भजनमैं 6 - परमेश्‍वरए ताँ तमु क्युइर

दुःख तमा ल्होमिंन् बिसि लबै प्राथना

क्वे प्रिंब्मैंए चिबए ल्हागिर बीणा-सारङ्गीं ह्रादै शिमिनिथ भाकाले प्रिंब। दाऊदए भजन घ्रि।

¹ ओ याहवेह, क्हि ह्रिस खमा ङ आहौदिद्, क्हिए ह्रिसर ङ प्हरेइ आप्रुद्।

² ओ याहवेह, ङने भों तिफुँइ आरे, छतसि ङए फिर ल्हयो खमिंन्; ओ याहवेह, ङए ह्रिबमैं नइमुँ, छतसि ङ सल् लमिंन्।

³ ङए सो खैता-खैता तइमुँ! ओ याहवह, खोंयों समा पैंरिब् जा, खोंयों समा?

⁴ ओ याहवेह, ङ ङाँइ तोद्, ङ सिल् आपिंन्; खोंयोंइ आनुबै क्हिए म्हाँया ङए फिर मुँबइले ङ जोगेमिंन्।

⁵ सियाब्मैंइ क्हिलाइ आमैं; क्रोंर क्हिए मिं खाबइ क्वेब्मुँ?

⁶ ङ क्रोसि तोइ लल् आखाँब् तइमुँ; म्हुँइँस ह्रोंसे ङ क्रो-क्रोइ ङए क्ह्‍ल्यो प्हाँइमुँ, धै ङए मिग्लिइ ङए क्रेगु या प्हाँइमुँ।

⁷ न्हुँइ लमा ङए मि आचारब् तइमुँ; ङए शत्तुरमैंइ दुःख पिंबइले ङ छेनाले म्रोंल् आखाँब् तइमुँ।

⁸ ओ आछ्याँबै के लबै म्हिमैं, ङ ङाँइँले ह्‍याद्, तलेबिस्याँ ङ क्रोब याहवेहजी थेइमुँ।

⁹ ल्होमिंन् बिसि ङइ ग्वार ह्रिमा याहवेहजी थेइमुँ; ङइ लबै प्राथनाए ज्वाफ खीजी पिंम्।

¹⁰ ङए ताँन् शत्तुरमैं फापिल् त्हुब्मुँ; धै खैता-खैता तयाब्मुँ, चमैं फाफिसि तिस्यार्न ङ ङाँइँले स्योयाब्मुँ।