Lévanjil Jan 20 - Lévanjil Jan

Tonm-an vid

¹ Dimanch bonmaten, li té soukou toujou, Mari di Magdala alé bòd tonm-an é li wè yé té tiré roch té ka bouché trou-a.

² Li pran kouri alé wè Simon Pyèr ké ròt disip Jézi té kontan-an, li di yé: “Yé tiré kò Mèt-a di tonm-an, é nou pa savé koté yé mété l.”

³ Pyèr ké ròt disip-a soti é yé alé bòd tonm-an.

⁴ Yé té ka kouri ansanm, mé ròt disip-a té ka kouri pli vit ki Pyèr é li rivé bòd tonm-an anvan.

⁵ Li bésé djété ofon trou-a é li wè lenj-yan ki té vlopé kò-a té pozé atè, mé li pa rantré.

⁶ Simon Pyèr ki té ka swiv li, rivé é li rantré annan tonm-an. Li wè lenj-yan ki té vlopé kò-a pozé atè.

⁷ E osi lenj ki té vlopé tèt Jézi-a pa té menm koté, mé li té vlopé apar.

⁸ Epi ròt disip-a ki té rivé anvan, rantré annan tonm-an osi, é li wè, é li krè.

⁹ Atò, yé pa té kò ka konprann sa Liv Bondjé-a té di, Jézi té divèt résisité di lanmò.

¹⁰ Epi dé disip-ya ritounen an yé kaz.

Jézi parèt douvan Mari di Magdala

¹¹ Mari té dèrò bò tonm-an, é li té ka pléré. Pannan li té ka pléré, li panché so kò pou gadé annan tonm-an.

¹² Li wè dé zanj abiyé an blan asi koté kò Jézi té lonjé-a, roun koté so tèt té yé ròt-a koté so pyé té yé.

¹³ Zanj-ya di li: “Fanm, poukisa to ka pléré?” Li réponn yé: “Paské yé pran kò mo Mèt, é mo pa savé koté yé mété l.”

¹⁴ Pannan li té ka di sa, li gadé dèyè, é li wè Jézi dibout la, mé li pa té savé a té li.

¹⁵ Jézi doumandé li: “Fanm, poukisa to ka pléré? Ki moun to ka chaché? Li pran li pou jardinyé-a é di li: “Mouché souplé, si a to ki pran li, di mo koté to mété l, pou mo alé roupran li.”

¹⁶ Jézi aplé li: “Mari!” Li ritounen so kò é li rélé an ébré: “Rabouni!” -sa ki lé di, Mèt!-

¹⁷ Jézi di li: “Lagé mo, piski mo pòkò monté jwenn mo Papa. Mé alé di mo frè-ya mo ka monté jwenn mo Papa ki sa osi zòt Papa, mo Bondjé ki sa osi zòt Bondjé.”

¹⁸ Mari di Magdala kouri wè disip-ya é li di yé: “Mo wè Mèt-a!” E li rakonté yé tousa Jézi té di li.

Jézi parèt douvan so disip

¹⁹ Sa menm jou dimanch-an, byen ta, disip-ya té annan roun kaz, tout lapòt-ya té také, piski yé té pè Dòkò jwif-ya. Jézi renki parèt dibout douvan yé, é li di: “Mo ka bay zòt lapè!”

²⁰ E lò li di yé sa, li montré yé so lanmen ké so bò kòt. Disip-ya té kontan toubònman lò yé wè Mèt-a.

²¹ Jézi di yé ankò: “Mo ka bay zòt lapè! Kou Papa-a voyé mo, mo osi mo ka voyé zòt.”

²² Lò li fini di sa, li souflé ansou yé é li di yé: “Risouvwè Lèsprisen.

²³ Moun zòt ké padonnen yé péché, yé péché ké padonnen; é moun zòt péké padonnen yé péché, yé péché pa ké padonnen.”

Jézi parèt douvan Toma

²⁴ Toma, yé ka aplé Jimo-a, roun di douz disip-ya, pa té la ké yé lò Jézi té vini.

²⁵ Ròt disip-ya di li: “Nou wè Mèt-a.” Mé li di yé: “Tout tan mo pa wè ké mo wéy tras klou-ya annan so lanmen, mo pa mété mo dwèt annan tras klou-ya é mo pa mété mo lanmen annan so bò kòt, mo pa ké krè annyen.”

²⁶ Roun simenn pasé, disip-ya té annan menn kaz-a, é Toma té la ké yé. Lapòt-ya té také, mé Jézi renki parèt dibout douvan yé, é li di yé: “Mo ka bay zòt lapè!”

²⁷ Epi li di Toma: “Proché to dwèt isi-a, é gadé mo lanmen, proché to lanmen osi, é fouré li annan mo kòt. Arété douté, mé krè!

²⁸ Toma réponn é li di: “Mo Mèt ké mo Bondjé!”

²⁹ Jézi di li: “Paské to wè mo, to ka krè! Byennéré moun ka krè san wè.

Mé pou sa sa liv-a ékri

³⁰ Jézi bay ankò bokou dòt sign douvan so disip ki pa rakonté annan sa Liv Bondjé.

³¹ Mé tou sa ékri pou zòt krè Jézi sa Kris-a, Pitit Bondjé; é si zòt krè, zòt ké ganyen lavi an li.