Injilo No Mak 13 - Gúloku Díino

Ka Yensa alóbne a gubaarhu n’ankoomunkunehne Jaameŋo Adénno

¹ Afúrumi na, Yensa baŋay gúfuro a Jaameŋo Adénno, utaalibehinem úduk ayéjem: - Arafaŋ! Ingah jaameŋo inno n’ajónne. Ninger baŋ bifilerenku bawaalo b’anlódumne n’ayaaŋne ajóon buning!

² Yensa aŋoyindem ayéj: - Úfefeg dígo inno n'afuuhne inini? Ingah! Ayikhineh bísiba, jamaŋo andékekineh anfili nip f'adék akaan bujunoob. Nim gankankánehne.

Kadéthu duniyaŋo

³ Angu Yensa andékdek ingi ñantaalibehinem ba a Montaaño Olifo. Yensa baŋafi anooh k'apiren aŋŋanden Jaameŋo Adénno. Bannoohiinooh, Piyer, Jak, Andáre andak anyéjem: - Inini, dókulo k'ínfegayoŋ. K'angohula hotir. Bangohulay hotir anyéjem:

⁴ - Eke úyejyej anfilihineh Jaameŋo Adénno? Inini, ísiibáámiŋsiib k'úteekin mint da hómár ayikhinehne. Ingi faka, mint ísiibáámiŋsiib k'úteekin mint tamaseero n'ídekeminne búfego ki nim ípájulmiŋ maro hómár atéejariteeja?

^5-6 Bammiihem nim Yensa ayéjeeniŋ: - Ninkinan, káánunteŋ ki biki wúur adéker ajodoonuŋ a gubaarhu d'eŋoolinekinehne a duniyaŋo. Ayikhineh ñanlabahi m'anyéjhinehne: «Me ingine Umaasaŋo Mu Díino Acaabenne!» Anjodhuneh ñanlabahi, kanda mimim dahu ujahárineeniŋ.

⁷ Guyennehineŋ biñaamo imbe bim, dahu údewuneŋ. Gantengahoonuŋ maro biñaamo ayikhineh, dahu údewuneŋ. Hómáráŋ nip ayikhineh kanda agidaháneh ni kadéthu duniyaŋo n'aroŋ.

⁸ Jandiŋ duniyaŋo badétum, siyeŋo añaamháneh ingi adíinem siy. Maasa añaam ingi adíinem maasa. Didiiraŋo ayindina fo akimbula bilabahi. Kúugo alaba. Agida hómáráŋ nip upiren úmiirinahin ingi banuyonku udikaamo baliiho ba guŋano.

⁹ Kanda ninkinan, káánunteŋ! Anlakunoonuŋ k'andékuroonuŋ ba a tilibinaalo. Ammahunoonuŋ a jaameŋeŋo. Andékukunoonuŋ imbi ñammaasaŋo ba kitiŋo. Ankankunoonuŋ inho nip a gubaarhu n'ufiyumemuŋne. Díino abénnhineeniŋ k'ankaanoonuŋ hómáráŋ k'upireneŋ úseediyahamuŋ.

¹⁰ Kanda ninkinan, jandiŋ duniyaŋo badétum, siyeŋo nip aññantay anyennehin Kúmbuuñaamo Kúnsuuminno.

¹¹ Ganlahoonuŋ k'andékuroonuŋ a tilibinaalo, dahu uwoseneŋ a gubaarhu n'uñantaheŋne úloboŋ na. Úputoŋdir, moŋon moŋon a tilibinaalo, Jamméejhu Díino Jarenninno gadékehne bujellihinken n'údekehne balóbo. Gatéekinen úlob maŋ hómár, maro a waato nómár Jamméejhu Díino Jarenninno gadékehne gunohálinku jamméejhen, ki jámár alób a gubaarhu fi.

¹² Ayikhineh waat n’adékekinehne n’ópájul jamaŋo anjuliyaháneh agofonku índoonenenkinin imbi m'anhaceemne, ki immereŋ ambujeeniŋ. Bááháŋo mees ankankáneh nim imberenkinin. Jaraaho ankúbulaháneh ankaan hómár mees ñamboshánin.

¹³ Jamaŋo mi duniyaŋo nip anhachunoonuŋ a gubaarhu n’ufiyumemuŋne. Kanda moŋon moŋon alahne aliŋ bufiyunkum, Díino apahánkánam.

Fo Yensa atengane duniyaŋo

¹⁴ - Angu andokuneh h'ayéjuhne Ho Díino Afaŋunumne N'afoy. Andoohodir mees, anninkhinem a kantígo ka ñantaaraŋne aguy. Gúfegeŋ gúmár, úgireŋ kantígo kámár. Inini, ninkinan m'uŋayeŋne karaŋo, wosenteŋ hóbun k'úpájáláŋ h'ésiibane balóbo. Jamanku Júde ganfégi hómár, aññantay angír anfúr a bukooro andék ba a montañaŋo ki nim ampahun ñankindenkinin.

¹⁵ Bísibáŋo bímár, m'angune a guñoono gu teraaso biki aŋŋan a gufaco ba budoku bayakánin, angír maŋ fam.

¹⁶ M'angune a kanaŋaŋo, mim mees, biki aŋŋoolin a dígo ba budoku bayakánin. Angír maŋ fam.

¹⁷ Ásibaŋo ámáráŋ, indikaamo m'angune ingi badooŋo ingi m'ambááhánáhne jaraaho anyokáneh fanfaŋ.

¹⁸ Kiinareŋ Díino ki dahi hágírhinan alihahin ingi waathu ñufunaŋo, maro waato nómár hágiro gupahunku ñankindenkinan aléerhineh.

¹⁹ Úpájuleŋ, waato nómár, jamaŋo anyokáneh dáde. Kunyoho kúmmár k’adékekinehne afankáneh kunyoho k'ayikne fam nip. Biriman waato no Díino ayabne duniyaŋo yikahadaŋ kunyoh k’ammiirhinehne ingi kunyoho k’adékekinehne. Kunyoho kúmmár awusunadir, dafak ayik kúnduk k'ammíirhinehne nim.

²⁰ Agida káriman fam Umuyhintor ayéjyej adék ataahihineh waathu kunyoho kúmmár. Aji nim gireŋer, jamaŋo nip andék ankoomhuneh. Agida Díino ayikyik jamaŋ m'acaaben a duniyaŋo inno. Gúmár akanne ayéj ataahihineh waathu kunyoho mara síibaaraŋ ki jamankánam anyoh.

²¹ Angu inini, aji wúur ayéjen: «Ingah! Umaasaŋo Mu Díino Acaabenne umomiye!» Wola ayéjen: «Umaasaŋo Mu Díino Acaabenne ummo beŋen!» dahu údom h’alóbenne.

²² Jamaŋ ñanlabahi andékekineh k'anyéjoonuŋ: «Ingah! Me igune Umaasaŋo mu Díino Acaabenne!» agida bujodhánan gaŋŋane. Ayikhineh mees m’andékekinehne k'anyéjoonuŋ immereŋ anabiyoŋoŋ, k'ankaanah tamaseereŋo, ankaanah h'alaaloonuŋne ki nim ampiren anjodoonuŋ. Anrifhineh gujodhu jamaŋo mi Díino acaabenne, kanda dampireneeniŋ.

²³ Angu inho h'éloboonuŋne nip, hómár adék ayikhineh. Gúmár akanne iŋayoonuŋ busaaraŋo bandór, k’íyejoonuŋ ninkinan moŋon moŋon úkáánum dáde ki dahu ufiyumeeniŋ.

Guŋoolinku Údiigeeno M’acaabenaane a duniyaŋo

^24-25 Kanda waato nómár awusunadir: Bísibaŋo dayaaŋ, júuno amurihineh, bahúuro anenekineh. H'agune a raafo ayindinaháneh.

²⁶ Hómár tu ayikdir, jamaŋo anfékineh Údiigeeno M'acaabenaane n'adékirehne. Anfékinem n'adékirehne ingi hakubo ingi sembe ingi bafuuh báde ingi leerhu Díino.

²⁷ A waato nómár Údiigeeno M'acaabenaane abúuñhuneh maleekaŋaŋo beŋen beŋen a duniyaŋo, k'andék tonkoŋ ingi tonkoŋ buhuyhu jamaŋo mi Díino acaabenne k'andék andak anjógun kantíg ínkánduk. Hómáráŋ nip ayikhinehne.

²⁸ - Kanda ninkinan, ningeŋ baŋ sifigo n'akaanahne k'ulinnamaŋ na honj: Eke mintor, munfigo ganreebi, ímpájuloŋ maro waathu gúduhuno ŋantindeŋ?

²⁹ Angu maŋ nim ganik aguyhunehne a waato no duniyaŋo adéthinehne. Gúfegeŋ baléero b’élobne, úpájuláŋ maro waato no me, Údiigeeno M'acaabenaane, iŋoolinekinehne a duniyaŋo ŋantindeŋ. Oo úfegeŋdir honjoŋo h’élobne, me n’idas burukumbanku duniyaŋo.

³⁰ Janteneŋ baŋ k'íteekinoonuŋ marigeno: Jamaŋo m’angune a jamaano nómár n'ílobohne andék anfékineh hómár nip.

³¹ Ingah! Raafo ingi réeŋo, hómár abayihineh, kanda ayikyik ho dabayahar. Hómár agune balókum.

³² Agida wúur pájiireŋ da hómáráŋ ayikhinehne. Yikireŋ m'apájul. Muy maleekaŋaŋo, muy Úbáku Díino, yikireŋ m'apájihinehne da hómár ayikhinehne. Bááhum Díino bareŋ apájulne.

³³ Gúmár akanne íyejoonuŋ úkáánumáŋ dáde. Dahu úduufoŋ maro pájiiroŋ da hómár ayikhinehne. Pareereŋ unoohoŋ na!

³⁴ Inini, túyoreŋ k'ímiirinahindoonuŋ guŋoolinkum a duniyaŋo ingi inho: Ayikyik ulaameku díg m'apare hadék mandéka. Kanda badékum anéer ñandóolhánom moŋon moŋon doho. Ayéj umarahu burukumbaano amara burukumbaano hóbun, biki adúuf. Babollay adék adoona kanda lóburoŋ d'aŋoolinekinehne.

³⁵ Nim guŋoolinkum a duniyaŋo amíirhinehne. Gúmár akanne íyejoonuŋ, uningeŋ k'upareheŋ unoohoŋ na, maro pájiiroŋ da ulaameku dígo aŋoolinekinehne. Karo aguy gu bugaanig, karo aguy gu báhánd, karo aguy bi harennaam, karo aguy gu tápár. Dúpájuláŋ. Amumbhuneh ñanlabahi,

³⁶ kanda biki amumboonuŋ. Dajóon k'ilahuntoonuŋ n’uŋayaŋ sínduuf.

³⁷ Ŋayri gúteekinku ninkinan ba bareŋ. Ninkinan ingi jamaŋo índukoŋo mees giŋane gúteekino. Ningereŋ k'upareheŋ unoohoŋ na!