भजनमैं 86 - परमेश्‍वरए ताँ तमु क्युइर

क्हिए खोंयोंइ आनुबै म्हाँया बेल्‍ले थेब मुँ

दाऊदए प्राथना

¹ ओ याहवेह, ङए प्राथना थेमिंन् धै ज्वाफ पिंन्, तलेबिस्याँ ङ ङ्हाँदु नेरो आयों आख्युब् मुँ।

² क्हिजी बिबै ताँ ङइ ङिंम्, ङलाइ रक्षा लमिंन्। क्हि ङए परमेश्‍वर ग। छतसि क्हिए के लबै म्हिलाइ जोगेमिंन्, ङइ क्हिए फिर भर लम्।

³ ओ प्रभु, ङए फिर दयाम्हाँया लमिंन्, तलेबिस्याँ ङ त्हिंइतिमिन् क्हिए मिं किंरिम्।

⁴ क्हिए के लबै म्हिलाइ सैं तोंल् लमिंन्, तलेबिस्याँ ओ प्रभु, ङ क्हिलाइन प्राथना लरिम्।

⁵ तलेबिस्याँ ओ प्रभु, क्हि स्वाब नेरो क्षमा पिंरिब् मुँ, क्हिए मिं किंब्मैं ताँनलाइ क्हिजी खोंयोंइ आनुबै थेबै म्हाँया लम्।

⁶ ओ याहवेह, ङए प्राथानर क्हिए न्ह तोमिंन्; ल्होमिंन् बिसि ग्वार ह्रिमा ङए ताँ थेमिंन्।

⁷ ङए दुःखए त्हिंइर ङ क्हिने ग्वार ह्रिमुँ, तलेबिस्याँ क्हिजी ज्वाफ पिंब्मुँ।

⁸ ओ प्रभु, क्हि धों तब अरू देवतामैं खाबै आरे, क्हिजी लब् धों तबै केमैं अरू खाबज्यै या लल् आखाँ।

⁹ ओ प्रभु, क्हिजी बनेबै ताँन् ह्रें-ह्रेंमैं क्हिए उँइँर कुरब्मुँ, धै चमैंइ क्हिए मिं थेब् लब्मुँ।

¹⁰ तलेबिस्याँ क्हि बेल्‍ले थेब मुँ धै औदिबै केमैं लम्; घ्रि मत्‍त्रे परमेश्‍वर क्हि ग।

¹¹ ओ याहवेह, क्हिए घ्याँर प्रबर ङलाइ लोमिंन्, धै क्हिए क्ह्रोसेंन्बै घ्याँर ङ प्रब्मुँ; क्हिए मिंलाइ ङइ मान लल् खाँरिगे बिसि ङए सैं खोंयोंन् बिलै क्हि ङाँइन तल् पिंन्।

¹² ओ याहवेह ङए परमेश्‍वर, ङए खों न्होंउँइँले ङ क्हिए मिं थेब् लब्मुँ, धै ङ खोंयोंन् बिलै क्हिए मिं क्वेब्मुँ।

¹³ तलेबिस्याँ ङए फिर क्हिए खोंयोंइ आनुबै म्हाँया बेल्‍ले थेब मुँ; धै क्हिजी ङए सो क्रोंर्बै गैरु क्ल्ह्‍योउँइँले फ्रेमिंइमुँ।

¹⁴ ओ परमेश्‍वर, घमण्डि म्हिमैं ङए बिरोधर रेइमुँ; दयाम्हाँया आरेब्मैंइ ङलाइ सैल् म्हैइमुँ; धै च म्हिमैंइ क्हिलाइ आमैं।

¹⁵ दिलेया ओ प्रभु, क्हि ल्हयो खब नेरो दयाम्हाँया मुँबै परमेश्‍वर ग, युनन् ह्रिस आखब, ताँनए फिर खोंयोंइ आनुबै म्हाँया लब नेरो भर लल् खाँब मुँ।

¹⁶ ङए फिर दयाम्हाँया लसि ङ ङाँइ तोमिंनु; ह्रोंसए के लबै म्हिलाइ क्हिए शक्ति पिंनु, धै ह्रोंसए केब्स्योए च्हलाइ जोगेमिंनु।

¹⁷ ओ याहवेह, क्हिजी ङ ल्होमिंइमुँ धै ङए सैं क्होमिंइमुँ। छतसि क्हिजी ङिए फिर छ्याँबन् लम् बिसि ङलाइ चिनु घ्रि उँइँमिंन्, धै ङलाइ आखोब्मैं च चिनु म्रोंसि फापिरिगे।