Injilo No Saŋ 1 - Gúloku Díino

A gubaarhu M’ayéjuhne Gúloku Díino

¹ Me mo bim n’ídekireh ba balóku M'ayéjuhne Gúloku Díino. M'ayéjuhne Gúloku Díino, úmár ummo bim ingi Díino káriman fam. Faka úmár agune Díino fankánam.

² Úmár aguyguy káriman fam ingi Díino, fo Díino atoŋne kayabhu duniyaŋo guliguliiho.

³ Hoŋon hoŋon ho Díino ayabne, úmár ummo na. Yikireŋ ho Díino ayab ni úmár tohároŋ.

⁴ Kanjébo mees imbi úmár gafúruntne ki kanjébo kámár atohundutor mintor jiyaaŋo.

⁵ Jiyaaŋo jímár gawúnnohne gumurulo, te gumurulo gúmár gara apireneh gufaŋununku jiyaaŋo.

⁶ Angu ayikyik údiigeen úduk mu Díino abúuñor m'aretuh Yaya.

⁷ Úmár Yaya, ajellihinne jiyaaŋo j'ílobne ki ki jamaŋo nip ampiren anfiyum. Aséediyaseediya ki jamaŋo nip ampiren anfiyum jiyaaŋo jímár a gubaarhu h’alóbohne.

⁸ Yaya faŋo guyroŋ jiyaaŋo. Úmár afútfut k'aguy séed n'atéekinkinehne jamaŋo nip a gubaarhu jiyaaŋo jímár.

⁹ Jiyaaŋo jímár, jímár agune ji marigeno, j'adékirne a duniyaŋo inno ba buyaaŋurindiku jamaŋo nip.

¹⁰ M'ayéjuhne Gúloku Díino aguyguy a duniyaŋo káriman fam, kanda haman maŋ nim jamanku duniyaŋo yitárom. Agida úmár ingi Díino anyabne honjoroŋo nip.

¹¹ Adékridek ba a didiirahánam di Israyel, kanda haani jamankánam faŋo lahudom.

¹² Haman maŋ nim, índukoŋo anlahuremlahur k’anfak anfiyumem. Kanda m’anlahuremne nip, úmár anéereeniŋneer binaal k’anguy imberenku Díino.

¹³ Te imberenku Díino, immereŋ bosaaraŋaŋ iniman ni jamaŋo ambosaane. Bosaaraŋaŋ a básunku uraagofo. Bosaaraŋaŋ maŋ ni índiigeeno antíbehne buboshu jaraaho. Jaraku Díino, jámár ambosaabos maro Díino alahne bukankánin imberenkinem.

¹⁴ Angu, M'ayéjuhne Gúloku Díino abosaabos adék aguy uraagof imbi mint. A binaanam ífegmiŋfeg bafuku Báábám b'ayikne ni úmár agune úbárám úmánduko. Mint ñantaalibehinem ífegmiŋfeg maro gabonkerumebonkerum. Gayaafuŋayaafuŋ. Gajellihinejellihin mintor marigeno imbi Díino. Jikoŋo ámáráŋ nip arumunrumun tip a binaanam.

¹⁵ Fo M'ayéjuhne Gúloku Díino apúturne a duniyaŋo inno, údiigeeno m’ayéjuhne Yaya afúror k’alób kabaŋ, ayéjeh jamaŋo: - Ninkinan! Ningeŋ baŋ! F’éyejerne ayikhineh m'adékekinehne a duniyaŋo inno, te afankunum, a gubaarhu úmár gílobumohne. Angu, aji úfegi n’íyejne afankunum, maro úmár aguyguy bim káriman faliiho, ni me fanti bibosaa sah! Nim Yaya aséediyane a nintiku M'ayéjuhne Gúloku Díino.

¹⁶ Angu, n'ayikne bankabaŋo dáde akankaan bajóon balabahi a binentor, ba yikireŋ k'amuk.

¹⁷ Fégeŋ baŋ, Díino anéneer mint Luwaŋankánam a gubaarhu Musa. Kanda imbi Yensa, Umaasaŋo mu Díino Acaabenne, gafaŋumne n'ajellihin mintor marigeno ingi bankabaŋo b’ayikne a binentor.

¹⁸ Wúur fégahadaŋ Díino, kanda Úbárám úmánduko, atéejahemteeja k'afak aguy Díino. Fo úmár afútne, úmár ajellihinjellihin mintor ni Díino amíirne.

Ka Yaya ajaabine ñanlaameku Ñanyahudo

^19-20 Ñanlaameku Ñanyahudo m’angune a bukooro b’aretuhne Jerusalem ansíibáásiib búpájul a nintiku Yaya. Angu, ambúuñbuuñ ñanlaameku alimaamaŋo impinam ingi m'anyéjuhne Ñanleefi ba a binaanam. Bampút ammiihem anyéjem: - Fi nuko, fi ugune hantaŋ? Angu f'ammiihemne nim, Yaya foyuroŋ búteekinkinin. Inini galóbne arenn a sígihu jamaŋo nip ayéjeeniŋ:

²¹ - Me guyri Umaasaŋo Mu Díino Acaabenne. Me gireŋ de! Anfak ammiihem anyéjem: - Karo fi f’ugune taala Anabila Eli? Yaya afak añop ayéj: - Wówo, me gireŋ. Anfak anyéjem: - Karo fi ugune Anabiyoŋo n'anyéjne adék adékekineh? Yaya afak añop.

²² Anyéjem: - Inini nuko, fi a búpájihen fi ugune hantaŋ? Maro iñantamiŋ iŋoolinmiŋ ingi gúlob ba imbi m’ambúuñurne mint. Neeraŋ gunuk úlobhunehne gunankan?

²³ Fam Yaya ayéjeeniŋne: - Me ingine wúuro mu taala Anabila Esay ayéjne adék adékekineh. Ayéjeriyej wúuro adékekineh k’aguy a kanaŋaŋo kanlaalinno k'ayoofun síngiirhinem ayéjeh jamaŋo: «Ingah! Umuyhintor ummo bim n'adékireh deh! Jóoninditeŋ Umuyhintor binaal. Jóoninditemeŋ binaal bíwuuhi k'apiren adékum na.»

^24-25 Nim Yaya ayéjne mi ñanlaameku Ñanyahudo ambúuñne ba a binaanam. Agida ayik a binanin índiigeen m’antoh a dayra adúk n’ayéjuh ñanfarasiyaŋo. Immi ammiih Yaya anyéj: - Fi, f'úyejne fi guyro Umaasaŋo Mu Díino Acaabenne, guyro Anabila Eli, guyro Anabiyoŋo n'adék adékekinehne, angu horaŋ akanne k'uyiceh jamaŋo?

²⁶ Yaya aŋoyindeeniŋ ayéjeeniŋ: - Me, ii, baaruŋo bademmo giyicinkoonuŋne. Kanda ingah! Úduk umomiye nanka mu ninkinan pájiiroŋ.

²⁷ Úmár fanti batoŋ dohohunom. Me, bádi buyicikinem sapataŋ. Ititiir fanfaŋ! Nim Yaya alóbne.

²⁸ Inho nip bi gúbidhu Betani gayikne. Na Yaya gayicehne jamaŋo a gúbido gúduko gu jakaamo n’aretuhne Joodan, bi bísibaŋo afúruntohne.

Yensa ingine leeyaŋo no Díino akucundutne mintor

²⁹ Afúrumi na, gucunkunom Yaya aŋanden Yensa n'adékirehne. Ayéj jamaŋo: - Ninkinan! Ningeŋ baŋ leeyaŋo no Díino akucundutne mintor k'apiren akafari jínubonku duniyaŋo inno.

³⁰ Ingah! A gubaarhu úmár gílobunkoonuŋne. Íyejyej maro ayikhineh wúur m'adékekinehne, te afankáneh me. Angu, aji úfegeŋ n’íyejne afankunum, maro aguyriguy bim káriman faliiho ni fanti bibosaa.

³¹ Me faŋo pájiiriyer mu Díino acaabenne. H’épájulne bareŋ, hómár ingine Díino abúuñureemne ba buyichu jamaŋo a baaruŋo, te a gukaano nim ipiren ijellihin jamanku Israyel wúuro úmár.

³² Afúrumi na, Yaya atifur jamaŋo h'afégne f'aŋane buyichu Yensa. Inini gatifne ayéj: - Ífefeg Jamméejhu Díino Jarenninno n'akucorohne biriman a raafo. Akucrikuc k’adék anot imbi Yensa. Maŋ ni kofenkereer akucurohne, maŋ nim Jamméejhu Díino Jarenninno akucurne dam.

³³ Nim Yaya aséediyane a nintiku h'afégne d'ayicne Yensa. Afak ayéjeeniŋ: - Úpájuleŋ, me fankum pájiiremer, kanda Díino n'abúuñureemne ba buyichu jamaŋo ingi baaruŋo ayéjeemyejer: «Fi úfekineh Jamméejhum Jarenninno n'akucorohne k'adék anot arinku wúur. Úfegdir hómár, úpájihineh maro wúuro úmár gadékehne buyichu jamaŋo ingi Jamméejhum Jarenninno.» Nim Díino alóbeemne fam. Saŋ abocin ayéj:

³⁴ Kanda inini ífefeg hómár imbi Yensa. Kanda iñantay íseediya maro úmár agune Úbáku Díino. Angu, inho Yaya atifurne jamaŋo.

Ñantaalibehu Yensa inliiho

³⁵ Gucunkunom Yaya n'afak anguy na ingi taalibenkinem anakaŋ.

³⁶ Fo Yensa aŋane guwusunaŋo Yaya ayéjeeniŋ: - Ningeŋ baŋ leeyaŋo no Díino akucundutne mintor.

³⁷ Angu ñantaalibehu Yaya banyennehini hómár aŋŋay butifilinku Yensa.

³⁸ Yensa baningilay, afég ñantaalibeŋo n’aŋŋayemne butifo. Ayéjeeniŋ: - Ninkinan, horaŋ gútibheŋne? Immereŋ aŋŋoyindem anyéjem: - Rabahi, beeraŋ gugune? Agida «Rabahi» agune «Arafaŋ» ingi gúlokánin.

³⁹ Banyéjem nim, úmár aŋoyindeeniŋ: - Dókuloŋ, úfekineŋ k'egune. K'andék f'andék ampút imbi Yensa a waathu rayiibo. Angu annooh na ingi úmár baman fítiro.

⁴⁰ Índiigeeno immereŋ inako m’anyennehinne ho Yaya alóbne k'antifilin Yensa, údinem gurethinem Andáre. Andáre agune údonku Simon Piyer.

⁴¹ Angu dam Andáre, f'afúruntne imbi Yensa, awúuh ba imbi údoonom Simon Piyer. Bapút, ayéj údoonom: - Ingah! Idaŋunmiŋdaŋun Umaasaŋo Mu Díino Acaabenne! (Hómár ingine ingi gugáreko inini «Idaŋunmiŋdaŋun Úkáristo.» )

⁴² Angu, Andáre f'alóbne nim, adooh Simon ba imbi Yensa. Bampút, Yensa akorosom hóbun k’ayéjem: - F’ugune Simon úbáku Jonas. Kanda afúrumi gub, urethunuh Sefas. Nim Yensa ayéjemne. Agida Sefas, gureto gúmár ingine buwaalo imbi immereŋ.

Fo Yensa ahuyne Filip ingi Nataneyel

⁴³ Gucunkunom, Yensa alah guŋoolin ba didiirahu Galile. Bapúti, alahun na údiigeeno m’aretuhne Filip. Ayéjem: - Tifireem k'uguy utaalibehum.

⁴⁴ Agida, Filip Betsayida gagune, saariŋo no Piyer angune ingi Andáre.

⁴⁵ Afúrumi na, Filip adék afég údiigeeno m'aretuhne Nataneyel k'ayéjem: - Mint ii, ífegmiŋfeg údiigeeno mu Anabila Musa añaañne a Tawrato. Anabiyoŋoŋo mees aññaañemñaañ. Úmár agune Yensa, úbáku Isuf mu Nasaret.

⁴⁶ F'alóbne nim, Nataneyel aŋoyindem ayéjem: - Hom? Nasaret?! Hóge honj hajóon apiren afúrumor na? Filip aŋoyindem ayéjem: - Índek índokoŋ, úfekineh ingi sígihen.

⁴⁷ Baŋŋay hadéko, bantéejari Yensa, Yensa aning Nataneyel k’ayéj jamaŋo m’ankokayehne: - Ingah! Ummu Israyel m'apút ummooŋe n'adékireh. Úmár úwuuhi.

⁴⁸ Balóbi nim, Nataneyel n’ayennehin ayéjem: - Neeraŋ gúpájulorumeemne? Yensa aŋoyindem ayéjem: - Ífegenfeg jandiŋ Filip bahuyunto, f’onoone a sifigo.

⁴⁹ Agida Yensa dékereŋ na. Angu, fo Yensa alóbemne nim Nataneyel ayéjem: - Arafaŋ, fi ugune Úbáku Díino, fi ugune Umaasahu Israyel!

⁵⁰ Balóbi nim, Yensa ayéjem: - Fi, a gubaarhu n'ílobenne bareŋ a sifigo gífegenne guhar ufiyumeemne? Úduk úfekineh h'afankunehne hómár dáde.

⁵¹ Janteneŋ baŋ k'íteekinoonuŋ marigeno. Ninkinan úfekineŋ bísiba ni hakubo akimbulaane ki maleekaŋaŋo aŋŋafah, ankucuroh imbi Údiigeeno M'acaabenaane.