Lévanjil Jan 5 - Lévanjil Jan

Jézi géri roun wonm paralyzé

¹ Aprè sa, Jézi rimonté Jérizalenm pou roun lafèt jwif.

² Jérizalenm, òbò roun lapòt yé ka aplé “lapòt mouton-yan”, li té ganyen roun basen dilo, yé té ka aplé an lang jwif-ya Bétzata; sa basen-an té gen roun galéri ké senk ranjé poto.

³ Ansou galéri-a, roun lo moun malad té lonjé la, moun avèg, moun ka bwété, moun paralizé. [Yé té ka antann dilo basen-an roumen;

⁴ roun zanj Bondjé té ka désann tanzantan annan basen-an, li té ka roumen dilo-a. Pròmyen moun malad-a ki té ka désann annan dilo-a aprè zanj-a roumen li té ka géri. Nenpòt ki maladi té ka géri.]

⁵ La, li té gen roun mouché malad dipi trantwitan.

⁶ Jézi wè li lonjé atè-a, ansou so kabann, li té savé li té malad dipi lontan, li di li: “Ès to lé géri?”

⁷ Malad-a réponn li: “Mèt, mo pa gen pésonn pou édé mo plonjé annan basen-an lò dilo-a koumansé roumen; tan mo éséyé alé, rounnòt moun ka désann anvan mo.”

⁸ Jézi di li: “Lévé, pran to kabann épi maché.”

⁹ Mouché-a géri lanmenm; li pran so kabann, épi li maché. Atò, sa jou-a té roun jou saba.

¹⁰ Dòkò jwif-ya di mouché ki té fin géri-a: “Jòdla jou saba-a, to pa gen drwè poté to kabann.”

¹¹ Li di yé: “Sala ki géri mo-a di mo: ‘pran to kabann épi maché.’ ”

¹² Yé doumandé li: “Ki moun ki di to: pran to kabann épi maché.”

¹³ Mé mouché-a ki té géri-a pa té savé a ki moun, piski Jézi té disparèt annan bann moun ki té la.

¹⁴ Plita, Jézi trouvé l annan tanp-a, li di li: “Anprézan to géri, panga péché, pou anyen pli grav pa rivé to.”

¹⁵ E mouché-a alé di jwif-ya ki a té Jézi ki té géri l.

¹⁶ Dipi sa, dòkò jwif-ya té ka pèrsékité Jézi, piski li té fè sa roun jou saba.

¹⁷ Mé Jézi di yé: “Mo Papa ka travay jouk anprézan, mo menm osi mo ka travay.”

¹⁸ Dipi sa, jwif-ya té lé tchwé li plis ankò, pa sèlman piski li pa té ka rèspékté saba-a, mé li té ka aplé Bondjé so pròp Papa, é konran li té ka fè so kò pasé pou égal Bondjé.

Otorité Pitit Bondjé

¹⁹ Jézi palé ankò, i di: “Enren sa mo ka di zòt-a, a lavérité, Pitit-a pa pouvé fè anyen di limenn, Li ka fè renki sa li wè so Papa ka fè; tousa Papa-a ka fè, Pitit-a ka fè l osi.

²⁰ Piski Papa-a kontan Pitit-a Li ka montré l tousa li ka fè; Li ké montré l travay pli gran ki sa zòt wéy wè, pou zòt rété bouch gran louvri.

²¹ Kou Papa-a ka lévé moun di lanmò é ka bay-yé lavi, menm fason-an Pitit-a osi ka bay lavi moun i lé.

²² Papa-a pa ka jijé pésonn, mé Li bay Pitit-a pouwè di jijé,

²³ Pou tout moun onoré Pitit-a kou yé ka onoré Papa-a. Sala ki pa ka onoré Pitit-a, pa ka onoré Papa-a ki voyé li.

²⁴ Enren sa mo ka di zòt-a, a lavérité, sala ka kouté mo palò é ki ka krè an sala ki voyé mo, gen lavi pou tout tan; li pa kondannen, mé li ja pasé di lanmò a lavi.

²⁵ Enren sa mo ka di zòt-a, a lavérité, tan-an ké vini, é li ja rivé, moun mò ké tandé vwè Pitit Bondjé, tousa ki ké tandé li é ki ké krè ké gen lavi.

²⁶ Kou Papa-a sa sours lavi-a, menm fason-an Li bay Pitit-a osi gen lavi an li menm.

²⁷ E li bay Li pouvwè di jijé, piski Li sa Pitit wonm-an.

²⁸ Pa étoné zòt kò, piski tan-an ka vini tanto tanto, koté moun mò ké tandé vwè Pitit wonm-an, é yé ké soti di yé tonm.

²⁹ Sa ki fè byen ké résisité pou lavi, mé sa ki fè mal ké résisité pou kondannasyon.

³⁰ Mo pa pouvé fè anyen di mo menm. Mo ka jijé sélon sa Papa-a di mo, é mo jijman bon piski mo pa ka chaché fè mo pròp volonté, mé volonté sala ki voyé mo-a.

Témwanyaj pou Jézi

³¹ Si mo ka bay témwanyaj di mo menm, mo palò pa gen pyès valèr.

³² Mé a rounòt ka bay témwanyaj pou mo, mo savé sa li ka di di mo a lavérité.

³³ Zòt voyé roun délégasyon wè Jan-Batis, é li bay témwanyaj di lavérité.

³⁴ Mo menm, mo pa bézwen témwanyaj roun wonm, mé mo ka di sa, pou zòt pouvé sové.

³⁵ Jan-Batis té sa flanbo-a ki té limen é ki té ka kléré. Zòt tchò té kontan roun ti moman tan annan so klarté.

³⁶ Mo menm, mo gen roun témwanyaj pli gran ki sa di Jan-Batis: a bagaj mo ka fè é ki Papa-a bay mo pouvwè fè. Wi, sa mo ka fè, ka di ké montré a Papa-a ki voyé mo.

³⁷ Papa-a ki voyé mo ka bay témwanyaj di mo. Mé zòt pa jen tandé so vwè ni wè so vizaj.

³⁸ Zòt pa ka tchenbé so palò annan zòt tchò, piski zòt pa ka krè an sala li voyé-a.

³⁹ Zòt ka étidyé sa ki ékri annan Liv Bondjé-a, piski zòt ka èspéré trouvé annan li lavi pou tout tan; a li ki ka bay témwanyaj di mo;

⁴⁰ E zòt pa lé vin jwenn mo pou zòt gen lavi!

⁴¹ Mo pa ka chaché glwar moun.

⁴² Mé mo konèt zòt é mo savé zòt pa gen annan zòt tchò lanmou pou Bondjé.

⁴³ Mo vini réprézanté mo Papa, é zòt pa lé risouvwè mo. Mé si rounnòt ka vini di limenm, zòt ké risouvwè li.

⁴⁴ Kouman zòt pouvé krè, zòt ki ka kontan onoré zòt kò roun a lòt é ki pa ka chaché glwar ka vini di sèl Bondjé-a?

⁴⁵ Pa krè ki a mo ki ké akizé zòt douvan mo Papa; Mé a Moyiz ké akizé zòt; menm Moyiz-a zòt mété tout zòt èspwar.

⁴⁶ Si zòt té krè Moyiz, zòt té ké krè mo osi, piski Moyiz ékri ansou mo.

⁴⁷ Si zòt pa ka menm krè sa li ékri, kouman zòt ké krè sa mo ka di?