दर्शन 5 - परमेश्वरए ताँ तमु क्युइरकाउदए प्हैं नेरो क्यु च्हज 1 ङइ राजगद्दिर क्हुँबै परमेश्वरए क्योलो योरि दोहोरोन् प्ह्रिबै काउद प्हैं म्रोंइ। च काउद प्हैं लसि छाप ङि झोंल। 2 झाइले बेल्ले भोंबै स्वर्गदूत ङइ म्रोंइ। चइ थेबै कैले, “चु फैथेंबै काउदए प्हैं प्ल्हबै लायकर्बै खाब् मुँ?” बिइ। 3 दिलेया च काउदए प्हैं प्ल्हसि ङ्ह्योल् खाँबै म्हि स्वर्गरि, पृथ्बीरि नेरो क्रोंरै या खाबै आरेल। 4 च काउदए प्हैं प्ल्हसि ङ्ह्योबै लायकर्बै म्हि खाबै आरेबइले ङ बेल्ले क्रोइ। 5 ङ छले क्रोमा ङ्हिस्युसे प्लि न्होंर्बै चिब घ्रिइ ङने बिइ, “आक्रोद्, ङ्ह्योद्! यहूदाए कुलर्बै सिंह, खी स्योंम्बै दाऊद म्रुँए खलगउँइँले फिब् ग। खीजी ट्होइमुँ। छतसि खीजीन् चु छाप ङि फोर्दिसि चु काउदए प्हैं प्ल्हल् खाँम्।” 6 झाइले ङइ राजगद्दिए म्हाँजोरि, अथवा च सो प्ह्याबै सै प्लि नेरो ङ्हिस्युसे प्लि चिब्मैंए म्हाँजोरि, क्यु च्हज घ्रि रारिब् म्रोंइ। च क्यु च्हज सैवाल् खाँब् धों ब्योंब् मुँल। चल रुँ ङि नेरो मि ङि मुँल। चए मिमैं पृथ्बी तिगोंन् कुल्मिंबै परमेश्वरए प्ल्ह ङि मुँल। 7 क्यु च्हज ह्यासि राजगद्दिर क्हुँबै परमेश्वरए क्योलो योर मुँबै काउदए प्हैं किंइ। 8 च्हमा चर्बै सो प्ह्याबै सै प्लि नेरो ङ्हिस्युसे प्लि चिब्मैंइ क्यु च्हजलाइ पद्खु तसि फ्योइ। चमैं ताँनए योर बीणा नेरो धुप झोंबै माराए धुपारामैं मुँल। च धुपए थाँ परमेश्वरए म्हिमैंए प्राथनमैं मुँल। 9 झाइले चमैंइ छारा भजन घ्रि प्रिंइ: “च काउदए प्हैं किंसि चर्बै छाप फोर्दिसि ङ्ह्योबै लायकर्बै क्हि मुँ। तलेबिस्याँ म्हिमैंइ क्हिलाइ सैवाल, दिलेया ताँन् कुलउँइँले, ताँन् क्युइ पोंब्मैंउँइँले, ताँन् ह्युलर्बै म्हिमैंउँइँले नेरो ताँन् ह्रेंमैंउँइँले, क्हिए कोजी परमेश्वरए ल्हागिर क्हिजी म्हिमैंलाइ खामिंइ। 10 धै क्हिजी चमैंलाइ म्रुँमैं नेरो ङ्योए परमेश्वरए सेवा लबर ख्रो पिंबै खेगिमैं लमिंइ। छले चमैंइ पृथ्बीए फिर ग्याल्स लब्मुँ।” 11 झाइले ङइ धबै ङ्ह्योमा राजगद्दि, सो प्ह्याबै सै प्लि नेरो ङ्हिस्युसे प्लि चिब्मैंए कारग्युले च्योसे च्योल् आखाँबै स्वर्गदूतमैं मुँल। 12 च स्वर्गदूतमैंइ बेल्ले थेबै कैले “सैवाबै क्यु च्हज तोन्दोंरि लल् खाँब, भोंब, ह्रब, म्हारब, छ्याँब, माब, ताँनइ म्हाँदिल् त्हुब मुँ!” बिसि क्वे प्रिंमल। 13 छलेन स्वर्गर, पृथ्बीर, क्रोंर, मा ङ्युँइर, खन्तोंदोंन् मुँबै सो प्ह्याबै सैमैंइ “राजगद्दिर क्हुँबै परमेश्वर नेरो क्यु च्हजलाइ धन्यबाद, थेबै मान नेरो भों खोंयोंन् बिलै तरिगे।” बिसि क्वे प्रिंब ङइ थेइ। 14 झाइले सो प्ह्याबै सै प्लिइ बिइ, “आमेन, छान् तरिगे!” छबिबै तोदोंन् ङ्हिस्युसे प्लि चिब्मैंइ पद्खु तसि फ्योइ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.