Lévanjil Jan 11 - Lévanjil Jan

Lanmò Lazar

¹ I té ganyen roun wonm yé té ka aplé Lazar, i tonbé malad. I té ka rété Bétani ké so I dé sò Mari ké Mart.

² Mari, a té mandanm-an ki té vidé losyon ansou pyé Jézi é éswiyé li ké so chivé. A té so frè Lazar ki té malad.

³ Dé sò-ya voyé roun moun di Jézi: “Mèt, to bon moun malad.”

⁴ Lò Jézi tandé sa, li di: “Sa maladi-a péké tchwé li, mé sa rivé pou moun-yan wè kouman Bondjé gran, é pou montré kouman Pitit Bondjé gran.”

⁵ Jézi té kontan Mart, so sò ké Lazar.

⁶ Atò, lò i aprann Lazar té malad, i rété koté la dé jou ankò,

⁷ épi li di so disip-ya: “Annou viré péyi Jidé!”

⁸ Disip-ya réponn li: “Mèt, i pa ganyen byen lontan jwif-ya té ka chaché tchwé to annan péyi Jidé, é to lé viré laba?”

⁹ Jézi réponn yé: “I ganyen douz lèr annan lajournen-an, pa vrè? Si roun moun ka maché lajournen, i pa ka tribiché, piski li ka wè limyèr-a ka kléré moun latè.

¹⁰ Mé si roun moun ka maché lannwit, i ka konyen so pyé, piski li pa ganyen pyès limyèr.

¹¹ Lò Jézi fin” di sa, li di yé ankò: “Nou zanmi Lazar ka dronmi, mé mo ké alé lévé l.”

¹² Disip-ya di li: “Mèt, si i ka dronmi sa bon, i ké géri.”

¹³ Jézi té lé di yé Lazar té mouri, mé yé té konprann a dronmi i té ka dronmi.

¹⁴ Atò, Jézi di yé kou dilo klè ansou roch: “Lazar mouri,

¹⁵ é mo kontan toubonnman, pou zòt, ki mo pa té laba, pou zòt pouvé krè an mo. Anprézan, annou alé koté li.”

¹⁶ Toma (roun disip yé ka aplé osi Jimo-a), di ròt-ya: “Annou alé, nou osi, pou nou mouri ké li!”

¹⁷ Lò Jézi rivé laba, li anprann Lazar té antéré dipi kat jou déja.

¹⁸ Vilaj Bétani té tou proch trwa kilomèt di lavil Jérizalenm,

¹⁹ é bokou jwif té vini konsolé Mart ké Mari di lanmò yé frè.

Rézirèksyon ké lavi

²⁰ Lò Mart tandé Jézi té ka rivé, li alé kontré ké l, mé Mari rété asi annan so kaz.

²¹ Mart di Jézi: “Mèt, si to té la, mo frè pa té ké mouri.

²² Mé mo savé ki jouk atò ankò Bondjé ké bay to tousa to doumandé l.”

²³ Jézi di li: “To frè ké résisité.”

²⁴ Mart réponn: “Mo savé li ké résisité lò moun mouri ké résisité, dèrnyé jou-a.”

²⁵ Jézi di li: “A mo ka résisité moun, é a mo ka bay moun lavi. Sala ka krè an mo ké viv, menm si li déja mouri;

²⁶ sala ka viv é ka krè an mo péké janmen mouri. Es to ka krè sa?”

²⁷ Mart di: “Wi, Mèt, mo ka krè to sa Mési-a, Pitit Bondjé, ki té divèt vini ansou latè-a.”

Jézi ka pléré

²⁸ Lò Mart fin” di sa, li alé chaché so sò Mari é li di l an so zòrè: “Mèt-a rivé é li ka aplé to.”

²⁹ Lò Mari tandé sa, li lévé é li kouri alé jwenn Jézi.

³⁰ Jézi patékò rivé annan vilaj-a, mé li té toujou koté Mart té kontré ké li-a.

³¹ Jwif-ya ki té annan kaz Mari pou konsolé l, wè l lévé pati vitman é yé swiv li. Yé té krè li té ka alé pléré ansou tonm so frè.

³² Mari rivé koté Jézi té fika-a, é kant i wè l, i tonbé a so pyé é i di li: “Mèt, si to té la, mo frè pa té ké mò.”

³³ Lò Jézi wè Mari ké jwif-ya ki té vini ké l té ka pléré grodlo sa fann so tchò, é i té ganyen bokou chagren.

³⁴ Li doumandé yé: “Koté zòt mété li? Yé réponn li: “Mèt, vini wè.”

³⁵ Jézi pléré.

³⁶ Jwif-ya di: “Gadé kouman i té kontan l!”

³⁷ Mé dézoutrwa annan yé té ka di: “I fè wonm avèg-a wè klè, ès li pa té pouvé osi anpéché Lazar mouri?”

Lazar résisité

³⁸ Ankò roun fwè, tchò Jézi té ka fè li mal. Li alé koté tonm-an té fika; a té roun trou yé té fouyé annan montann-an ki té bouché ké roun gro roch.

³⁹ Jézi di yé: “Tiré ròch-a.” Mart, sò wonm-an ki té mouri-a, di: “Mèt, i divèt déja ka santi mové, piski i ganyen kat jou li la.”

⁴⁰ Jézi di li: “Ès mo pa déja di to, si to ka krè, to ké wè pwisans Bondjé?”

⁴¹ Yé tiré ròch-a. Jézi lévé so wéy laro syèl-a, é li di: “Papa, grémési piski to réponn mo.

⁴² Pou mo menm, mo savé to toujou ka réponn mo, mé mo ka di sa pou bann moun-yan ki la-a, pou yé pouvé krè a to ki voyé mo.”

⁴³ Lò li fin” di sa, i rélé fò: “Lazar, soti la!”

⁴⁴ Lazar soti di trou-a. So pyé ké so lanmen té toujou vlopé ké roun bann twèl, é so vizaj té vlopé ké roun lenj. Jézi di yé: “Dévlopé l épi lésé l alé!”

Konplo pou tchwé Jézi

⁴⁵ Lò yé wè sa Jézi té fè-a, Boukou jwif annan sa ki té vini koté Mari-a krè an li.

⁴⁶ Mé dézoutrwa annan yé alé trouvé farizyen-yan é yé rakonté sa Jézi té fè

⁴⁷ Alò, dòkò jwif-ya ké farizyen-yan fè roun gran rényon, é yé di: “Ki sa nou ké fè? Gadé tousa sign Bondjé sa wonm-an ka fè!

⁴⁸ Si nou lésé l kontinyé fè sa, tout moun ké krè an li. Epi chèf romen-yan ké vini krazé Kaz Bondjé-a é yé ké détrwi nou pèp.”

⁴⁹ Roun di yé, yé té ka rélé Kayif, ki té roun Gran Prèt sa lannen-a, di yé: “Zòt pa ka kanprann anyen tou!

⁵⁰ Zòt pa wè i miyò si roun sèl mouri pou tout moun é ki tout pèp-a sové.”

⁵¹ Atò, li pa té ka di sa di li menm, mé piski li té Gran Prèt sa lannen-a, Bondjé fè li di davans ki Jézi té ké mò pou pèp jwif-a.

⁵² A pa sèlman pou pèp jwif-a ki li té divèt mouri, a té osi pou rasanblé tout timoun Bondjé ansou latè é fè yé divini roun sèl pèp.

⁵³ Dipi sa jou-a, dòkò jwif-ya désidé tchwé Jézi.

⁵⁴ A pousa Jézi pa té ka alé vini toupatou ankò ké jwif-ya; li alé bòdi dézèr-a, roun koté yé té ka rélé Efrayim. Li rété la ké so disip.

⁵⁵ Tan-an lafèt Pak jwif-ya té ka proché, é bokou moun péyi-a té ka monté Jérizalenm anvan lafèt-a, pou pirifyé yé kò sélon yé rélijyon.

⁵⁶ Yé té ka gadé wè si Jézi té annan lakou Kaz Bondjé-a, é yé té ka di ant yé: “Ki sa zòt ka pansé? Es zòt krè li ké vini annan lafèt-a?

⁵⁷ Dòkò jwif-ya ké farizyen-yan té déja di, si roun moun té savé koté Jézi té fika, li té divèt avèrti yé pou yé té tchenbé l.