भजनमैं 84 - परमेश्वरए ताँ तमु क्युइरङए सो याहवेहए धिंर टिदा ङ्हाँम् क्वे प्रिंब्मैंए चिबए ल्हागिर: गित्तित भाकार कोराए च्हमैंए भजन घ्रि। 1 ओ स्वर्गर्बै सेनामैंए चिब याहवेह, क्हि टिबै क्ल्ह्यो कति छ्याँब मुँ! 2 याहवेहए धिंर टिबै ल्हागिर ङए सोइ थेबै इच्छा लम्, धै मूर्छ तम्; ङए खों नेरो ज्युइ सैं तोंसि खोंयोंन् बिलै तरिबै परमेश्वरलाइ क्वे प्रिंम्। 3 ओ स्वर्गर्बै सेनामैंए चिब याहवेह, ङए म्रुँ नेरो ङए परमेश्वर, क्हिए मिंर ख्रो पिंबै थाँनए चेंदो कोल्मेंइ प्हसे योंमुँ, धै चिब्लिमैंइ च्हों थासि ह्रोंसए प्हसेमैं चर थेंम्। 4 क्हिए धिंर टिसि खोंयोंन् बिलै क्हिए मिंर क्वे प्रिंरिब्मैंइ आशिक योंम्। तिस्याँदे मैंन् 5 क्हिउँइँले भों योंब्मैं, नेरो सियोन कोंर ह्याबै सैं लब्मैंइ आशिक योंम्। 6 चमैं बाका बिबै ब्याँसि तसि ह्यामा चर क्युए मुल् बनेम्; बर्खर्बै नाँइ चर ङ्ह्योखोमैं तम्। 7 चमैं ताँन् सियोनर देवतामैंए परमेश्वरए आम्रोंखन् समा चमैंइ भोंए फिर भों योंम्। 8 ओ स्वर्गर्बै सेनामैंए चिब याहवेह परमेश्वर, ङए प्राथना थेमिंन्; ओ याकूबए परमेश्वर, ङए ताँ थेमिंन्! तिस्याँदे मैंन् 9 ओ परमेश्वर, ढाल धोंले ङिलाइ जोगेबै म्रुँ ङाँइ ङ्ह्योमिंन्; छ्युगु फोसि त्हाँबै ह्रोंसए म्हिए फिर मि ङ्ह्योमिंन्। 10 अरू क्ल्ह्योजरे हजार त्हिंइमैं थोब् भन्दा क्हिए ह्युमैंर तिगें टिब छ्याँब तम्। दुष्टमैंए तम्बुमैंर टिब् भन्दा बरु ङए परमेश्वरए धिंर रुँबै म्हि तब ङलाइ खोम्। 11 तलेबिस्याँ याहवेह परमेश्वर त्हिंयाँ नेरो ढाल ग; याहवेहजी दयाम्हाँया लमुँ धै मान इजेत पिंम्; ठिक घ्याँर प्रब्मैंलाइ खीजी ताँन् छ्याँबै सैमैं पिंब्मुँ। 12 ओ स्वर्गर्बै सेनामैंए चिब याहवेह, क्हिए फिर भर थेंबै म्हिइ आशिक योंम्! |
© 2020, Wycliffe Bible Translators, Inc. All rights reserved.
Wycliffe Bible Translators, Inc.