Injilo No Mak 5 - Gúloku Díino

Yensa afaŋi n’afuuh fáguhoŋo

¹ Afúrumi na, Yensa ingi ñantaalibehinem anfúrum gulibilino gu beŋen k’anjucum resiyoŋo no ñamhu Gerasen.

² Bankuci a sídeeno údiigeen úduk mu fáguhoŋo aŋŋanne afég Yensa k’agírer burahálinkinem.

³ Agida n'afúrumor a bawúboŋo maro na gagune. Údiigeeno úmár, yikireŋ m’apirenem, haani ingi ceenenku balomboono.

⁴ Jamaŋo halabahi ganceenemne a hádiho ingi a halaho, kanda ganceenehem, úmár ayik sembe n’ópájulne ahallun ceeneŋo ámáráŋ k'apah. Wúur pirendom.

⁵ Gadékinadekina jaket báárig a bawúboŋo ingi a montañaŋo k’ayíililineh. Adoohoh bawaalo k'agiihorah arinkinem.

⁶ Angu dam údiigeeno úmár baŋandenti Yensa agírer arahálinem k’ aruŋa a binaanam.

^7-8 Yensa bafégem ayéj: - Fi fáguho, fút imbi údiigeeno ummu m’uŋanne! Údiigeeno apeej ayéjem: - Yensa Úbáku Díino n'afaŋumne n'ayik sembe, horaŋ akanne k'umitenem? Kalir baŋ karo dúfegineem!

⁹ K'angu Yensa amiihem, ayéjem: - Fi gurethen neeraŋ? Ayéjem: - Me gurethum «Barumuno» maro mint fáguhoŋo iŋanmiŋŋan imbi ummu irumunmiŋ na tip.

¹⁰ Yensa! Bonkerer way ki dahu úfunn mint a didiiraŋo indi!

¹¹ Agida ayikyik koorehu jifekeŋ adé antéeja na a montaaño n'aŋŋay gufoola.

¹² Fáguhoŋo anyéj Yensa: - Inini, Bonkereri way! Bénner mint k'ídek iŋanmiŋ imbi jifekeŋo inoŋ.

¹³ Yensa alóki, k’angu andék anŋan imbi jifekeŋo. Agida jifekeŋo ámáráŋ barumunkánin ambábár wuuleŋ anakaŋ. Iyoo inini, fáguhoŋo baŋŋani imbi jifekeŋo maŋ na k’angune a raafo, jifekeŋo angírumer a jídonku montaaño andék annen a jakaamo anlím k’anniiro na nip.

¹⁴ Afúrumi na, ñankooño banfégi maro jifekeŋo nip anniirone ampaas hágiro beŋen beŋen a bukooro ingi a kanaŋaŋo k'antifur jamaŋo h’ayikne. Banyennehini angírer ba búfego.

¹⁵ Bampútri imbi Yensa, anlahun na údiigeeno mu fáguhoŋo jup anruurerne n’ajéb, akaana bayaaho, anoohum tum. F'anfégne hómár ambenuh.

¹⁶ M'anfégne h'ayikne údiigeeno mu fáguhoŋo anruurerne ingi h'ayikne jifekeŋo, antifurtifur hómár nip jamaŋo.

¹⁷ Banyennehini ankomb bumaanenku Yensa k'afúr a didiirahánin adék bíduk.

¹⁸ Yensa ingi ñantaalibehinem antuŋul hadéko. Yensa baŋay guyifaŋo a sídeeno, mu fáguhoŋo anruurerne aŋayar butifo k’ayéj: - Yensa! Túyoom k’inkokayoŋ. Bonkereri!

¹⁹ Úmár ayéjem: - Wówo! Dimpirenoŋ k’inkokayoŋ. Inini, fi ŋoolint ba imbi jamankan k’úduk utifureeniŋ ni Umuyhon akááñinahinenne ingi n'ayikne bankabaŋo a binankan.

²⁰ Adék akaan maŋ nim. Adék a resiyoŋo n’aretuhne Akooroŋo Haalaŋo k’atifur jamaŋo m'angune na a nintiku ho Yensa akandemne. Jamaŋo banyennehini mees abineeniŋ dáde.

Yensa afaŋi n’afuuh banéro ingi biniiroŋo

²¹ Afúrumi na, Yensa ajuc jakaamo aŋoolin ba gúbido gu beŋen. Bapúti bim jamaŋo andéker anrumun tip k'ankolom maŋ na a bakaranku jakaamo.

²² F'angune na údiigeen úduk apútor. Gurethinem Jayirus. Úmár ulaameku jaameŋo.

²³ Jayirus bapútri aruŋa a jannoku Yensa k’akiinaham ayéjem: - Kógidhum, biniiroŋo gaŋane. Bonkerer k'índokoŋ a binaanam. Gímputoŋ úlobundom halakan k'ajéb. Nim gasunkurinne gukiinahu Yensa.

²⁴ Angu fo Jayirus alóbne nim Yensa alóki k'andék. Angu jamaŋo m'aŋŋáábineeniŋne anrumunrumun tip k'anliflifeh ba búteejahu Yensa.

²⁵ Agida a barumuno bámár ayikyik udikaam m'úpájul buruhu díineŋ haala ingi anakaŋ galeeñinehne.

²⁶ Angu udikaamo úmár adékdeker imbi ñansaajum ñanlabahi fo bakodihinem adéter bim, kanda pirendeŋeŋ gusaajhánam. Faka bisaajenkinin ayehenemyehen dáde, afak abecin banéro.

²⁷ Angu udikaamo ayennennehin gu Yensa ingi n'ahatne gújebunumo. K’angu dam adéker alahunam. Bafégem ajokála a barumuno a mángákánám k'adék amapun réeŋununku sabadóorhánom.

²⁸ Agida n’ayéjoora: - Haani ídek imapun bayakánam íjebhineh.

²⁹ K'angu adak akaan maŋ nim. Bamapuni sabadóorhu Yensa abénn guleeño maŋ fam, k’ahar apájul maro k'agune ajébjeb.

³⁰ Samánduko Yensa apájul maro sembehinem ataalálataahála. Bapájuli hómár ahar anoorla k'aning jamaŋo, amiiheeniŋ ayéj: - Hantaŋ amapunne bayakum?

³¹ Angu ñantaalibehinem anyéjem: - Eke jamaŋo nip ganliflifehne ba a binankan angu k'úyej: «Hantaŋ?»

³² Angu Yensa aningilin a barumuno karo afég wúuro m'amapunemne.

³³ Udikaamo n'apájulne maro Yensa ajébunemjebun adék aruŋa a jannokunom k'añaŋunah kumbenuho. Baruŋay atifur Yensa h’ayikemne nip, suturaaraŋ honj.

³⁴ Babollay gutifo Yensa ayéjem: - Bágidhum, aji úfegi újebi, a gubaarhu gufiyumo g'ufiyumeemne. Inini upiren údek angu ingi básuum. Banéro afúr arinken bandór. Nim Yensa alóbne.

³⁵ Kanda f'aŋane balóbo ingi udikaamo jamaŋ índukoŋ ampútor na. Immi n’anfúrumor díku Jayirus, Jayirus ulaameku jaameŋo. Angu bampútri anyéj Jayirus: - Buku uyehen Arafaŋo maro kógido akuckuc.

³⁶ Banlóbi nim Yensa ayennehin kanda jahárindeeniŋ. Ayéj Jayirus: - Dahu ubenuh! Fiyint Díino!

³⁷ Balóbi nim mees ayéj barumuno: - Mukureŋ nanka! Balóbi nim úmár ankokay ingi Piyer ingi índonkayo inako Jak ingi Saŋ ingi Jayirus ingi jamanku díku Jayirus m'ambúuñuraane. Immereŋ ba bareŋ Yensa alókine k’ankokay ba imbi Jayirus.

³⁸ Bampút a díkinem anlahun jíwumo jup. Jamaŋo anhooŋoh, anyíililineh.

³⁹ Yensa aŋan a gufaco. Baŋani alahun na jamaŋo n'anwúmohne anhooŋoh. Ayéjeeniŋ: - Horaŋ gúwumhoŋne ineeŋ? Horaŋ guhonkoŋne? Ingah! Wolo niirooroŋ. Sínduuf fanta gaŋane.

⁴⁰ Yensa balóbi nim jamaŋo anwúmoh k'anyeefihem. Angu ayéjeeniŋ anfúr a bílido. Banfúri ayéj Jak ingi Saŋ ingi Piyer ingi ñamboshu kógido aŋŋáábinem ba a kofaco k'anwaaninne kógido.

⁴¹ Baŋŋani adék adak alah silaku kógido k’ayéjem: - Talita kum! Nim ingine «Kógido kenger!»

⁴² Yensa balóbi nim, kógido akeng k'atuŋul hadéko. Agida kógido ayikyik anaman díineŋ haala ingi anakaŋ. Kógido bakengi a biniirohánom jamaŋo abineeniŋ dáde.

⁴³ K'angu Yensa amincin gúyejhu jamaŋo biki andék antéekin maro akengunkengun kógido a biniiroŋo. Ayéjeeniŋ: - Nétemeŋ ayaahála! Ankaan maŋ nim.