Injilo No Mak 14 - Gúloku Díino

F’anjanfane Yensa

¹ Afúrumi na, fo Gújunku Guwusunaamo ingi Gújunku Úmbuuro no Yikireŋne Láwiiro afallane ásibaŋ anakaŋ, ñanlaameku alimaamaŋo ingi ñankeekihu Hañaañeno anjanfa Yensa. Antíbtib binaal ba bulakánam k'abujaa a sutura.

² Anyéj: - Inini, dahi inlahomoŋ a waathu gújuŋo maro aji inkaanoŋ nim jamaŋo ankengekineh a binentor. Nim ganyéjne.

Fo udikaamo abúuñane Yensa ingi kárámánjo

³ Angu waato nómár, Yensa úmár na a saariŋo n’aretuhne Betani ingi ñantaalibehinem. Andékdek ba guyaahálaŋo a díku Simon. Agida Simon fam, kafaño alahemne ki Yensa ajébinem. Angu f'aŋŋane na guyaahálaŋo, udikaam úduk aŋanar a gufaco n’alah kono kóduk. Konoŋo kómár, buwaal ganfiliyumne. Agida n'akaan na kárámánjo n'aretuhne naro. Naro nómár aseser dáde maro gatiira. Angu udikaamo baŋanti, adék alahun Yensa k'anoone guyaahálaŋo. Bapút, afili koruhu konoŋo k'ahupun Yensa kárámánjo a bigof ba búbuuñahánam.

⁴ Kanda índukoŋo banfégi n’akanne, aññuumul k'anyéjeh: - Huyi! Horaŋ akanne k'apuñpuñin ineeŋ?

⁵ Ingah, aji ininkaman gujuliyaher, agumb ayiker bakodiŋo jup. Gajuliyay, adék anéer ñanyikireŋo. Eke bakodiŋo bámár, aji gurifahin, afaŋi bakodiŋo ba wúuro adóolne buruhu díin. Nim ganyéjehne k’ansekireh udikaamo.

⁶ Angu Yensa ayéjeeniŋ: - Bénteŋ wúuro! Horaŋ gusekukemeŋne ineeŋ? Ingah! H'akaaneemne ajónjoon.

⁷ Fégeŋ baŋ, imbi ayikhineh ñanyikireŋo baman dagurumaareŋ. Waatowaat gúsiibahaŋne upireneŋ ukandureeniŋ hójooni. Kanda me, diguy ingi ninkinan baman dagurumaareŋ.

⁸ Udikaamo akankaan h'apirenne. Ahupuneemhupun kárámánjo bandór ba bísibaŋo b'anwúbhunumne.

⁹ Janteneŋ baŋ k'íteekinoonuŋ marigeno: Ho udikaamo ummu akaaneemne gub, anlóbhuneh beŋen beŋen a duniyaŋo. Oo! Beŋen beŋen b'andékhinehne gúteekinku jamaŋo Kúmbuuñaamo Kúnsuuminno, anlóbhuneh ki jamaŋo anlentála ho udikaamo ummu akaaneemne. Nim Yensa alóbne.

Ho Judas anyennehinayne ingi ñanlaameku alimaamaŋo

¹⁰ Angu ayikyik utaalibe úduk m’atoh a ñantaalibeŋo haalaŋo ingi inako m’ankokayehne ingi Yensa. Gurethinem Judas Iskariyot. F’afégne ho udikaamo akanne, adék imbi ñanlaameku alimaamaŋo b’angune. Apúti, ayéjeeniŋ apirenkineh ajuliyareeniŋ bigoku Yensa.

¹¹ Immereŋ, bayennehini hómár asúumeeniŋ fanfaŋ k’andiigem bakodiŋo. F’andiigemne bakodiŋo, Judas aŋoolin aŋay bútibo n’akankunehne k’ampiren anlah Yensa.

Kaparehu Gújunku Úmbuuro no Yikireŋne Láwiiro

¹² Afúrumi na, gújuŋo apútor. Gújuŋo gúmár, Gújunku Úmbuuro no Yikireŋne Láwiiro ganyéjehne. Gambujobuj saahaŋaŋo k'anlentála ni Díino apahunorumne maamaamankánin a didiirahu Esipt. Angu babári bísibaŋo biliiho bi gújuŋo, ñantaalibehu Yensa ammiihem anyéj: - Inini, beeraŋ gúsiibane k'ídek íjoonindomiŋ guyaahálahu gújunkintor?

¹³ Angu banlóbi nim, abúuñ ñantaalibehinem inak, ayéjeeniŋ: - Inini, ninkinan dékereŋ a saariŋo. Guŋayeŋ hadéko, urakánaŋ ingi údiigeen úduk n’adoohuna koluhuno k'ayikne baaruŋo. Gúfegemeŋ utifilinemeŋ baman a dígo n’adékehne.

¹⁴ Gúputeŋ na, umiihileŋ ulaameku dígo k’úyejemeŋ, «Arafankint abúuñurne mint. Ayéji ujellihin mint gufaco g'adékimehne ba guyaahálahu gu gújuŋo ingi ñantaalibehinem.»

¹⁵ Inini, umiihuleŋdir, údiigeeno úmár ajellihinkunoonuŋ gufac gúde a raafo. Úfekineŋ na honjoŋo nip n'apare. Na gísiibane k’újoonineŋ guyaahálahintor.

¹⁶ Angu Yensa balóbi nim mees, ñantaalibeŋo inako andék. Bampút a saariŋo anlahun nip iniman ni Yensa alóbne. Angu anjóonin guyaahálahu gújuŋo k'aŋŋoolin imbi Yensa.

¹⁷ Bugaanigo, úmár ingi ñantaalibehinem haalaŋo ingi inako ankokay ba a dígo nómár. Bampút, andék a gufaco gu raafo.

¹⁸ Baŋŋay guyaahálaŋo, Yensa ayéjeeniŋ: - Ingah! Janteneŋ baŋ k'íteekinoonuŋ marigeno: Mintor maŋ n’innoohoonuŋne guyaahálaŋo tu, ayikhineh úmánduk m’adékehne gujuliyahu bigokum.

¹⁹ Balóbi nim abemeeniŋ dáde k’ammikem úmánduk úmánduk ayéjhem: - Kodi me gireŋ eh?

²⁰ Ayéjeeniŋ: - Ingah! Ninkinan haalaŋo ingi inako m’unooheŋne nanka, úmár umomiye ingi mintor n'aŋay bupocilahinku úmbuuro k’anumun a basooreno ingi me.

²¹ Fégeŋ baŋ, maŋ ni añaañaane a Hañaañeno, maŋ nim Údiigeeno M'acaabenaane gadékehne biniiroŋo, kanda wúuro m'ajuliyahánehne bigokum, úmár ayokáneh fanfaŋ. Haman bosiiraher akohi.

Gufoolaŋo gu Gulentálahu Biniirohu Yensa

²² F'aŋŋane guyaahálaŋo Yensa adooh úmbuuro k'aramun Díino. Baramuni Díino mees, afac k'anéer ñantaalibehinem ayéjeeniŋ: - Úmbuuro inno n’ófekeŋne arinkum. Kábáreŋ!

²³ Bankábi úmbuuro mees, Yensa adooh gulandáku baaruku reseŋo k'aramun Díino. Baramuni Díino mees, anéereeniŋ anruuh moŋon moŋon.

²⁴ Banruuhi mees, ayéjeeniŋ: - Inini, baaruku reseŋo imba b’ófegeŋne, muhenkum m'akimbihinehne gúlobo gu Díino ambénnayne angu ingi ñanraagofoŋo m’anfiyumne Yensa. Ingah! Muhenkum ahuphunuh ba bajónku jamaŋ ñanlabahi.

²⁵ Ninkinan, janteneŋ baŋ k'íteekinoonuŋ marigeno: Afúrumi gub, difak iruuh baaruku reseŋo fo daman d'erukunehne bawunkulo a maasayahu Díino n'adék adékirehne. Nim Yensa alóbne.

²⁶ Afúrumi na, ankím gúkim ba buramunku Díino k'ankir anfúr andék a Montaaño Olifo.

Ka Yensa ayéjne maro Piyer añophuneh maro apájulempájul

²⁷ F'aŋŋane hadéko, Yensa ayéjeeniŋ: - Ninkinan nip, uhoobálahunumuŋ. Aji úfegeŋ ípájuli hómár, maro nim gaññaañne a Hañaañeno. Aññañaañ na maro Díino ayéjyej: Ikankáneh ki ukooño abujaa. Ikandir nim, saahaŋankánam anfisayhineh. Nim gaññaañne.

²⁸ Kanda ninkinan, ikengunaadir a biniiroŋo, ídekhineh ba a didiirahu Galile ídek ítuyoonuŋ bim.

²⁹ Yensa balóbi nim Piyer ayéjem: - Ingah! Me, haani índukoŋo nip anhoobálaho, me dikaan nim.

³⁰ Yensa ayéjem: - Janten baŋ k'íteekino marigeno: Maŋ jaketo no gub uñophuneh f’ábár halall búyejo pájiirum. Nim gúdekehne bukaano. Uñopdir f’ábár halall, rankuluŋo ahonkáneh waasaŋ anakaŋ.

³¹ Fo Yensa alóbne nim Piyer amincin balóbo ayéjem: - Me, haani iñantay iniiro ingi fi diñop búpájihen! Piyer balóbi nim ñantaalibeŋo índukoŋo nip aŋŋoolinkin gúlokunom.

Salihu Yensa Getsemane

³² Afúrumi na, Yensa ingi ñantaalibehinem andék a kantígo k'aretuhne Getsemane. Bampút, Yensa ayéj ñantaalibehinem: - Noohoreŋ nanka k’útuyomuŋ k'ídek isaliher.

³³ Balóbi nim adooh Piyer ingi Jak ingi Saŋ k'aŋŋáábinem ambááhála hotir. Bampút, hafithu Yensa nooroŋ k'ahaarah, adéwun dáde.

³⁴ Yensa ayéjeeniŋ: - Me inho aléerumeemleerum dáde. Baléero imba gadékehne bubujhum. Inini, noohoreŋ nanka, dahu úduufoŋ.

³⁵ Balóbi nim, apádála hotir k'asali. Aruŋa k'akiina Díino aji apirenkineh apahánam a kunyoho k'ayikhinemne.

³⁶ Ayéjem: - Abó! Bááhum! Fi uhathat hogurumaareŋ. Inini, bonkerer, pahálineem a kunyoho kúmár. Kanda neŋen neŋen gamíirne, dikaan ho me ísiibane, fo aji ikaani ho fi úsiibane.

³⁷ Yensa basalihi nim mees, akeng aŋoolin bi ñantaalibeŋo ilallo angune. Alahuneeniŋ n'andúuf. Ayéj Simon Piyer: - Simon! Horaŋ? Sínduuf? Pirendo k'uning buruhu waat amánduk?

³⁸ Ninkinan, ningereŋ k'ukiinahaŋ Umuyhintor ki dahi Iblisa adéker aríf guŋanhánan a hójondoŋo. Jamméejhu uraagofoŋo gahaamiyehaami saliŋo kanda arino gamenuhemenuh.

³⁹ Báyeji nim, Yensa afak adék abááhála hotir ba saliŋo. Bapút, afak akiina Umuyhintor iniman n'akiinaherne faliiho, ayéji: - Abó, fi uhathat hogurumaareŋ. Inini, bonkerer pahálineem a kunyoho kúmár. Kanda neŋen neŋen gamíirne, dikaan ho me ísiibane, fo aji ikaani ho fi úsiibane.

⁴⁰ Bakiinay nim afak aŋoolin adék alahun ilallo n'andúuf. Agida ni sínduufo alaheeniŋ dáde. Agefiyeeniŋ. Banningi, ankota sii maro anrohroh dáde.

⁴¹ Angu Yensa adék akiina Díino iniman n'akiinaherne guliguliiho ingi a gunakinno. Babollay, afak aŋoolin alallin k’alahuneeniŋ n'andúuf, ayéjeeniŋ: - Ninkinan faka sínduuf ingi guyohála? Ingah! Waato abábár. Anjuliyajuliya bigoku Údiigeeno M'acaabenaane. Inini a halaku immi jínuboŋo gigune.

⁴² Kengereŋ k'índek inrahálineeniŋ. Ingah, wúuro m'ajanfaheemne apútriput!

H’awusunane f’andékne gulaku Yensa

⁴³ Angu, fo Yensa aŋane balóbo Judas apútor, Judas m'atohne ingi ñantaalibeŋo haalaŋo ingi inako. Jamaŋo jup aŋŋáábintemne n'anlah basandiŋo ingi jigoloŋo. Agida ñanlaameku alimaamaŋo ingi ñankeekihu Hañaañeno ingi ñanlaamero ambúuñureeniŋne.

⁴⁴ Agida, wúuro m'ajuliyane bigoku Yensa n’anyennehinay fam ingi immereŋ n’anyitorunkunehne Yensa. Ayéjeeniŋyej: «Inini gímputoŋ n’ukankánaŋne k’uyitemeŋ agune me, iramaymiŋdir, ífoonaymiŋdir, úpájuláŋ maro maŋ úmár, k’ukolomoŋ k’ulahamaŋ hóbun k'údekiremeŋ.» Nim Judas atéekineeniŋne fam.

⁴⁵ Angu jaketo nómár, Judas f'apúturne ka Yensa ingi ñantaalibehinem angune, awaliŋ Yensa k’aramam afóonom ayéj: - Arafaŋ!

⁴⁶ Fo Judas akanne nim, m’aŋŋáábintemne andék anlah Yensa.

⁴⁷ Banlahem, ayik úduk m'adék afúnn busandihinem k'adék imbi údoolhu alimaamo adénno alek bulaahánam.

⁴⁸ Angu Yensa, bafégi jamaŋo m’andékirne bulakánam ayéjeeniŋ: - Ii ninkinan, hóge me urifa? Horaŋ akanne udooroŋ ingi basandiŋo ingi jigoloŋo ba bulakum?

⁴⁹ Agida gucum gucum úfegemuŋ a Jaameŋo Adénno n’ídekeh gukawandino? Kanda lahurumuŋ na. Inini, upireneŋ ulahaamuŋ maro inho añaañaañaañyer. Aññañaañ a Hañaañeno maro hómár ayikhineh maro údekikineŋ úduk ulahamuŋ.

⁵⁰ Angu banlahi Yensa, ñantaalibehinem nip ambénn na Yensa k'angír.

⁵¹ Ayikyik uhambaani m'atifilinne Yensa m'agéena tabén ba bareŋ. Anfak anlaham.

⁵² F'anlahemne, abénn maŋ na tabénkinem k'agír maŋ n'abosumaane.

F’andékurne Yensa a Tilibinaalo Adénno

⁵³ Angu andékur Yensa imbi alimaamo adénno. Bampút, anlahun na ñanlaameku alimaamaŋo ingi ñanlaamero ingi ñankeekihu Hañaañeno, immereŋ nip m'antohne a tilibinaalhu Ñanyahudo.

⁵⁴ F'andékuremne, Piyer atifilineeniŋ a mángáár f'adék apút a buteerehu alimaamo adénno. Bampút, Piyer adék anooh a kuulo k'aŋŋay bígetaŋo ingi ñammi básedeŋo m’annoone na.

⁵⁵ Afúrumi na, ñanlaameku alimaamaŋo ingi m'antohne a Tilibinaalo Adénno nip m'anrahne na ansíiba gúneku Yensa kayúulen ki nim ampiren ambujom. K’angu ammiiheh jamaŋo m'anyéjhinehne Yensa akankaan hójondoŋo. Kanda yikireŋ m’anlóbhuneh nim.

⁵⁶ Agida ayikyik ñanlabahi m'ankeng k’ansíiba bujodanku Yensa, kanda halókánin raháraŋaŋ.

⁵⁷ Ayikyik m’ankeng bujodanku Yensa, anyéj:

⁵⁸ - Mint ii iyennehinmiŋyennehin n'ayéjne ba bukoomunku Jaamehintor Adénno n’anlódne, k’anooh ásibaŋ alallaŋ k’alód adúk no jamaŋo danlód.

⁵⁹ Kanda banlóbi nim índukoŋo yennehinayreŋeŋ.

⁶⁰ Banlóbi, alimaamo adénno akeng a sígihu jamaŋo nip k'ayéj Yensa: - Inini, immi tu kayúulen k’anfégne a binankan, inini fi dujaabi?!

⁶¹ Yensa akota sii. Jaabiirem haani gúlob úngonduk. Angu alimaamo adénno amiihem ayéj: - Hóge fi ingine Umaasaŋo Mu Díino Acaabenne, Úbáku Díino N'aramunkuhne?

⁶² Yensa aŋoyindem ayéjem: - Me ingine maŋ úmár. Inini, ninkinan nip ayikhineh bísiba b’úpájul b’úfekineŋ Údiigeeno M'acaabenaane n'annooh ingi Díino. Oo! Anokuneh a jiyaku Díino N'afaŋumne N'ayik Sembeŋo, a kantígo k'abúuñahuhne. Úfegekinemeŋ n’adékireh a hakubo k'aŋooliner ba a duniyaŋo.

^63-64 Yensa bayéji nim, alimaamo adénno anuyom dáde k’alah gusolhunom g’akaanane faŋo k'abic k'ayéj: - Inini ninkinan, yennehineŋ baŋ! Asutunsutun Díino! Síibaaroŋ ki úduk aséediya. Eke ninkinan tu uyennehineŋyennehin h'ayéjne? Angu ninkinan, ii, neeraŋ gúyejeŋne? Angu ñamhu tilibinaalo nip ankomb búyejo: - Abábár abujaa.

⁶⁵ Banleki balóbo mees índukoŋo ankomb bulotunkunom. Índukoŋo annébem k’ammibem. Bammibem, ammaham, anyeefihem, ammikem: - Inini, hantaŋ amalenne? Afúrumi na, ñammarahu Jaameŋo Adénno andoohom ki immereŋ mees ammaham.

Fo Piyer añopne maro apápájul Yensa

^66-67 A waato nómár angu, n'andékurne Yensa a raafo, Piyer awonn bim a réeŋo a buteerehu alimaamo adénno. F'agune na, údool udikaam mu alimaamo adénno apútor adék alahunar Piyer na bígetaŋo. Bapútri akorosom dáde. Bakorosemkoros ayéjem: - Eke fi mees ingi Yensa unasareto gukokayheŋne?

⁶⁸ Udikaamo balóbem nim Piyer añop ayéjem: - Me me, pájiiri h'ósiibane balóbo. Balóbi nim, afúrum a búkáku dígo adék awonn a burukumbaano. Bakaani nim rankuluŋo ahooŋ.

⁶⁹ Kanda fo Piyer abááhulane hotir, udikaamo atifem adék alahunam k'ayéjeh a sígihu jamaŋo: - Ummu mees atohtoh ingi úmár!

⁷⁰ Udikaamo balóbi nim, Piyer afak añop. F'añopne, jamaŋo m'angune na anyéjem: - Ingah! Afefer fañ maro fi imbi úmár gutohne. Eke fi mees ummu didiirahu Galile?

⁷¹ Banlóbi nim, Piyer akalireeniŋ ayéj: - Wolahi ingi Díino! Pájiiri údiigeeno m’úyejheŋne.

⁷² Balóbi nim, rankuluŋo afak anakin ahooŋ. Fo rankuluŋo ahooŋne, Piyer alentála ho Yensa adék atéekinemne fam. Ayéjemyéj: «Uñophuneh f’ábár halall maro pájiirum. Rankuluŋo ahonkáneh wayaasaŋ anakaŋ a diñophon.» Angu Piyer balentálay hómár akomb jihooŋo.