Injilo No Mak 9 - Gúloku Díino

¹ Yensa afak aŋoolin ayéjeeniŋ: - Janteneŋ baŋ k'íteekinoonuŋ marigeno! Ninkinan m'usoreŋne nanka gub ayikhineh índukoŋ a binanan mi danniiro ni fégireŋeŋ gúputhu maasayahu Díino. Bísibaŋo bímár maasayahu Díino apútokuneh ingi sembe. Nim Yensa alóbne.

Da arinku Yensa akúbulane

² Afúrumi na, bayiki ásibaŋ ámekilaŋ ingi ímbenduk, Yensa adooh ñantaalibehinem m’anretuhne Piyer ingi Jak ingi Saŋ. Ayéjeeniŋ: – Dókuloŋ k'índokoŋ a montaaño. K’ankokay k’andék a montaaño n'akeline dáde. Bampút a raafunumo, immereŋ bareŋ angune bim. F'angune bim, arinku Yensa akúbula.

³ Banningem anfég ni bayakánam mees akúbulane akaan bayaah bafer fañ, f’areñeh. Dúfegahar a duniyaŋo nip m'apirenkineh añéj bayaaho k'afer maŋ ni bámár.

⁴ Yensa, bakúbulay mees, ñantaalibeŋo ilallo anfég anabiyoŋoŋo mi famo m'anretuhne Eli ingi Musa. Agida immereŋ n’aŋŋay buwooño ingi Yensa.

⁵ Banfégeeniŋ mees, Piyer ayéj Yensa: - Arafaŋ, inini mint asúsuum mint dáde n’iguyminne imbi. Inini, túyor k' íjooninmiŋ íkás ilall, umbu ba fi, umbu ba Musa, búduko ba Eli.

⁶ Agida immereŋ andéwundewun fanfaŋ. Gúmár akanne Piyer pájiireŋ n'ayéjhinehne.

⁷ Balóbi nim, Díino akaan gukubo ki nim agoobeeniŋ immereŋ nip. Bagoobeeniŋ, anyennehin síngiir s'afúrumor maŋ na a gukubo k'ayéjeeniŋ: - Ninkinan, Yensa ingine Úbákum. Ipokunempokun baman a hafithum. Fiyintemeŋ k’uyennehindemeŋ!

⁸ Banyennehini bíloberenku Díino, anningilin. Banningilini beŋen beŋen, fégireŋeŋ wúur, Yensa bareŋ ganfégne.

⁹ Angu antuŋulor jankuco. F'aŋŋayirne jankuco, Yensa ayéjeeniŋ: - Ninkinan, inini, h'ófegeŋne gub dahu úduk úteekineŋ wúur fanta. Suturaareŋ hómár baman da Údiigeeno M'acaabenaane akenghinehne a biniirohánom k'aŋoolin ajéb. Waato nómár gukuru upirenkineŋne úloboŋ. Nim Yensa ayéjeeniŋne.

¹⁰ K'angu ñantaalibeŋo immereŋ ankaan maŋ nim k'ansutura fanta. Kanda haman nim gammiihayemiihay anyéjeh: - K'ayéjne akenghineh a biniiroŋo, na nuko neeraŋ gasíibane búyejo? Nim ñantaalibeŋo gammiihayehne.

¹¹ K'angu andék ammiih Yensa anyéjem: - Ñankeekihu Hañaañeno ganyéjeyej Umaasaŋo Mu Díino Acaabenne bapútumor, Anabila Eli añantane adéker. Inini, ísiibáámiŋsiib k'úteekin mint karo hómár marigen?

¹² Bammiihem nim ayéjeeniŋ: - Na marigenkinin. Anabila Eli anohokuneh Umaasaŋo Mu Díino Acaabenne k'akaan ki jamaŋo ampare gúputhunom. Kanda wosenteŋ! Eke anyéjyej a Hañaañeno maro Údiigeeno M'acaabenaane, jamaŋo anyehenkinem k'anheelenem. Angu na, neeraŋ gansíibane balóbo?

¹³ K'íteekinoonuŋ inho: Ingah! Anabila Eli adékridek mees. Angu neeraŋ jamaŋo ankaanemne? Ankaanemkaan h'asúumne immereŋ fo ambujom. Agida hómár añaañaañaañ mees a Hañaañeno maro nim jamaŋo ankankánamne. Nim Yensa atéekinne ñantaalibehinem f'aŋŋayirne jankuco a montaaño.

Ka Yensa ajébunne wolo mu fáguho aŋanne

¹⁴ Bampútri a jídonku montaaño, anlahun ñantaalibeŋo índukoŋo ingi jamaŋo n'anrumunne na tip ankooleeniŋ na. Agida ayikyik na mees ñankeekihu Hañaañeno m'aŋŋay sindegay ingi ñantaalibehu Yensa.

¹⁵ Angu jamaŋo baŋŋandenti Yensa n'adékirehne, abineeniŋ dáde k'anwaliŋem ba buramhánam.

¹⁶ Banrahi, Yensa arameeniŋ k'ayéj ñantaalibehinem: - Ninkinan, horaŋ gudegayheŋne ingi immi?

¹⁷ Údiigeen úduk m'awonnáne na ayéj Yensa: - Arafaŋ, ingah, aji úfegi n’andegayehne, úbákum, fáguh aŋanemne k'ayehenkem dáde. Gara apireneh balób.

¹⁸ Gúduk acigem ki buruŋo agufoh, anaŋilineh harihinem, arino alaal. Gúmár akanne ídekitem ba imbi fiyer k'újebinem. Bíputri ilahun na ñantaalibehen k'ikiinaheeniŋ gúfunnhu fáguho, kanda pirendeŋeŋ. A gubaarhu hómár gulahunteeniŋne n'andegayehne ingi ñankeekihu Hañaañeno. Nim bááhu wolo alóbne.

¹⁹ Angu balóbi nim Yensa ayéj jamaŋo: - Ninkinan, guru ufiyinkeŋ Díino. Angu imuñaroonuŋ baman waat nooraŋ? Dootomuŋ wolo!

²⁰ Andoorom. Angu fáguho f'agune imbi wolo, bafégi Yensa akaan ki wolo añaŋun dáde k'anen k'aluklukoh, buruŋo agufoh.

²¹ Angu Yensa ayéj bááhu wolo: - Biriman waat nooraŋ gakankamne nim? Bááhu wolo ajaabiyem ayéjem: - Biriman kómár kotiir.

²² Gúduk acigem a kuulo, gúduk a baaruŋo maro asíibáásiib bubujhunom. Nim gakaanahne. Kanda inini, yiker bankabaŋ k'újebund mint wolo, aji ininkaman upirenkineh. Nim bááhu wolo ayéjne Yensa.

²³ Bayéjem nim, Yensa aŋoyindem ayéjem: - Uyéjeemyej íjebinem aji ipirenkineh. Kanda aji ufiyumi Díino, Díino apiren akaan hogurumaareŋ.

²⁴ Balóbi nim, bááhu wolo aŋoyindem ayéjem: - Me ifiyumfiyum Díino hotir, kanda inini ísiibáásiib k'ubecindeem sembe k'ifaŋunum n'ifiyumem.

²⁵ Angu bááhu wolo balóbi nim mees, Yensa afég ni jamaŋo angítehne ba a binanin. Asekur fáguho ayéjem: - Fi fi fáguho, f’ukanne ki wolo ummu gara apireneh balób, afak ateerilin. Inini, aca! Fút bandór imbi wolo ummu!

²⁶ Yensa balóbi nim, fáguho awuuga dáde k'akaan ki wolo añaŋuna k'akir afúr a binaanam adék adoona, k'abénn na wolo k'awaanane. Angu ni wolo awaanane na anaman nip anlah karo aniironiiro k'anyéjeh: - Ingah! Aniironiiro! Nim ganyéjehne.

²⁷ Angu Yensa adék alah wolo a silah k’akenginem. Wolo angu awonn na ingi kanjébhinem. Nim Yensa akanne dam.

²⁸ K'angu aŋŋoolin ba a dígo k'ankucunaane, úmár ingi ñantaalibehinem. F'angune na a gufaco immereŋ bareŋ, ñantaalibeŋo ammiihem anyéjem: - Inini, horaŋ akanne ki mint pirendimiŋ k’ífunnmiŋ fáguho imbi wolo?

²⁹ Yensa aŋoyindeeniŋ ayéjeeniŋ: - Fasonku fáguho fámár, aji kiinaaro Díino, dafúr.

Da Yensa aŋoolinkinne alób a nintiku biniirohánom ingi jankenghinem

^30-31 Angu Yensa ingi ñantaalibehinem anfúrum na k'andék angírin didiirahu Galile. Agida Yensa n'asíiba k’andék kantíg k’ayeerene ki nim apiren akawandin ñantaalibehinem ba bareŋ. Angu asutura b’andékehne dahi índukoŋo ampájul k'angune. F’angune na, ayikyik bísiba bi Yensa ayéj ñantaalibehinem: -Inini, Údiigeeno M'acaabenaane, ayikhineh bísiba bi ajuliyahunuh imbi jamaŋo. Immi ambujhunom kanda akengunkunuh a biniirohánom ingi bumburunku arinkinem nip dahankánam k'aŋoolin ajéb. Nim Yensa ayéjeeniŋne dam.

³² Kanda a waato nómár ñantaalibehinem wuturoŋoŋ ho Yensa asíibane balóbo, te faka bollendeŋeŋ gumikinem.

Simbááhayo a gubaarhu m’aguyumne wúur úde imbi Díino

³³ Afúrumi na, Yensa ingi ñantaalibehinem andék f’andak ampút a saariŋo n’aretuhne Kapáneyum. Bampút a dígo n'ankucunaane aŋŋan a gufaco. F'angune na, Yensa amiiheeniŋ ayéj: - Inini, ninkinan, horaŋ guñopunayriheŋne a binaalo?

³⁴ F'amiiheeniŋne nim anroh balóbo maro a binaalo aññopunayerñopunay a gubaarhu m’agune wúuro údenno imbi immereŋ fankánin. Gúmár akanne anrohi gúteekinkinem.

³⁵ K'angu Yensa anooh k'ahuy ñantaalibehinem haalaŋo ingi inako nip ayéjeeniŋ: - Inini, ninkinan, m'asíiba k'aguy wúur úde imbi Díino añantay aguy m'afaŋumne n'atiir k'alóki gudohoku ugurumaareŋ.

³⁶ Yensa balóbi nim mees, awonnálin na wolo k’alaham agoobom k'ayéj ñantaalibehinem:

³⁷ - Aji ukucuni wol a gubaarhu n'upokuneemne, akankaan ininkaman me gukucunne. Faka aji ukucuni me me, akankaan iniman m'abúuñureemne gunuk ukucunne. Nim Yensa akawandinne ñantaalibehinem.

³⁸ Angu Saŋ ayéjyej Yensa: - Arafaŋ, mint ífegmiŋfeg údiigeen úduk n'aŋay gúfunnhu fáguhoŋo a baraku gurethen. Kanda mint íyejemmiŋyej abénn maro tohároŋ a binentor.

³⁹ Yensa aŋoyindem ayéj: - Dahu údiigumemeŋ de! Ingah aji akaani tamaseer a baraku gurethum, wúuro úmár daŋoolin atemeem eke nim e?

⁴⁰ Ingah, wúuro mu foyuroŋne mintor, unentor.

⁴¹ Janteneŋ baŋ k'íteekinoonuŋ marigeno: Aji wúur anéeroonuŋ baaru, haani kolanduku baaruŋo maro n'uguyeŋne a binaam, wúuro úmár ayikhineh baraaj.

Bénnireŋ fereŋ gukanku hójondoŋo

⁴² Yensa afak aŋoolin ayéjeeniŋ: - Aji wúur afiyumeem ininkaman wolo ummu, ki úduk adéker aŋanam a gukanku hójondoŋo, h'ajóonerne a binaanam annébindem dawaal a budoobo k'andék anworom a jakaamo.

⁴³ Ingah! Aji ininkaman silakan abááhen aŋano a bukanku hójondoŋo, leker silaho símár! Akohi uŋan a kanjébo ka bandór ingi silah ínsenduk ingi uŋan jahanama ingi halah hanak. Kuulo ku jahanama gara ayímeh. [

⁴⁴ ]

⁴⁵ Ingi fana, aji sídiken aŋanen a hójondoŋo, leker sídiho símár. Akohuneh uŋan a kanjébo ka bandór ingi sídih ínsenduk ingi uŋan jahanama ingi hádiho hanako. [

⁴⁶ ]

⁴⁷ Aji sígihen aŋanen a hójondoŋo, lukusor sígilo símár udabun. Ingah, akohuneh uŋan a maasayahu Díino ingi sígil ínsenduk ingi uworaa a kuulo ingi ígilo inako.

⁴⁸ Tipuso t'angune na t'ankábáhne arino gara anniiro. Kuulhu jahanama dayímahar bandór.

⁴⁹ Ugurumaareŋ añantay ayik gukunaa ingi kuulo.

⁵⁰ Múmmeero anafanafa, kanda aji adéki fo bafirhinem ataahála, neeraŋ gukankánehne ki bafirhinem aŋooliner? Yikireŋ ninkan. Woto ninkinan, kuku umajahaŋ guguyo iniman múmmeer mújooni. Lahayreŋ k'uguyoŋ a básuum. Buku urumoŋ!