Lévanjil Jan 3 - Lévanjil Jan

Jézi ké Nikodenm

¹ Li té gen roun wonm annan farizyen-yan roun dòkò jwif yé té ka rélé l Nikodenm.

² I vini wè Jézi gro lannwit, é i di l: “Mèt, nou savé ki a Bondjé ki voyé to pou anprann nou tout bagaj; piski pésonn pa pouvé bay sign Bondjé to ka fè, si Bondjé pa ké li.”

³ Jézi réponn li: “Enren, sa mo ka di to-a, a lavérité, si roun wonm pa viré fèt, li pa ké wè rwayonm Bondjé.”

⁴ Nikodenm rété, i di l: “Kouman roun wonm ki ja vyé pouvé viré fèt? Kant menm, i pa pouvé ritounen annan vant so manman pou li fèt roun dézienm fwè!”

⁵ Jézi réponn li: “Enren, sa mo ka di to-a, a lavérité, si roun wonm pa fèt annan dilo ké annan Lèspri, li pa pouvé rantré annan rwayonm Bondjé.

⁶ Tousa ki fèt ké manman ké papa a timoun lachè, tousa ki fèt ké Lèspri Bondjé a timoun lèspri.

⁷ Pa rété èstébékwé, si mo di a pou zòt viré fèt.

⁸ Van ka vanté koté i lé, to ka tandé l souflé, mé to pa savé koté i soti ni koté i ka alé. A sa ki ka rivé tout wonm ki fèt annan Lèspri.”

⁹ Nikodenm di l: “Kouman sa pouvé fèt?”

¹⁰ Jézi réponn li: “To sa dòkò Izrayèl-a, to pa konèt sa bagaj-a!”

¹¹ Enren, sa mo ka di to-a, a lavérité, nou ka di sa nou konèt, nou ka palé di sa nou wè; mé zòt pa ka asèpté sa nou di.

¹² Si zòt pa ka krè lò mo ka palé di bagaj latè, kouman zòt ké krè lò mo ké palé di bagaj syèl-a?

¹³ Pésonn pa jen monté laro syèl-a, sòf Pitit wonm-an ki désann di syèl-a.

¹⁴ Menm fason Moyiz lévé sèrpan bronz-an ansou roun poto annan dézèr-a; menm fason-an, fo Pitit wonm-an lévé osi,

¹⁵ pou tousa ki krè an li gen lavi pou tout tan.

¹⁶ Piski Bondjé té tèlman kontan moun latè, li bay so sèl Pitit, pou tousa ki krè an li pa mouri, mé gen lavi pou tout tan.

¹⁷ Bondjé pa voyé so Pitit ansou latè pou kondannen moun latè, mé pou li sové tout moun.

¹⁸ Moun ka krè an li pa kondannen, mé moun ki pa ka krè ja kondannen, piski yé pa krè annan sèl Pitit Bondjé ganyen-an.

¹⁹ Atò, mé kouman kondannasyon-an rivé: limyèr-a vini ansou latè, mé moun latè préféré soukou-a, piski yé té ka fè sa ki mal.

²⁰ Moun ka fè mal ka rayi limyèr-a, yé pa ka proché l, yé pè li montré gran jou sa yé ka fè;

²¹ Mé moun ki kontan lavérité, ka vini annan limyèr-a, pou moun wè sa yé ka fè ké Bondjé.”

Jézi ké Jan Batist

²² Aprè, Jézi alé péyi Jidé ké so disip; i rété la ké yé, é i té ka batizé moun.

²³ Jan osi té ka batizé moun, roun koté yé té ka rélé Enon bòdi Salim; la, i té gen grodlo. Moun té ka vini la pou yé batizé.

²⁴ An sa tan-a, Jan pa té kò lajòl.

²⁵ Dézoutrwa disip Jan-an lévé roun diskisyon ké roun jwif ansou zafè pirifikasyon-an.

²⁶ Yé alé wè Jan, yé di li; “Mèt, ès to ka sonjé wonm-an to té palé nou-a, ki té ké to ròt bò larivyè Jourden-a; men i ka batizé moun, é tout moun ka alé wè l.”

²⁷ Jan réponn: “Pésonn pa pouvé pran anyen si Bondjé ki annan syèl-a pa bay li l.

²⁸ Zòt menm témwen di sa mo di; “Mo pa sa Kris-a, mé Bondjé voyé mo douvan li.”

²⁹ Pou roun wonm ka maryé, so dé grenn wéy a so fanm; mé bon zanmi wonm ka maryé-a, i la, i ka kouté l, é li kontan toubònman tandé so vwè. A konsa mo menn osi kontan toubònman.

³⁰ A pou Li divini pli gran, é mo menm a pou mo divini pli piti.

Sala ki soti laro syèl-a

³¹ Sala ki soti laro syèl-a pli gran ki tout moun; Sala ki soti di latè, a moun latè, é li ka palé di bagaj latè. Sala ki soti di syèl-a pli gran ki tout moun.

³² Li ka di sa li wè ké so wéy, li ka di sa li tandé ké so zòrè, é pésonn pa ka krè sa li ka di.

³³ Moun ki ka krè so témwanyaj, ka montré ki Bondjé ka di lavérité;

³⁴ Sala Bondjé voyé-a ka di palò Bondjé, paské Bondjé bay li tout so Lèspri.

³⁵ Papa Bondjé kontan so Pitit, é li bay li tout pouvwè ansou tout bagaj.

³⁶ Moun ki ka krè an so Pitit gen lavi pou toujou; moun ki pa ka krè an so Pitit pa ké gen sa lavi-a, mé Bondjé ka toujou rété faché ké yé.”