Lévanjil Jan 14 - Lévanjil Jan

Jézi sa chimen-an, ka mennen koté Papa-a

¹ Jézi di yé: “Pa bizwen trakasé zòt tchò. Krè an Bondjé, épi krè an mo.

² I ganyen bokou plas annan kaz mo Papa. Si sa pa té vrè, ès mo té ké di zòt ki Mo ka alé préparé roun plas pou zòt?

³ Lò mo ké fin” préparé roun plas pou zòt, mo ké viré é mo ké pran zòt ké mo, pou zòt osi, zòt ké mo koté mo fika-a.

⁴ Zòt konèt chimen-an koté mo ka alé-a.”

⁵ Toma di li: “Mèt, nou pa konèt koté to ka alé-a. Kouman nou ké pouvé konèt chimen-an?

⁶ Jézi di li: “Mo sa chimen-an, lavérité, ké lavi. Pésonn pa pouvé alé koté Papa-a san pasé pa mo.

⁷ Si zòt konèt mo, zòt ké konèt mo Papa osi. Dipi anprézan zòt konèt li, é zòt menm wè li.

⁸ Filip di li: “Mèt, montré nou Papa-a é nou tchò ké kontan.”

⁹ Jézi di li: “Aprè tousa tan mo pasé ké zòt é to pòkò konèt mo Filip! Sala ki wè mo, wè Papa-a osi. Kouman to pouvé di: montré nou Papa-a?

¹⁰ Es to pa ka krè mo annan Papa-a, é Papa-a ka viv annan mo? Palò mo ka di zòt-a, a pa mo ka di li. A Papa-a ki ka rété annan mo-a ka fè li menm so travay.

¹¹ Krè mo lò mo ka di, mo annan Papa-a é Papa-a ka viv annan mo. Menm si zòt pa ka krè, mé kan menm krè pou travay zòt wè ki fèt.

¹² Sa mo ka di zòt-a a lavérité, sala ki krè an mo ké fè osi sa mo fè-a. Li ké menm fè pli gran bagaj ki sa mo fè-a, piski mo ka alé koté Papa-a.

¹³ Tousa zòt ké doumandé mo an mo non, mo ké fè l, pou zòt pouvé wè pwisans Papa-a annan so Pitit.

¹⁴ Si zòt doumandé mo roun bagaj an mo non, mo ké fè l pou zòt.

Jézi ka promèt voyé Sentèspri

¹⁵ Si zòt kontan mo, zòt ké pouvé tchenbé mo koumannman.

¹⁶ Mo ké pryiè Papa-a pou li voyé roun moun pou édé zòt, pou li toujou ké zòt.

¹⁷ A Lèspri lavérité-a, moun latè pa pouvé risouvwè l, piski yé pa ka wè l ni konèt li. Mé zòt, zòt pouvé konèt li, piski li ka rété ké zòt é li ké toujou annan zòt.

¹⁸ Mo péké lésé zòt kou timoun ki pa ganyen manman ké papa, mo ké viré jwenn zòt.

¹⁹ Moun latè péké wè mo lontan ankò, mé zòt, zòt ké wè mo, piski mo ka viv, é ki zòt ké viv osi.

²⁰ Lò sa jou-a ké rivé, zòt ké konprann mo annan Papa-a, zòt ké konprann osi zòt annan mo, é mo annan zòt.

²¹ Sala ka asèpté mo koumannman é ki ka kouté l, a li ki kontan mo. Mo Papa ké kontan sala ki kontan mo-a; mo osi ké kontan l, é mo ké fè l konèt mo.

²² Jida (pa Jida Iskariyòt) di li: “Mèt, poukisa to ké fè nou rounso konèt to, é pa moun latè-a?”

²³ Jézi réponn li: “Sala ki kontan mo-a, ké kouté sa mo ka di, mo Papa ké kontan l, épi nou toulédé ké vini jwenn li, é nou ké rété koté li.

²⁴ Sala ki pa kontan mo pa ka kouté sa mo ka di-a. Sa zòt tandé mo di, pa ka soti di mo menm, mé ka vini di mo Papa ki voyé mo.

²⁵ Mo ka di zòt sa pannan tout tan mo la ké zòt ankò.

²⁶ Mé mo Papa ké voyé roun moun an mo non pou édé zòt. Sa moun-an a Lèsprisen, li ké ansényé zòt tout bagaj, é li ké fè zòt sonjé tousa mo di zòt.

²⁷ Mo ka pati, mé mo ka bay zòt lapè annan zòt tchò, lapè mo ganyen-an, a li mo ka bay zòt. Mo pa ka bay zòt li kou moun latè-a ka bay li. Pa bizwen trakasé zòt tchò, pa bizwen pè.

²⁸ Zòt ja tandé mo di: “Mo ka pati é mo ké viré jwenn zòt.” Si zòt té kontan mo, zòt té ké kontan savé ki mo ka alé jwenn Papa-a, piski Papa-a pli gran pasé mo.

²⁹ Anprézan, mo di zòt tout bagaj anvan sa fèt, pou zòt krè lò sa ké rivé.

³⁰ Mo pa ké djè palé ké zòt ankò, piski Djab-a, mèt moun latè-a ka vini. Atò, pa gadé li pa ganyen priz ansou mo,

³¹ Mé mo lé moun latè savé ki mo kontan Papa-a, é mo ka fè tousa li koumandé mo fè. Lévé dibout, an nou pati di la!