Injilo No Mak 8 - Gúloku Díino

Da Yensa afoolenne ñanraagof wuuliyeŋ arenekeŋ

¹ Afúrumi na, dam faka timaŋo jup andék anlahun Yensa. Adékiidek, guyaahálahánin adét. Angu fo guyaahálaŋo adétne, Yensa ahuyor ñantaalibehinem k'andéker anwaalaham. Banjógunay ayéjeeniŋ:

² - Jamaŋo immi, inini buruhu ásibaŋ alallaŋ ginguyoŋne nanka. Inini k'agune guyaahálaŋo adédet. Arinkum akabkab

³ ifak ibenuh biki ídekeh gíyejeeniŋ aŋŋúñ andék annen a gubaarhu kúugo imbeŋ a binaalo maro ayikyik m'anfúrumor biŋantin. Nim Yensa alóbne.

⁴ Kanda balóbi nim ñantaalibehinem anyéjem: - Nanka k'enguyoŋne a kanaŋaŋo, beeraŋ ginyikunkunoŋne guyaahálaŋo h’abárháneeniŋne?

⁵ Banlóbi nim Yensa ayéjeeniŋ: - Inini ñómbuur ñoliheeraŋ agune nanka? Anyéjem: - Ñómekila ingi ñonak.

⁶ Ayéjeeniŋ: - Nétemuŋ! Bajahi ayéj jamaŋo nip annooh a réeŋo. Bannoohi, Yensa adooh úmbuuro k'aramun Díino. Baramuni Díino, afac ñómbuuro k'anéer ñantaalibehinem k'andék ankib jamaŋo.

⁷ Agida anyikyik mees ñokat ñopinam ñótedaa. Yensa afak adooh ñómár k’aduwar ñómár iniman n’ansaliyehne. Bakaani nim, anéer ñantaalibehinem k’ankib.

⁸ Angu dam jamaŋo nip anfoolane f'anhay. Bambollay ñantaalibehinem andék andooh hofallaheno, te hómár anrumunrumun hatehel hámekila ingi hanak.

⁹ Agida jamaŋo m'ansorne na dam ambábár bi ñanraagof wuuliyeŋ arenekeŋ. Angu banfoolay mees, Yensa ayéjeeniŋ ambicay aŋŋúñ.

¹⁰ Bayéjeeniŋ aŋŋúñ, Yensa anyifa a sídeeno ingi ñantaalibehinem k'andék ba a didiirahu Dalmanuta.

Da ñanfarasiyaŋo ankiinane Yensa akandeeniŋ tamaseer

¹¹ Na a didiirahu Dalmanuta ñanfarasiyaŋo andékirne andék antíb Yensa. Agida n’ansíiba buneninkinem k’ampiren annéerem kayúuleno. Angu bampút ankomb siññopunay ingi Yensa k’ammincinkem balóbo k'adék akandeeniŋ tamaseer n’ópájul n’ajellihinkinehne maro Díino abúuñuremne.

¹² Yensa banlóbem nim anuumul pef k'ayéj: - Horaŋ akanne ki jamaŋo inini ampokun gúfeku tamaseereŋ bareŋ? Janteneŋ baŋ k'íteekinoonuŋ marigeno. Dikaan tamaseer ki ki karo nómár aséediya maro Díino abúuñureemne.

¹³ Yensa balóbi nim mees andék anyifa a sídeeno, úmár ingi ñantaalibehinem k'andék anjuc ambénneeniŋ na.

Láwiirhu ñanfarasiyaŋo ingi Herod

¹⁴ Angu Yensa anguy a sídeeno ingi ñantaalibehinem. Kanda f'aŋŋane hadéko ñantaalibeŋo anfiiram budoku úmbuuro. Agida anlahlah na kómbuur ínkonduk bareŋ.

¹⁵ Angu Yensa ayéjeeniŋ: - Káánunteŋ láwiirhu ñanfarasiyaŋo ingi inno Umaasaŋo Herod.

¹⁶ Fo Yensa alóbne nim ñantaalibehinem anyéjayeh: - Karo n'inyikuroŋoŋne úmbuuro galóbohne?

¹⁷ Angu f'anlóbne nim Yensa apájul k’ayéjeeniŋ: - Horaŋ akanne k'uwoñoŋ ineeŋ? Ulaheŋlah karo ni yikuroŋne úmbuuro, gúmár akanne íyejoonuŋ úkáánumáŋ láwiirhu ñanfarasiyaŋo ingi inno Umaasaŋo Herod? Gúmár gireŋ! Inini, karo fanti buwutoŋ? Karo jamméejenkánan amibane baman manini?

¹⁸ Karo ígihinan ingi ilaahánan jóndoŋ? Karo lentaaroŋ dam?

¹⁹ F'efacne ñómbuuro ñómákilaŋo k'ifoolen índiigeeno wuuliyeŋ amákilaŋo, f'ambollane gufoolaŋo, ninkinan hatehel haliheeraŋ gujaheŋne a hofallaheno? Yensa bamiiheeniŋ nim ñantaalibeŋo anjaabiyem anyéjem: - Hatehel haala ingi hanak.

²⁰ Banlóbi nim Yensa afak aŋoolin amiiheeniŋ ayéjeeniŋ: - K'angu dam d'epoculne ñómbuuro k'ifoolen agofoŋo wuuliyeŋo arenekeŋo, hofallaheno ha dam hatehel haliheeraŋ gurumuneŋne? Anjaabiyem anyéjem: - Hatehel hámekila ingi hanak.

²¹ Banjaabiyem nim Yensa ayéjeeniŋ: - Angu baman manini, ninkinan fanti buwutoŋ maro me guyikhum úmbuuro kaanundum tana? Nim Yensa ayéjeeniŋne.

Da Yensa ajébunne úpiminno a saariŋo n’aretuhne Betsayida

²² Angu andék ingi sídeeno f'andék anjuc ampút a saariŋo n’aretuhne Betsayida. F'angune bim ayik m'andoohor údiigeen úpimi ba imbi Yensa k’ankiinaham dáde amapundeeniŋ údiigeeno k'ajéb.

²³ Banlóbem nim Yensa alah údiigeeno a silah k'atuulenem f'andék anfúr a saariŋo. Bambéni saariŋo, Yensa alotun ígihu údiigeeno. Balotuni mees, amapun ígihinem k'ayéjem: - Angu inini, gúfegefeg?

²⁴ Yensa balóbi nim, údiigeeno ayoofun ígihinem k'ayéjem: - Ífefeg ñanraagofoŋo, kanda yaaŋáraŋ. Akankaan iniman munnoŋ m'aŋay hadék.

²⁵ Angu Yensa amapun ígihinem anakin. F'aŋoolinne amapun ígihinem, údiigeeno akir afég nimbun.

²⁶ Angu Yensa ayéjem: - Inini, ŋoolint a dígo, kanda dahu údekum si saariŋo de! Balóbi nim údiigeeno adék adoona.

Ka Piyer alóbne maro Yensa agune Umaasaŋo Mu Díino Acaabenne

²⁷ Afúrumi na, Yensa ingi ñantaalibehinem anfúrum Betsayida ankok bi akooroŋo n'antéejane Sesariya Filipay. Andékeh anwooñoh ki Yensa amiih ñantaalibehinem ayéjeeniŋ: - Ninkinan ii, neeraŋ guyennehineŋne? Neeraŋ jamaŋo anyéjne imbi me? A búpájihinin me ingine hantaŋ?

²⁸ Ñantaalibeŋo anjaabiyem anyéjem: - Ah! Índukoŋo anyéjyej f'ugune tala Yaya M'ayicimehne, índukoŋo anyéj f'ugune tala Anabila Eli, índukoŋo anyéj fi anabiyoŋ adúk. Nim jamaŋo aŋŋane gumiihooraŋo.

²⁹ Banlóbi nim, Yensa aŋoolin amiiheeniŋ ayéj: - Kanda ninkinan nuko, neeraŋ gunuk ulaheŋne me me? Balóbi nim Simon Piyer aŋoyindem ayéjem: - Me nuko, a siwosenku me, fi ugune Umaasaŋo Mu Díino Acaabenne.

³⁰ Angu Piyer balóbi nim Yensa ayéjeeniŋ amincin: - Ukoŋkoŋ, kanda dahu úduk úteekineŋ wúur. Nim Yensa anwooñne ingi ñantaalibehinem.

³¹ Angu afúrumi n’anlóbne na dam, Yensa akomb gukawandinku ñantaalibehinem a gubaarhu n’aniirorunkunehne. Ayéjeeniŋ: - Ingah! Údiigeeno M'acaabenaane ayokáneh dáde. Ñanlaamero ingi ñankeekihu Hañaañeno ingi ñanlaameku alimaamaŋo ancucunkunom k’ankaanam k'abujaa. Nim gankankunehne maro hómár añantañanta ayikem. Kanda aniirodir, dahankánam akenghineh a biniirohunom ingi bumburunku arinkinem nip k'aŋoolin ajéb.

³² Nim Yensa atéekinne ñantaalibehinem arenn. Kanda balóbi nim, Piyer alaham k'ambááhála hotir. Bambááhálay ayéjem: -Ingah! Dahu úyej nim!

³³ Balóbem nim Yensa anoorla aning ñantaalibehinem k'asekur Piyer ayéjem: - Seetano déker! Piyer, aji úlobi nim ŋayro gútib ho Díino asíibane gukaano. Ho jamaŋo ansíibane gútibehne. Nim Yensa asekurne Piyer.

³⁴ Afúrumi na, Yensa ahuy barumuno b’aŋantinne hotir k'akawandineeniŋ ingi ñantaalibehinem ayéjeeniŋ: - Ninkinan, ningeŋ baŋ, wúur m'asíiba hadék ingi me añantay abénn kawosenku bigokánam. Añantay alóki k'aniiro, añantay alóki ki jamaŋo anféginem, aŋan ñankindenkinem a gutifilinkum.

³⁵ Moŋon moŋon asíibane gupahunku ñankindenkinem, úmár akir afootahunehne. Kanda m'alóki k'abujaa a gubaarhu n'atifilineemne ingi n'atéekinehne jamaŋo Kúmbuuñaamo Kúnsuuminno, wúuro úmár ayikhineh kanjébo ka bandór.

³⁶ Ningeŋ baŋ! Aji wúur adohoy ingi sembe f'adék ayik nááfulo jup k'adék fo aniiro, hóge kunyiko kúmár anafahánam jahanama? Wówo! Danafaham.

³⁷ Hóge wúur apiren acaam Díino ki biki Díino aŋanam jahanama? Dapiren!

³⁸ Jamaano no waato inno anhalakihalaki, anfak anlápur. Aji ayiki m'aguy a bájegenenkánan m'aroh gutifilinkum wola aroh a nintiku h'élobohne, me mees irokuneh gúyejo maro wúuro úmár unaam. Da Údiigeeno M'acaabenaane aŋoolinekinehne a duniyaŋo ingi bafuku Báábám ingi maleekaŋaŋo, arokuneh gúyejo maro wúuro úmár unaanam. Nim Yensa ayéjeeniŋne.