भजनमैं 85 - परमेश्वरए ताँ तमु क्युइरङिलाइ धबै भोंसि लमिंन् क्वे प्रिंब्मैंए चिबए लागिर कोराए च्हमैंए भजन घ्रि। 1 ओ याहवेह, ह्रोंसए ह्युलए फिर क्हिजी ल्हयो उँइँमिंइ; याकूबए सन्तानमैंए सुख शान्ति क्हिजी एमिंइ। 2 ह्रोंसए म्हिमैंए आछ्याँबै केमैं क्हिजी क्षमा लमिंइ; चमैंए ताँन् पापमैं क्हिजी हुमिंइ। तिस्याँदे मैंन् 3 क्हिजी ह्रिस खब पिवाइ; धै लुँरिबै ह्रिसउँइँले एखइ। 4 ओ ङिलाइ मुक्ति पिंबै परमेश्वर, ङिलाइ एपखमिंन्, धै ङिए फिर खबै क्हिए ह्रिस म्हमिंन्! 5 ङिने बालु क्हि खोंयोंइन ह्रिस खरिम्मा? पुस्ता-पुसता समा ङिने बालु ह्रिस खरिम्मा? 6 क्हिए म्हिमैं क्हिने बालुन् सैं तोंल् योंरिगे बिसि ङिलाइ धबै भोंसि आलमिं वा? 7 ओ याहवेह, खोंयोंइ आनुबै क्हिए म्हाँया ङिने उँइँमिंन्, धै क्हिउँइँले योंबै मुक्ति ङिलाइ पिंन्। 8 याहवेह परमेश्वरजी बिबै ताँमैं ङ थेरिब्मुँ, तलेबिस्याँ खीए म्हिमैंने खीजी शान्तिए ताँ पोंब्मुँ। दिलेया चमैं धबै आछ्याँबै घ्याँर आप्ररिगे! 9 क्ह्रोंसेन्ले खीलाइ मान लब्मैंलाइ खीजी खैतबै त्हेरै या जोगेमिंब्मुँ; छतसि ङ्योए ह्युलर खी मुँ बिसि ङ्योइ था सेल् खाँम्। 10 खोंयोंइ आनुबै म्हाँया लबै परमेशवर नेरो भर लल् खाँबै इस्राएलीमैं क्ह्रिइमुँ; परमेश्वरजी ठिक के लमा म्हिमैं छिं ङ्हाँल् योंम्। धै म्हिमैंइ परमेश्वरने म्हाँया लम्। 11 म्हिमैंइ परमेश्वरए फिर भर लमा पृथ्बीउँइँलेन् मुर फेनेम्, परमेश्वरजी ठिक के लमा स्वर्गउँइँले क्युरु ङ्ह्योम्। 12 याहवेहजी छ्याँबै सैमैं ङ्योलाइ खैलसेया पिंब्मुँ, धै ङ्योए म्रोंइ ल्हें रा-रोमैं रोब्मुँ। 13 परमेश्वरजी लबै ठिक केमैं खीए ओंसों-ओंसों ह्याब्मुँ, धै खीए ल्हागिर घ्याँ तयार लब्मुँ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.