Lévanjil Jan 4 - Lévanjil Jan

Jézi ké mandanm Samari-a

¹ Sé farizyen-yan tandé ki Jézi té ka fè plis disip ki Jan, li té ka batizé plis moun ki Jan;

² pou di lavérité, Jézi li menm pa té ka batizé pésonn, a té so disip ki té ka batizé moun.

³ Lò sa nouvèl-a rivé annan zòrè Jézi, li lésé péyi Jidé pou li viré Galilé.

⁴ Mé ansou chimen-an, li té blijé janbé péyi Samari.

⁵ La, li rivé annan roun vil Samari yé té ka rélé Sikar. Sa vil-a té òbò roun moso latè Jakòb té bay Jozèf, so pitit.

⁶ A la pi dilo Jakòb-a té fika. Jézi té las maché, li asiz òbò pi-a. Li té bòdi midi konran.

⁷ Roun mandanm di Samari vini pran dilo. Jézi di li: “Bay mo moso dilo pou mo bwè, souplé.”

⁸ So disip té alé an vil pou achté moso manjé.

⁹ Mandanm Samari-a di Jézi konran: “Kouman? To sa roun jwif, épi to ganyen kouraj doumandé mo dilo, mo, fanm Samari. Annan sa tan-an, bonbon jwif ké moun Samari té boulé.

¹⁰ Jézi réponn li: “Si to té konèt kado Bondjé, si to té konèt moun ka doumandé to bwè-a, a to menm ki té ké doumandé li moso dilo pou to pouvé bwè, é li té ké bay to roun dilo ka bay lavi.”

¹¹ Mandanm-an di li: “Mèt, pi-a fon, é to pa gen annyen pou pran dilo-a. Sa dilo ka bay lavi-a, koté to pouvé pran li?

¹² Ès to pli gran ki nou zansèt Jakòb? A li ki bay nou sa pi-a. Li menm bwè annan l. Tout so pitit ké so zannimo bwè osi annan l.”

¹³ Jézi réponn li: “Tousa ka bwè dilo sa pi-a, ké swèf ankò.

¹⁴ Mé si li bwè dilo mo ké bay li-a, li péké janmen swèf ankò. Dilo mo ké bay li-a ké annan so kò kou roun sours dilo larivyè ki ké koulé pou tout tan.”

¹⁵ Mandanm-an di li: “Mèt, bay mo sa dilo-a souplé, pou mo pa janmen swèf é pou mo pa janmen viré pran dilo isi-a.”

¹⁶ Jézi di li: “Alé aplé to wonm épi viré isi-a.”

¹⁷ Mandanm-an réponn li: “Mo pa gen wonm.” Jézi di li: “To gen rèzon di to pa gen wonm.

¹⁸ Piski to ja pasé senk wonm, é sala to gen anprézan-an, a pa to wonm. Annan tousa to ka di lavérité.”

¹⁹ Mandanm-an réponn, Mèt, mo ka wè to sa roun profèt.

²⁰ Nou zansèt moun Samari té ka sèrvi Bondjé ansou sa montangn-an; mé zòt, jwif, zòt ka di a annan vil Jérizalenm-an moun divèt sèrvi Bondjé.”

²¹ Jézi di: “Fanm, krè mo, tan-an ka rivé, a pa ni ansou sa montangn-an, ni annan la vil Jérizalenm-an, zòt ké sèrvi Bondjé.

²² Zòt, moun Samari, zòt pa konèt sala zòt ka sèrvi-a, nou menm jwif, nou konèt sala nou ka sèrvi-a, li sa sovèr-a ka vini di jwif-ya.

²³ Mé tan-an ka vini, é li ja menm rivé, lò moun ka sèrvi Bondjé vréman, yé ké sèrvi Li annan yé tchò kou sa divèt fèt; piski a moun ka sèrvi li kon Bondjé lé.

²⁴ Bondjé sa Lèspri, é a pou moun-yan ka sèrvi li-a, ka sèrvi li annan yé tchò kou sa divèt fèt.”

²⁵ Mandanm-an di li: “Mo savé Mési-a, ki lé di Kris ké vini roun jou. Lò Li ké vini, Li ké èspliké nou tout bagaj.”

²⁶ Jézi di li: “A mo ki Mési-a, mo menm ka palé ké to la la-a.”

²⁷ Ansou sa palò-a, so disip rivé. Yé té èstébékwé lò yé wè Jézi té ka palé ké roun mandanm. Mé yé pyès pa di li: “Kisa to ka doumandé li?” ou byen “Di kisa to ka palé ké li?”

²⁸ Alò, mandanm-an lésé so ja dilo la, é li viré annan vil-a épi li di moun-yan:

²⁹ “Moun-yan, vini wè roun wonm ki di mo tousa mo fè. Ès a pa Kris-a?”

³⁰ Yé soti di vil-a, épi yé alé jwenn li.

³¹ Pandan sa tan-an disip-ya té ka forsé li manjé roun ti moso; yé di Li: “Mèt manjé!”

³² Mé li di yé: “Mo ganyen roun manjé ki zòt pa konèt.”

³³ Sé disip-ya té ka doumandé yé kanponyen: “Ès roun moun poté manjé pou li?”

³⁴ Jézi di yé: “Mo manjé, a di fè volonté sala ki voyé mo-a, é a-di fini travay li bay mo-a.

³⁵ Zòt, Samariten-yan, zòt ka di li ka rété kat mwa anvan kasé ké raché sa zòt planté. Mo menm mo ka di zòt: “Lévé zòt wéy épi byen gadé bati-a, tousa zòt planté bon pou zòt kasé ké raché yé.

³⁶ Sala ka kasé ké raché-a, li ja gen so soumaké: li ka mété frwi asou koté pou lavi étèrnèl-a; konran, moun-an ki ka planté-a, ké moun-an ki ka kasé ké raché-a, yé ka fè lafèt ansanm.

³⁷ A pou sa, dolo-a vrè: “Roun ran ka planté, ròt ran ka bénéfisyé.”

³⁸ Mo voyé zòt kasé ké raché annan bati zòt pa planté; A dòt moun ki planté annan, épi a zòt ki ka profité di yé travay.”

³⁹ Bokou Samariten di sa vil-a té krè an Jézi piski mandanm-an té di yé: “Li di mo tousa mo fè.”

⁴⁰ A pousa, lò moun Samari-ya rivé òbò Jézi, yé di li souplé rété isi-a ké nou, é li rété dé jou ké yé.

⁴¹ Li té ganyen bokou plis moun ki té krè an li, piski yé tandé li palé,

⁴² é yé di mandanm-an: “Anprézan, si nou ka krè an Li, a pa rounso pousa to té di nou-a, mé piski nou tandé li ké nou pròp zòrè, nou savé Li sa vrèman Sovèr latè-a.”

Jézi géri tigason gran fonksyonèr-a

⁴³ Dé jou plita, Jézi pati di Samari pou alé Galilé;

⁴⁴ Li menm té di, pésonn pa janmen profèt annan so péyi.

⁴⁵ Mé atò, lò Li rivé Galilé, ki té so péyi, moun Galilé byen risouvwè li, piski yé osi té alé Jérizalenm pou la fèt-a, yé té wè tout sign Bondjé Li té fè annan la fèt-a.

⁴⁶ Jézi viré Kana an Galilé, koté Li té chanjé dilo an diven. Kapèrnaòm, Li té gen roun gran fonksyonèr di rwa Eròd, so pitit té malad.

⁴⁷ Lò li tandé Jézi soti Jidé pou viré Galilé, li alé jwenn li, é li di li: “souplé Mèt désann Kapèrnaòm pou géri mo pitit ki lagoni.”

⁴⁸ Jézi di li: “Zòt péké janmen krè, si zòt pa wè sign Bondjé ké bèl bagaj.”

⁴⁹ Fonksyonèr-a di Li: “Mèt souplé, vini koté mo anvan mo pitit mouri.”

⁵⁰ Jézi di li: “Viré a to kaz, to timoun ka alé byen.” Wonm-an krè sa Jézi té di li, é li pran chimen so kaz.

⁵¹ Li té ansou chimen-an toujou, lò so sèrvitèr-ya vini jwenn li é yé di li: “To pitit ka alé byen.”

⁵² Li doumandé yé a ki lèr li santi so kò byen, é yé réponn li: “Ayè, bòdi inèr laprémidi so lafièv tonbé.”

⁵³ Papa-a rikonèt ki a sa lèr-a Jézi té di li: “To ti moun ka alé byen.” Dipi sa jou-a, li krè, li ké tout so fanmi.

⁵⁴ A dézyenm sign Bondjé-a Jézi bay Galilé lò Li viré di Jidé.