Injilo No Mak 10 - Gúloku Díino

Kawandhu Yensa a nintiku bajaho

¹ Afúrumi na, Yensa ingi ñantaalibehinem anfúrum kantígo kámár k'andék f'andék ampút a didiirahu Júde. Bampút resiyoŋo nómár ankir anjuc jakanku Joodan. Banlibilay, jamaŋo jup andéker anjóg na. Angu Yensa atoŋ gukawandinkinin iniman n'akaanaherne fam.

² Ayikyik ñanfarasiyaŋ índukoŋ m'andéker, agida n'ansíiba gúnekinem kayúulen. Angu ammiihem anyéjem: - Hóge luwaŋankintor a nintiku bajaho anéneer údiigeeno binaal bi gúfunnhu udikankánam bajaho?

³ Bammiihem nim Yensa ajaabiyeeniŋ ayéjeeniŋ: - Inini, Taala Anabila Musa, luwaŋaŋo n'anéeroonuŋne, neeraŋ gayéjne a nintiku hómár?

⁴ Aŋŋoyindem anyéj: - Ayéjyej maro údiigeeno apiren añaañur udikaamo kayero k'ayéjhinehne maro aleklek bajaho. Aji akaani nim, apiren ayéj udikaamo afúr a díkinem.

⁵ Banlóbi nim Yensa ayéjeeniŋ: - Aji úfegeŋ k'ayéjoonuŋ nim maro yikuroŋ bankabaŋ.

⁶ Kanda biriman guliguliiho, fo Díino ayabne honjoŋo, síibaaraŋ k'aguy nim. Aññañaañ a Hañaañeno anyéj: Ayabyab údiigeen ingi udikaam.

⁷ Aññaañ kánduk anyéj: Gúmár akanne hambaaniŋo dannoohay ingi ñamboshunom. Adékhineh ankokay ingi udikaamo m'ajahne

⁸ ki immereŋ inako anguy iniman uraagof úmánduk. Nim gaññaañne. K'angu úfegeŋfeg maro údiigeeno ingi udikaamo ganjahay, gankaanakaan iniman uraagof úmánduk. Guyroŋoŋ angu ñanraagof inak.

⁹ Angu inini, n'agune nim wúur ñantaaraŋ adék aficilahin ñanraagofoŋo immereŋ mi Díino akanne k'anguy iniman uraagof úmánduk. Nim Yensa ajaabine ñanfarasiyaŋo, k'angu andék andoona.

¹⁰ Angu Yensa aŋŋan a gufaco ingi ñantaalibehinem. F'angune na ankomb gumiihmiihinkinem a gubaarhu h'afúrumne balóbo a gúbidhu bajaho.

¹¹ Bammiihem nim Yensa ayéjeeniŋ: - Aji údiigeeno afúnni udikankánam bajaho k'adék ajah udikaam úduk, na akankaan basango.

¹² Maŋ nim mees gagune imbi udikaamo. Aji afúri bajaho k'adék ajahaa imbi údiigeen úduk, basang gakanne. Nim Yensa alóbne.

Da Yensa aduwarne jaraaho jatigilinno

¹³ Ayikyik bísiba índukoŋo andékurdekur jaraaho jatigilinno imbi Yensa ki nim alóbunduteeniŋ halakánam k'aduwareeniŋ. Kanda ñantaalibehinem banfégi ni jamaŋo andoohárne jarakánin imbi Yensa, ansekureeniŋ.

¹⁴ Angu fo Yensa afégne ni ñantaalibehinem ansekurehne jamaŋo, súumurom. Ayéjeeniŋ: - Ninkinan, buku údiigimeeniŋ hadéko a binaam. Bénnereeniŋ k'andéker! Úpájuleŋ, a maasayahu Díino jamaŋo m'ammíirne iniman jaraaho inja imme na.

¹⁵ Janteneŋ baŋ k’íteekinoonuŋ marigeno! Maŋ ni jaraaho anlókihineh Díino k’aguy umaasahánin, maŋ nim ninkinan mees uñantaheŋne úlokiyeŋ. Agi fiyundoŋ Díino iniman immereŋ anfiyumne, duŋanaharaŋ a maasayahánam.

¹⁶ Balóbi nim mees agoob wol moŋon moŋon k'alóbundutom halakánam k’aduwaram.

Ummu nááfulo

¹⁷ Afúrumi na, Yensa batuŋuli hadéko, údiigeen úduk agírumer imbeŋ. Bapútri aruŋa imbi Yensa k’amiihem: - Arafaŋo ajóoninno! Neeraŋ giñantane ikaan k'iyik kanjébo ka bandór?

¹⁸ Balóbi nim Yensa ayéjem: - Inini horaŋ akanne k'uhuyoom újooninno? Yikireŋ m'ajóon, fo Díino bareŋ ajónne.

¹⁹ Inini eke úpápájul Luwaŋanku Díino? Dahu ubuj wúur, dahu ukaan basango, dahu úseediya gúlob gu wúur kandaŋ, dahu uyaah jamaŋo, búuñaar ñamboshon.

²⁰ Bayennehini ho Yensa alóbne údiigeeno ayéjem: - Arafaŋ, íbuuñabuuña hómáráŋ nip biriman f'eroŋne wol.

²¹ Bayéji nim mees Yensa aning údiigeeno ingi bupok k’ayéjem: - Kanda ayikyik ho ufallun. Inini déker k'ujuliya kuyikhen k'unah ñanyikireŋo bakodiŋo. Agi ukaani nim, uyikhineh nááfulo arjanna. Ukandir nim mees, údeker utifilineem.

²² Údiigeeno bayennehini ho Yensa alóbne, afoñ bígikinem k'adék adoona. Hafithinem súumurom. Agida úmár uyiki nááful dáde.

²³ Údiigeeno badoonay Yensa aning ñantaalibehinem a bígir k'ayéjeeniŋ: - M'anyikne nááfulo, guŋankánin a maasayahu Díino aléleer de!

²⁴ Ñantaalibeŋo banyennehini hómár abineeniŋ tor. Angu Yensa aŋoolinkin ayéjeeniŋ: - Jarakum, ingah! Guŋano a maasayahu Díino n'aléerne yikireŋ.

²⁵ Eke ñonkomo aléerinkinem k'aŋanum a kosunku bendaŋo? Kanda guŋanku ummu nááfulo a maasayahu Díino afaŋumne n'aléer.

²⁶ Fo Yensa alóbne nim ñantaalibehinem abineeniŋ tor k'anyéjayeh: - Inini, aji guŋanku ummu nááfulo a maasayahu Díino aléeri, angu hantaŋ apirenkinehne apah a kunyoku Díino?

²⁷ F'ammiihayne nim, Yensa ayennehin aningeeniŋ k'ayéjeeniŋ: - Ingah imbi ñanraagofoŋo yikireŋ ninkaan kanda, imbi Díino yikireŋ h'aléerumem.

²⁸ Angu fo Yensa alóbne nim, Piyer amiihem ayéjem: - K'angu mint m'íbennáriminne honjoroŋo nip k'ídekermiŋ k’ídek itifomiŋ?

²⁹ Fo Piyer amiihemne nim Yensa ajaabiyem ayéjem: - Janteneŋ baŋ k’íteekinoonuŋ marigeno inno: Aji wúur abénnári díkinem, índoonenemeŋ, indimaanankánam, ñamboshunom, jarakánam, harakánam, ingi honjoŋo nip h'ayikne, k'adék bíduk a gubaarhu n'apokuneemne ingi n’asíibane gúteekinku bim jamaŋo Kúmbuuñaamo Kúnsuuminno, wúuro úmár ayikhineh baraaj.

³⁰ Díino anékinem hádigeŋo, índonkay, indimaan, nunkoŋo, jaraaho jup a gubaarhu me. Afak ajakáneh haraho jup. Te hómáráŋ nip Díino abecindikinem hoŋon hoŋon buruhu wayaasaŋ keme a duniyaŋo inno. Kanda wúuro úmár jamaŋo anféginkinem a gubaarhu n'atéekinehne jamaŋo Kúmbuuñaamo Kúnsuuminno. Haani maŋ nim, gucum tápár ayikhineh kanjébo ka bandór.

³¹ Ningeŋ baŋ ñanlabahi m'anyéjuhne anfufuuh, antiirhineh a maasayahu Díino, ki m'anyéjuhne antitiir immereŋ gandékehne gufuuho. Nim Yensa alóbne.

Gúloku Yensa Gulallinno a gubaarhu biniirohánom ingi jankenghinem

³² Afúrumi na, Yensa ingi ñantaalibehinem aŋŋay hadéko ba Jerusalem. Hadéko hámár Yensa anohnoh ki ñantaalibehinem antifem kanda n'ambenuh, ingi índukoŋo mees m'antifemne ambenuhbenuh. Angu Yensa anfak anyiirla ingi ñantaalibehinem haalaŋo ingi inako. Banyiirlay akomb gúteekinkinin h'adékhemne guyiko.

³³ Ayéjeeniŋ: - Janteneŋ baŋ! Eke ba Jerusalem giŋayoŋne jaŋafo? Inini, túyoreŋ k’íteekinoonuŋ. Ímputoŋdir, anlakáneh Údiigeeno M'acaabenaane, k’andékirem a binaal imbi ñanlaameku alimaamaŋo ingi ñankeekihu Hañaañeno. Immereŋ anlekhineh balóbo k’anyéj añantay abujaa. Angu immereŋ anyéjdir nim andékikinem imbi mi guyroŋoŋne Ñanyahud.

³⁴ Immereŋ anyeefihinem, anlotunkunom, ammahánam ñanhonjo. Ambolladir ambujhunom kanda dahankánam akengunkunuh a biniirohánom k'aŋoolin ajéb ingi bumburunku arinkinem nip. Nim Yensa alóbne ñantaalibehinem dam.

Índenno a maasayahu Díino

³⁵ Afúrumi na, imberenku Sebedi m’anretuhne Jak ingi Saŋ, m'antohne a ñantaalibehu Yensa andék anlahunam k’anyéjem: - Arafaŋ, ísiibáámiŋsiib k’ukandur mint honj!

³⁶ Banlóbi nim Yensa ayéjeeniŋ: - Horaŋ gúsiibaheŋne k'ikanduroonuŋ?

³⁷ Anyéjem: - Ikiinahomiŋ ki a waato no uguyhunehne a Maasayahan Adénno, mint ipirenmiŋ inoomiŋ a habídhen hanako, a jigondiŋo ingi a jiyaaho ba bumarahu jamaŋo. Hómár gikiinahominne.

³⁸ Banlóbi nim, Yensa ayéjeeniŋ: - Ninkinan, pájiiroŋ hóbun h'oŋayeŋne gukiinahum. Ninkinan, hóge úlokihineŋ k'uruuhoŋ a gulandáku kunyoho gu me ídekehne buruuho? Hóge úlokihineŋ k'uniirohoŋ iniman n'ídekehne biniiroŋo?

³⁹ Yensa bamiiheeniŋ nim, anyéjem: - Ílokihinemiŋ! K'angu Yensa ayéjeeniŋ: - Nim gukankánaŋne. Urukunoŋ a gulandáku kunyoho, uniirohoŋ iniman ni me iniirohunehne.

⁴⁰ Kanda yikiri binaal k'íyejoonuŋ unoohoŋ ummu a jiyakum, ummu a jigondinkum k’umarahaŋ jamaŋo. Díino ajóoninkinehne inoohumo ímár k’afúnn jamaŋo m’aññantane annooh na. Nim Yensa ayéjeeniŋne.

⁴¹ Angu ñantaalibeŋo haalaŋo índukoŋo banyennehini ho Jak ingi Saŋ ankiinane Yensa, súumáreeniŋ.

⁴² K'angu Yensa ahuy ñantaalibehinem nip k'ayéjeeniŋ: - Ninkinan! Fégeŋ baŋ, eke úpájuleŋpájul n’amíirne a duniyaŋo inno. M’anyéjaa seefeŋo ingi ñammaasaŋo ingi índenno mi duniyaŋo inno ampokunpokun gujellihinku jamaŋo sembehánin.

⁴³ Kanda ninkinan mungu, dahu úduk ukaanaŋ nim. Moŋon moŋon asíibane guguyhu wúur úde a binanan añantay alóki k’aguy úsokánan.

⁴⁴ Ingi fana, aji a binanan wúur asíibay k'aguy ulaamekinan, añantay alóki k'aguy úsoku jamaŋo nip.

⁴⁵ Maŋ nim ganik agune imbi Údiigeeno M'acaabenaane. Úmár dékirireŋ ba gukanku jamaŋo k'andóolurom. Adékridek ba búdooluku jamaŋo. Aniirohuneh ki biniirohánom afakun kunyoku jínubonku ñanlabahi ki Díino apahuneeniŋ.

Da Yensa ajébunne Batimeyus m’apímne

⁴⁶ Afúrumi na, Yensa ingi ñantaalibehinem andékum a bukooro b’aretuhne Jeriko. Agida jamaŋo m’aŋŋayne búŋáábinkinin anrumunrumun tip. Angu baŋŋay gúfuro a bukooro, agida ayikyik ukiinahu sada úpimi m'anooh a bakaranku binaalo. Úmár úbáku Timeyus m'aretuhne Batimeyus.

⁴⁷ Angu, Batimeyus, f'ayennehinne maro Yensa mu bukoku Nasaret aŋane guwusunaŋo, apeej ahuyom ayéj: - Yensa! Fi, m'úfuruntne a muhenku Dawuda! Yiker bankabaŋ a binaam!

⁴⁸ F'alóbne nim, jamaŋo jup ansekirem akota. Kanda Batimeyus lókiireŋ k'afaŋunum n'apeejeh ayéjeh: - Fi, m'úfuruntne a muhenku Dawuda, yiker bankabaŋ a binaam!

⁴⁹ F'alóbne nim mees, Yensa ayennehin k'awonn ayéj: - Huyulomoŋ! Angu anhuyurom anyéjem: - Ingah! Waanint bulaahan! Kenger! Ahuyenhuy.

⁵⁰ Bayennehini hómár, asoŋsoŋin jankengo k'adaabun tabéno t'agáágane k'adék imbi Yensa.

⁵¹ Bapúti, Yensa amiihem ayéjem: - Inini, horaŋ gúsiibane k'ikanduro? Úpiminno aŋoyindem ayéjem: - Arafaŋ, ísiibáásiib k'ukaanaam k'ining!

⁵² Yensa ayéjem: - Iyoo, inini upiren údek. Újebjeb a gubaarhu n'ufiyumeemne. Fo Yensa alóbne nim, úpiminno ahar aning k'akomb butifilinkinem a binaalo.