भजनमैं 88 - परमेश्‍वरए ताँ तमु क्युइर

ङइ त्हिंयाँ म्हुँइँस क्हिने ग्वार ह्रिइमुँ

कोराए च्हमैंए भजन घ्रि, क्वे घ्रि, क्वे प्रिंब्मैंए चिबलाइ, “महलत-लिन्‍नोत” बिबै भाका धोंलेन् प्रिंल् त्हुम्। हेमान एज्रिए मस्किल घ्रि।

¹ ओ याहवेह, ङलाइ जोगेमिंबै परमेश्‍वर; ङइ त्हिंयाँ म्हुँइँस क्हिने ग्वार ह्रिइमुँ;

² क्हिए उँइँर ङए प्राथना फेनेरिगे; ङइ ग्वार ह्रिमा क्हिए न्ह तोमिंन्!

³ तलेबिस्याँ ङए सैंर ल्हें दुःख तइमुँ, छतसि युनन् ङ क्रोंर फेनेबि छेइमुँ।

⁴ क्रोंर फेनेबै म्हि धोंन् ङ तइमुँ; भों आरेबै म्हि धोंन् ङ तइमुँ।

⁵ सिनुमैंने बालु ङलाइ थेंमिंइमुँ, छगोंर रोबै सैवाबै म्हिमैं धोंले ङ तइमुँ। क्हिजी खोंयोंइ चमैंलाइ आमैं, क्हिजी चमैंलाइ वास्ता आलल्‍ले पिवाइमुँ।

⁶ क्हिजी ङलाइ क्रोंर्बै ताँन् भन्दा गैरु मिछु खैब क्‍ल्‍ह्‍योर थेंइमुँ।

⁷ क्हिए ह्रिसइ ङलाइ प्लेथेंइमुँ, धै क्हिजी ह्रोंसए ह्रिसइ ङलाइ दु:ख पिंइमुँ। तिस्याँदे मैंन्

⁸ ङए खोबै थुमैंने क्हिजी ङ ह्रेंगो लमिंइमुँ; चमैंए उँइँर क्हिजी ङ आखोब् लमिंइमुँ। ङ च्युथेंइमुँ, छतसि ङ बैरु त्होल् आखाँ।

⁹ शोकइ लमा ङए मिइ छेनाले म्रोंल् आखाँ। ओ याहवेह, त्हिंइ ह्रोंसे ङ क्हिनेन् ग्वार ह्रिइमुँ; ङए यो क्हि ङाँइन स्योंइमुँ।

¹⁰ सिनुमैंने क्हिजी ह्रोंसए औदिबै केमैं उँइँम्मा? च सिनुमैं सोगों तसि क्हिए मिं थेब् लम् रो वा? तिस्याँदे मैंन्

¹¹ क्हिजी लबै खोंयोंइ आनुबै म्हाँयाए बारेर छगोंर बयन लम्मा? धै नास तबै क्ल्ह्‍योर क्हि भर लल् खाँब मुँ बिसि खाबज्यै बिल् खाँम्मा?

¹² क्हिजी लबै औदिबै केमैं मिछु खैबै क्‍ल्‍ह्‍योर म्रोंल् खाँम्‍मा? धै क्हिजी लबै ठिक केमैं मैंल् खाँबै शक्ति नुयाबै त्हेरै म्रोंल् खाँम् रो वा?

¹³ दिलेया ओ याहवेह, ङम् क्हिनेन् ग्वार ह्रिमुँ; धै न्हाँकर्न ङइ लबै प्राथना क्हिए उँइँर खम्।

¹⁴ ओ याहवेह, क्हिजी ङलाइ तले पिवाल? ङउँइँले ह्रोंसए लि तले लोल?

¹⁵ कोलो ओंनोंन् ङए फिर दुःख तइमुँ, धै सिबि छेइमुँ, क्हिजी हौदिबइले ङ बेल्‍ले ङ्हिंइमुँ, छतसि ङए सैं च्योंब तइमुँ।

¹⁶ क्हिए ह्रिस ङए फिर खइमुँ; क्हिजी हौदिमा ङ नास तइमुँ।

¹⁷ त्हिंइ ह्रोंसे क्हिजी क्युइ धोंले ङलाइ घेर्दिसि हुइमुँ; खन्तदोंउँइँले क्हिजी ङलाइ घेर्दिइमुँ।

¹⁸ ङए थुमैं नेरो ङए फिर म्हाँया लब्मैंलाइ क्हिजी ङउँइँले ह्रेंगो लवाइ; छतसि मिछु खैबै क्ल्ह्‍यो ङने क्ह्रिबै थु तइमुँ।