Lévanjil Jan 10 - Lévanjil Jan

Parabòl bèrjé-a ké mouton-yan

¹ Jézi di: “Enren sa mo ka di zòt-a, a lavérité, moun ki pa ka pasé pa lapòt-a pou rantré annan pak mouton-yan, mé ka janbé baryèr-a rounnòt bò, a roun volèr, a roun brigan.

² Mé sala ka rantré pa lapòt-a, a li ki bèrjé mouton-yan.

³ Wonm-an ka véyé pak mouton-yan ka louvri lapòt-a pou bèrjé-a é mouton-yan ka kouté so vwè. I ka rélé chak mouton ki di li pa so non é i ka fè yé soti dèrò.

⁴ Lò i fè yé tout soti, i ka maché douvan yé é mouton-yan ka swiv li, piski yé konèt so vwè.

⁵ Yé péké jen swiv rounnòt moun, mé okontrèr, yé ké pran kouri lwen di li, piski yé pa konèt so vwè.

⁶ Jézi di yé sa parabòl-a, mé yé pa konprann sa li té lé di yé.

Jézi bon Bèrjé-a

⁷ Jézi di ankò: “Enren sa mo ka di zòt-a, a lavérité, a mo ki lapòt pak mouton-yan.

⁸ Tousa-ya ki vini anvan mo-a yé sa volèr ké brigan, mé mouton-yan pa kouté yé.

⁹ Mo sa lapòt-a. Si roun moun pasé pa mo pou rantré annan pak-a, i ké sové, i ké rantré é i ké soti, é i ké trouvé manjé pou li manjé.

¹⁰ Volèr-a ka vini sèlman pou vòlò, pou tchwé é pou détrwi. Mo menm, mo vini pou bay tout moun lavi, roun lavi byen ranpli ké Lèspri.

¹¹ Mo sa bon bèrjé-a. Bon bèrjé-a paré bay so lavi pou so mouton.

¹² Wonm-an ki ka véyé mouton-yan renki pou soumaké pa sa bon bèrjé-a, é i pa sa mèt mouton-yan. Lò i ka wè roun bèt sovaj ka vini, i ka lésé mouton-yan é li ka mété kouri atè. Épi bèt sovaj-a ka pran dézoutrwa mouton é i ka farouché ròt-ya.

¹³ Men sa ka rivé piski sa wonm-an té ka travay renki pou soumaké é i pa ka sousyé so kò di mouton-yan.

¹⁴ Mo sa bon bèrjé-a; mo konèt mo mouton, é mo mouton konèt mo,

¹⁵ kou Papa-a konèt mo é mo konèt Papa-a. Mo ka bay mo lavi pou mo mouton.

¹⁶ Mo ganyen ankò dòt mouton ki pa annan sa pak-a. Mo divèt mennen yé osi; yé ké kouté mo vwè é i ké ganyen roun sèl troupo ké roun sèl bèrjé.

¹⁷ Papa-a kontan mo piski mo ka bay mo lavi, pou mo viré pran li aprè.

¹⁸ Pésonn pa ka pran mo lavi, mé a mo menm ka bay li. Mo ganyen pouvwè di bay mo lavi é mo ganyen pouvwè di viré pran li aprè. A sa Papa-a koumandé mo fè.”

¹⁹ Ansou sa Jézi té fin di-a, ankò roun fwè jwif-ya pa té ka tonbé dakòr ant yé.

²⁰ Bokou té ka di: “I ganyen roun démon, i fou, poukisa zòt ka kouté l?”

²¹ Dòt té ka di: “Roun moun ki ganyen démon pa ka palé konsa. Ès roun démon pouvé fè moun avèg wè klè?”

Jwif-ya ka réfizé krè

²² Sézon frédi-a té rivé, an sa tan-an jwif-ya té ka fété Konsékrasyon kaz Bondjé Jérizalenm.

²³ Jézi té ka alé vini annan kaz Bondjé ansou galéri rwa Salomon-an.

²⁴ Jwif-ya antouré l é yé di li: “Jik ki tan to ké fè nou langi konran? Si to sa Mési-a, di nou l franchman.”

²⁵ Jézi di yé: “Mo déja di zòt li, mé zòt pa ka krè mo. Sign Bondjé-ya mo fè ké otorité Papa-a ka palé pou mo,

²⁶ mé zòt pa lé krè, piski zòt pa sa mo mouton.

²⁷ Mo mouton ka kouté mo vwè, mo konèt yé, é yé ka swiv mo.

²⁸ Mo ka bay yé lavi pou tout tan, yé péké janmen mouri é pésonn péké tiré yé an mo lanmen.

²⁹ Moun-ya Papa-a bay mo-a pli gran pasé tout bagaj é pésonn péké tiré yé an lanmen mo Papa.

³⁰ Papa-a ké mo ka fè roun sèl.”

³¹ Jwif-ya ranmasé roch ankò pou lapidé l.

³² Jézi di yé: “Mo déja fè zòt wè bokou gran sign Bondjé mo ka fè ké otorité Papa-a: a pou kilès zòt lé voyé roch ansou mo?”

³³ Jwif-ya réponn: “Nou pa lé tchwé to ké roch pou pyès sign Bondjé to fè, mé paské to jouré Bondjé. To sa roun wonm é to lé fè to kò pasé pou Bondjé.”

³⁴ Jézi di: “I ékri annan zòt lalwa ki Bondjé di: “Zòt sa bondjé.”

³⁵ Nou savé sa Liv Bondjé ka di-a, i vrè pou tout tan. Moun-yan Bondjé té bay so Palò-a, Bondjé li menm rélé yé bondjé.

³⁶ Mo menm, Papa-a chwézi mo é li voyé mo ansou latè. Kouman zòt pouvé di mo ka jouré Bondjé paské mo di mo sa Pitit Bondjé?

³⁷ Si mo pa ka fè travay mo Papa, zòt pa bizwen krè mo!

³⁸ Mé si mo ka fè l, menm si zòt pa lé krè mo, krè kan menm annan travay mo ka fè-a, pou zòt rikonèt é konprann Papa-a ké mo ka fè roun sèl.”

³⁹ Aprè sa, dòkò jwif-ya chaché tchenbé l ankò, mé li chapé anba yé lanmen.

⁴⁰ Jézi viré pati ròt bò larivyè Jourden-an, koté Jan Batis té koumansé batizé moun, é i rété la.

⁴¹ Bokou moun vini jwenn li é yé té ka di: “Jan pa té ka fè pyès sign Bondjé, mè tousa Jan té di ansou sa wonm-an té vrè.”

⁴² Annan sa koté-a, bokou moun krè an Jézi.