भजनमैं 61 - परमेश्‍वरए ताँ तमु क्युइर

ङ भन्दा थेबै पारार डोरेमिंन्

क्वे प्रिंब्मैंए चिबए ल्हागिर गिटार-सारङ्गींमैं ह्रादै प्रिंबै दाऊदए भजन।

¹ ओ परमेश्‍वर, ङइ ग्वार ह्रिब थेमिंन्, ङए प्राथना छेनाले थेमिंन्;

² ङ‍ए सैं आतेसि पृथ्बीए छ्योगोउँइँले ङइ क्हिने ग्वार ह्रिमा, ङ भन्दा थेबै पारार डोरेमिंन्,

³ तलेबिस्याँ ङए ग्वार योंबै क्‍ल्‍ह्‍यो नेरो शत्तुरमैंउँइँले जोगेल् योंबै भोंबै धरर क्हिन् ग।

⁴ खोंयोंन् बिलै क्हिए तम्बुर ङलाइ टिल् पिंन्! क्हिए प्ह्‍यागोंमैंइ ङए रक्षा लद्। तिस्याँदे मैंन्

⁵ तलेबिस्याँ ओ परमेश्‍वर, क्हिने बालु ङइ फैबै भकलमैं क्हिजी थेइमुँ; क्हिलाइ मान लब्मैंइ योंल् त्हुबै सैमैं क्हिजी ङलाज्यै या पिंइमुँ।

⁶ म्रुँए छ्ह ह्रिंग्यो लमिंन्; च खोंयोंन् बिलै सोरिगे।

⁷ च परमेश्‍वरए ओंसों खोंयोंन् बिलै राजगद्दिर टिरिगे; क्हिजी खोंयोंइ आनुबै म्हाँया लबइले नेरो च क्हिए फिर भर लल् खाँबइले चए रक्षा लमिंन्!

⁸ झाइले दिन ह्रोसे क्हिने फैबै भकल ङइ पूरा लमा ङ क्हिए मिं खोंयोंन् बिलै थेब् लसि क्वे प्रिंब्मुँ।