisa n'ajodom mees k’ayéjem adék ajuliya bigoku Yensa.

³ Angu, Yensa mungu apápájul maro Báábám Díino anéneer úmár Yensa sembeŋo nip a halakánam. Apápájul maro a binaanam gafúruntne te aŋoolinkineh ba a binaanam.

⁴ Angu Yensa n'apájulne hómár akeng a guboolo. Bakengi, awuraŋ gusolhunom k'agéena sarbeto. Maŋ ni ñansóogo angéenahne sarbeto, maŋ nim gagéenane.

⁵ Bagéenay sarbeto mees, adooh guboolo k’awakul na baaruŋo. Bawakuli na baaruŋo, akomb buyichu hádiku ñantaalibehinem. Moŋon moŋon gayici hádikinem, amunkulum ingi sarbeto n’agéenane.

⁶ Nim gakanne f'adék apút imbi Simon Piyer. Bapút imbi Simon Piyer, Simon Piyer ayéjem: - Fi Umuyhum, hóge ba buyichu hádikum gúsiibane?

⁷ Ayéjem: - Inini, pájiiro h’akanne iŋay bukaano ineeŋ, kanda waat adúk inno bim n’adékireh úpájihineh h’akanne ikaani nim.

⁸ Piyer ayéjem: - Wówo! Díbenno fereŋ k’uyic hádikum! K'ayéjem: - Ingah! Aji ufoyi k’iyiciro hádiken, dutoh imbi me.

⁹ Bayéji nim Simon Piyer ayéjem: - Angu Umuyhum, aji nim, dahu uyic hádikum bareŋ! Yicer halakum ingi bigokum mees!

¹⁰ Yensa ayéjem: - Ingah! Wúuro m'afúruntne biyicaŋo arennrenn fet. Hajaaraŋ k’afak ayica, fo hádikinem bareŋ. Inini, ninkinan nip urenneŋrenn afalla úmánduk.

¹¹ Angu, aji úfegi ni Yensa alóbne nim, apápájul wúuro m’adékehne gujuliyahu bigokunom. Gúmár akanne ayéjeeniŋ: «Ninkinan urenneŋrenn afalla úmánduk.»

¹² Angu Yensa, badétuni buyichu hádiku ñantaalibehinem, afak akaana gusohánom k'aŋoolin anooh a taabálo k'aguyerne ingi ñantaalibehinem. Banoohi ayéjeeniŋ: - Ninkinan! Hóge úpájuleŋpájul h'ekaanoonuŋne?

¹³ Ingah! Eke ninkinan guhuyhumuŋhuy Arafaŋ wola Umuyhum? Nim guhuyumuŋne, te na marigenkinan, me ingine maŋ úmár.

¹⁴ Ingah! Iniman me Umuyhánan ingi arafankánan iyicne hádihenkinan, ninkinan mees, maŋ nim guñantaheŋne uyicárayeŋ hádikinan.

¹⁵ A buyichu hádikinan ijellihinoonuŋjellihin n’uñantaheŋne ukaanaŋ.

¹⁶ Ingah! Janteneŋ baŋ k’íteekinoonuŋ marigeno: Yikireŋ údool m’afankánehne ulaamekinem. Maŋ nim ganik agune a nintiku úbuuñuraaŋo. Ingah! Yikireŋ úbuuñuraa m'afankunehne m'abúuñuremne.

¹⁷ Inini ninkinan, uyennehineŋyennehin h’éteekinoonuŋne. Kanda ingah! Buyennehin bareŋ bádáŋ. Buyennehin bareŋ bádáŋ. Moŋon moŋon akanne h’éteekinemne ayikunkuneh na básuum a hafithinem.

¹⁸ Inini, h'éfuruntne balóbo, na ŋayri balób a gubaarhu ninkinan nip. Me, ii, ípápájul hóbun jamaŋo m'icaabenne. Kanda ingah!: Údiigeeno m'ibabaminne guyaahálaŋo anuurulanuurula a binaam ba jimahum. Nim gaññaañne a Hañaañeno. Inini, ho wúuro úmár adékehne bukaano añantay ayik ki nim apútulin ho Hañaañeno anlóbne. Hómár adék ayikhineh mara nim Díino ayaamirne.

¹⁹ Inini, ninkinan, íteekinoonuŋteekin mara m'ibabaminne guyaahálaŋo anuurulahne a binaam ba jimahum. Inini, aji úfegeŋ n'íteekinoonuŋne hómár gu bandór, maro nim, da hómár ayikhinehne úpájuláŋ maro me ingine m'igune.

²⁰ Janteneŋ baŋ k'íteekinoonuŋ marigeno: Wúuro m'akucunne wúuro m’íbuuñne, wúuro úmár me gakucunne. Ingi mees, wúuro m'akucunne me me, akucunkucun mees m'abúuñureemne.

M’ajuliyane bigoku Yensa

²¹ Yensa balóbi nim mees hafithinem nooroŋ. Angu ayéjeeniŋ: - Janteneŋ baŋ k'íteekinoonuŋ marigeno: Ingah! Úduk umomiye nanka m’adékehne gujuliyahu bigokum.

²² Angu banyennehini hómár, ñantaalibeŋo alaaleeniŋ dáde k’angu annooh na k'anningayeh. Kanda pájiireŋeŋ mu Yensa alóbumohne.

²³ Agida utaalibeŋo mu Yensa aninkne a hafithinem ummo na n’anoh a taabálo gúbidhu Yensa.

^24-25 Angu Simon Piyer aŋel utaalibeŋo úmár. Fo Simon Piyer aŋelne utaalibeŋo, utaalibeŋo afaŋunum n'atéeja Yensa k'ahoohayhinem amiihem wúuro m'alóbumohne. Ayéj: - Umuyhum, hantaŋ gúlobumohne?

²⁶ Utaalibeŋo bahoohayhini Yensa, Yensa ayéjem: - Inini, túyor k'idooh kopoculenku úmbuuro k’inum a basooreno. Moŋon moŋon gíneerne, úpájul maro úmár. Angu, Yensa akaan maŋ nim k'adooh kopoculenku úmbuuro anum a basooreno. Banumi na, anéer Judas, úbáku Simon Iskariyot.

²⁷ Judas bajahi úmbuuro mees, Iblisa aŋanam. Yensa ayéj Judas: - Inini, majaar k’údek ukaan h'oñantane ukaan.

²⁸ Fo Yensa alóbne nim, índukoŋo nip m’annoone na pájiireŋeŋ ho Yensa asíibane balóbo.

²⁹ Anlahlah karo ni Judas alahahne bakodihinin, karo ayikyik ho Yensa ayéjem adék agila ba gújuŋo, wola adék afúnnor sada imbi ñanyikireŋo.

³⁰ Judas mungu, f'ajahne úmbuuro mees, akeng afúr maŋ fam. Agida waato nómár n'amurul.

Ka Yensa awonnunne luwaŋo awunkulo

³¹ Angu, afúrumi na, fo Judas adoonane Yensa ayéj: - Ninkinan! Ingah! Waato adasdas no Díino ajellihinkinehne jamaŋo bafukum. Ingah! A gubaarhu h'adékehne buyikhum, jamaŋo anfékineh na bafuku Díino mees.

³² Inini, aji bafuku Díino afégaa a gubaarhu Úbárám, afeero mara Díino fankánam akankáneh ki bafuku Úbárám afégaa a binaanam. Ingah! Damiñ akankáneh hómár.

³³ Abocin ayéj: - Inini, ninkinan m'ipokunne dáde, damiñ ki diguy ingi ninkinan. Kanda útibhunumuŋ te dúfegemuŋ. Eke íteekinteekin ñanlaameku Ñanyahudo íyejeeniŋ: «B'ídekehne dupireneŋ k'úputoŋ bim.»? Inini maŋ ni íteekineeniŋne fam, ninkinan mees memomiye búteekinkinan, damiñ k’ídek ki b'ídekehne dupireneŋ k'úputoŋ bim.

³⁴ Abocin ayéjeeniŋ: - Inini, janteneŋ baŋ k'iwonnundoonuŋ luwaŋ awunkul: Luwaŋo awunkulo nómár, nómár agune kuku upokunayeŋ maŋ ni me ipokunoonuŋne. Yéjiri upokunayeŋ bareŋ. Iyéji, maŋ ni me ipokunoonuŋne, ninkinan mees uñantaheŋ upokunayeŋ. Nómár agune luwaŋo awunkulo n'iwonnundoonuŋne gub.

³⁵ Ingah! Aji upokunayeŋ iniman ni me ipokunoonuŋne, jamaŋo nip ampájihineh maro ninkinan uguyeŋne ñantaalibehum.

³⁶ Angu, Yensa bayéji nim, Simon Piyer aŋoyindem ayéjem: - Kanda, Umuyhum, fi bam beeraŋ gúdekehne? Ayéjem: - Ingah! B'ídekehne hadéko dupiren k'utifem a waato inno, kanda ayikhineh bísiba, úduk utifekunum ba bim.

³⁷ Simon Piyer ayéjem: - Umuyhum, me, horaŋ akanne k'úyej dipiren k'itifo manini? Me, ii, abáreembár iniiro a gubaarhu fi.

³⁸ Ayéjem: - Hóge marigen abárenbár k’uniiro a gubaarhu me? Ingah! Janten baŋ k’íteekino marigeno! Gucum, jandiŋ rankuluŋo bahooŋum, fi uñophuneh f’ábár wayaasaŋ alallaŋ maro úpájuleempájul. Nim Yensa ayéjne Simon Piyer.