Lévanjil Jan 7 - Lévanjil Jan

Frè Jézi pa ka krè an li

¹ Aprè sa, Jézi té ka maché toupatou Galilé; I pa té lé alé Jidé, piski dòkò jwif-ya té ka chaché tchwé li.

² Atò, lafèt Ajoupa jwif-ya té ka proché.

³ Frè Jézi di li: “Alé Jidé, lésé Galilé, pou to disip wè sign Bondjé to ka bay.

⁴ Pésonn pa ka séré sa li ka fè, si i lé moun konèt li. Piski to ka bay sign Bondjé, fè fason pou tout moun wè l.”

⁵ Atò, frè Jézi menm pa té ka krè an li.

⁶ Jézi di yé: “Mo tan pòkò rivé, mé pou zòt, tan-an toujou bon.”

⁷ Moun latè pa pouvé rayi zòt, mé yé rayi mo piski mo di yé, sa yé ka fè mové.

⁸ Zòt pouvé alé *lafèt Ajoupa, mo menm péké alé, piski mo tan pòkò rivé.

⁹ Aprè sa palò-a, li rété Galilé.

Jézi alé an lafèt-a

¹⁰ Mé lò so frè-ya pati pou lafèt-a, san pésonn savé, Jézi alé osi, li alé an sigré.

¹¹ Dòkò jwif-ya té ka monté désann ka chaché li annan tout lafèt-a, é yé té ka di: “Mé a koté li fika?”

¹² Annan bann moun ki té la, i té gen moso wichiwichi ansou do Jézi. Roun ran té ka rélé: “A roun bon jan moun.” Ròt-ya té ka di: “En-en! A kouyonnen li ka kouyonnen tout moun.”

¹³ Mé pésonn pa té ka palé fò ansou Jézi, piski tout moun té pè dòkò jwif-ya.

¹⁴ An mitan simenn lafet-a, Jézi alé annan légliz jwif-ya, é li koumansé palé.

¹⁵ Jwif-ya té èstébékwé, yé di: “Kouman sa wonm-an pouvé konèt tousa kichoz, alò ki li pa janmen étidyé di so lavi?”

¹⁶ Jézi réponn yé: “Li pa ganyen anyen sa mo ka di, ka vini di mo menm. Tousa mo ka di, mo risouvwè l di sa ki voyé mo-a.

¹⁷ Sa ki lé fè volonté Bondjé, ké savé si sa mo ka di-a ka vini di Bondjé, ou byen si li ka vini di mo menm.

¹⁸ Sa ka palé an so pròp non ka chaché glwar pou so pròp kò. Mé sa ka travay pou sala ki voyé li-a, a roun wonm ki vrè, li pa gen movèzté annan li.

¹⁹ Moyiz bay zòt lalwa, mé zòt pyès pa ka pratiké l. Poukisa zòt ka chaché tchwé mo?

²⁰ Bann moun-yé réponn li: “To gen roun démon annan to kò. Ki moun to wè ki lé tchwé to-a?”

²¹ Jézi réponn yé: “Mo fè roun sèl kichoz, é zòt èstébékwé.

²² Alò piski lalwa Moyiz di zòt sirkonsi tigarson (é a pa menm Moyiz ki koumansé fè sa, mé so gangan) zòt ka sirkonsi moun jou saba-a.

²³ Atò, si zòt menm pouvé sirkonsi moun jou saba san dérèspekté lalwa Moyiz, poukisa lò mo géri roun moun tout antchè jou saba-a zòt kòlè kont mo?

²⁴ Las jijé moun ansou sa zòt ka wè, mé jijé sélon sa ki jis.

Es Jézi sa Mési-a?

²⁵ Dézoutrwa moun Jérizalenm té ka di: “A pa sa womn-an yé ka chaché tchwé-a?

²⁶ Gadé, li ka palé douvan tout moun, é nou Dòkò-ya pa ka di anyen! Pitèt, yé divèt rikonèt a byen li ki Mési-a?

²⁷ Sala, nou savé koté li soti, mé lò Mési-a ké vini, pésonn péké savé koté li soti.”

²⁸ Alò, Jézi ki té ka anprann jwif-ya roundé kichoz, koumansé rélé fò é yé tandé li annan tout kaz Bondjé-a, li té ka di: “Zòt savé ki moun mo fika, é zòt savé koté mo soti! Mo pa vini di mo pròp kò, a Papa ki lavérité-a ki voyé mo. Mé zòt pa konèt li.

²⁹ Mo, mo konèt li piski a di li mo ka vini é a li menm ki voyé mo.”

³⁰ Ansou sa, bokou té ka éséyé tchenbè l, mé pésonn pa mété lanmen ansou li, so lèr pa té kò rivé.

³¹ Annan bann moun-yan bokou krè an li, é yé té ka di: “Lò Mési-a ké vini, èské li ké bay plis sign Bondjé ki sala-a?”

Yé voyé yé gard pou tchenbé Jézi

³² Dòkò jwif-ya vin savé sa moun-yan té ka wichiwichi ansou Jézi. Yé voyé yé gard pou tchenbé li.

³³ Jézi di: “Mo la ké zòt ankò pou roun tibi tan, aprè mo ké viré òbò sala ki voyé mo-a.

³⁴ Zòt ké chaché mo, mé zòt péké trapé mo, é zòt péké pouvé vini koté mo ké fika-a.

³⁵ Ansou sa, jwif-ya té ka doumandé yé konpanyen: “Koté li ké alé pou nou pa pouvé trapé l? Ès li ké alé koté nou konpatryiòt jwif-ya ka rété annan péyi grèk-ya, pou palé pou grèk-ya osi?”

³⁶ Sa li lé di, lò li ka di: “Zòt ké chaché mo mé zòt péké trapé mo, é zòt péké pouvé vini koté mo ké fika-a?”

Rounlo larivyè dilo ka bay lavi

³⁷ Dèrnyé jou lafèt Ajoupa-a, pli gran jou-a, Jézi dibout, é li rélé fò, li di: “Tousa ki swèf, vini jwenn mo, sala ka krè an mo-a, bwè.”

³⁸ A kou Liv Bondjé-a di, i ékri: “Sala ka krè an mo-a, rounlo larivyè dilo ka bay lavi, ké soti di so tchò.””

³⁹ Jézi té ka palé di Lèspri Bondjé moun-yan ki ka krè an li-a té ké risouvwè. An sa tan-an, Lèspri Bondjé pa té kò vini ansou pésonn, piski Jézi pa té kò monté annan syèl-a ké laglwar.

Bann moun-yan divizé akoz di Jézi

⁴⁰ Annan bann moun ki té ka kouté palò Jézi-a, bokou té ka di: “Vrèman, sa wonm-an, a Profèt ki divèt vini-a!”

⁴¹ Roun ran té ka di: “A Mési-a.” Ròt ran té ka rélé: “Ès Mési-a té pouvé vini di péyi Galilé-a?”

⁴² I ékri annan Liv Bondjé-a: “Mési-a ké sa désandan rwa David é li ké fèt koté rwa David té ka rété-a, annan vil Bètléyenm-an.”

⁴³ A konran, bann moun-yan té divizé akoz di Jézi.

⁴⁴ Dézoutrwa té lé tchenbé l, mé pésonn pa pozé lanmen ansou li.

Dòkò jwif-ya pa ka krè

⁴⁵ Gard dòkò jwif-ya té voyé-a, viré koté yé té soti, é dòkò-ya doumandé yé: “Poukisa zòt pa mennen Jézi ké zòt?”

⁴⁶ Gard-ya réponn: “Pésonn pa janmen palé kou sa wonm-an!”

⁴⁷ Dòkò-ya réponn: “Ès zòt lé di li kouyonnen zòt osi?

⁴⁸ Ès li ganyen roun sèl dòkò ou byen farizyen ki krè an li?

⁴⁹ Mé sa bann moun-yan pa konèt lalwa Moyiz, a moun ki gen madichon!”

⁵⁰ Mé roun di farizyen-yan, Nikodenm, ki té ja alé wè Jézi, di yé:

⁵¹ “Nou lalwa pa ka pèrmèt nou kondannen roun wonm san nou tandé l, é san nou savé sa li fè.”

⁵² Yé réponn li: “Ès to osi to sa moun Galilé? Etidyé byen sa ki ékri, é to ké wè li pa gen pyès profèt ka vini di Galilé.”

Jézi ké fanm ka tronpé so mari-a

⁵³ Aprè sa, yé tout pran chimen lakaz.