Lévanjil Jan 2 - Lévanjil Jan

Roun maryaj annan vil Kana

¹ Dé jou aprè, li té ganyen roun maryaj Kana annan péy Galilé. Manman Jézi té annan lafèt-a.

² Jézi ké so disip té envité osi.

³ Atò, mé li ka manké diven; manman Jézi di l: “Yé pa gen roun sèl gout diven ankò.”

⁴ Jézi réponn so manman: “Manman, ès a ou pou di mo sa mo divèt fè? Mo lèr pòkò rivé.”

⁵ So manman di moun ka servi-ya: “Fè tousa li ké di zòt fè.”

⁶ Li té ganyen la sis ja fèt annan roch, jwif-ya té ka sèrvi pou yé té pirifyé yé kò sèlon yé koutim, oro yé chak té pouvé pran san lit.

⁷ Jézi di servitèr-ya: “Ranpli ja-ya ké dilo pi.” Moun-yan ranpli yé jouk rabò.

⁸ Jézi di: “Anprézan, pran roun ti moso dilo annan ja-ya, poté l pou mèt lafèt-a” é a sa yé fè.

⁹ Mèt lafèt-a gouté dilo ki té chanjé an diven-an. Li té èstébékwé, li pa té pouvé di koté sa diven-an té soti; mé sèrvitèr-ya ki té pran dilo annan pi-a, yé menm yé té savé koté diven-an té soti. Mèt lafèt-a rélé wonm ki maryé-a,

¹⁰ épi i di li: “Dabitid tout moun ka koumansé sèrvi diven ki pli chwit-a, épi lò tout moun byen sou, yé ka sèrvi sa ki pa djè bon-an; to menm to lésé pli chwit-a pou anprézan.”

¹¹ Mé konran Jézi bay so pronmyen sign Bondjé Kana annan péy Galilé. Li montré so disip so glwar é yé krè an li.

¹² Aprè sa, Jézi désann Kapèrnaòm ké so manman, so frè ké so disip; yé rété la dézoutrwa jou rounso.

Jézi annan kaz Bondjé

¹³ Fèt pak Jwif-ya té ka proché é Jézi monté Jérizalenm.

¹⁴ Yé trouvé annan kaz Bondjé moun ka vandé béf, mouton, pijon ké moun ka chanjé soumaké asi bòd yé tab.

¹⁵ Jézi fè roun fwè ké moso kòrd, é li mété tout moun dèrò di kaz Bondjé ké yé mouton, yé béf épi li jité atè tout soumaké moun-yan é li chalviré yé tab.

¹⁶ Epi li di moun té ka vandé pijon-yan: “Foutèlkan ké tout zòt bagaj, pa fè di kaz mo Papa roun kaz koméraj.”

¹⁷ So disip sonjé ki i té ékri “Lanmou mo gen pou to kaz, o Papa, ka boulé mo kou difé savann.”

¹⁸ Alò jwif-ya doumand l: “Ki sign Bondjé to ka bay nou pou montré to ganyen drwa fè sa to ka fè-a?”

¹⁹ Jézi réponn yé: “Enben krazé kaz Bondjé é an trwa jou mo ka viré monté l.”

²⁰ Jwif-ya di: “I té fo karant sis lannen pou monté sa kaz Bondjé-a, épi to menm an trwa jou to ké viré monté l!”

²¹ Lò Jézi té ka palé di kaz Bondjé, li té ka palé di so pròp kò.

²² A pousa lò Jézi rouvini di lanmò, so disip sonjé li té di sa épi yé krè Liv Bondjé ké paròl Jézi té ansènyé-a.

²³ Pannan Jézi té lafèt Pak Jérizalenm, roun lo moun krè an li lò yé wè sign Bondjé li fè.

²⁴ Mé Jézi pa té fouben yé, piski li té konèt yé tout,

²⁵ é piski li pa té bézwen pésonn poté témwanyaj di pésonn, li té savé tousa li té ganyen annan tchò chak moun.