भजनमैं 32 - परमेश्‍वरए ताँ तमु क्युइर

पापए क्षमा योंसि सुख योंब

दाऊदए मस्किल बिबै भजन घ्रि

¹ पापए क्षमा योंसि पाप त्होयाबै म्हि ङ्‍हो सब् ग।

² छाबै म्हिलाइ याहवेहजी दोषि आठर्दि, छले आछ्याँबै सैं आरेबै म्हिए फिर खीजी आशिक पिंम्।

³ पाप लसेया ङइ “पाप लइमुँ” आबिल्‍ले टिमा त्हिंइतिमिंन् ङ क्रोबइले ङए ह्रिब्मैं ङ्युयाइ।

⁴ तलेबिस्याँ त्हिंयाँ म्हुँइँस क्हिजी ङलाइ थेबै दण्ड पिंइ। छतसि ख्वालबै त्हेर्बै त्हिंयाँइ ख्रोंब् धोंले ङए ज्युर्बै भों खाँयाल। तिस्याँदे मैंन्

⁵ लिउँइँ क्हिए उँइँर ङ पापि ग बिसि ङइ बिल, धै ङइ लबै आछ्याँबै केमैं ङइ आलो। “ङइ लबै आछ्याँबै केमैं याहवेहए उँइँर बिब्मुँ,” बिसि ङइ बिइ, धै ङए पापमैं क्हिजी क्षमा लमिंइ। तिस्याँदे मैंन्

⁶ छतसि क्हिलाइ त्होल् खाँबै त्हे मुँमन् क्हिजी बिब् ङिंब्मैं ताँनइ प्राथना लरिगे। छलमा प्ल्हों खबै भेल्गज्यै या चमैंलाइ छुइरिब् आरे।

⁷ क्हिन् ङए लोइ टिबै क्‍ल्‍ह्‍यो ग, क्हिजी ङ दुःखउँइँले जोगेमिंइमुँ, छतसि ङलाइ जोगेमिंबै परमेश्‍वर क्हिन् ग बिसि सैं तोंदै क्वे प्रिंसि ङ क्हिए मिं क्वेब्मुँ। तिस्याँदे मैंन्

⁸ “ङइ क्हिलाइ लोमिंब्मुँ,” बिसि याहवेहजी बिइ। “क्हि प्रल् त्हुबै घ्याँर ङइ क्हिलाइ डोरेमिंब्मुँ; ङइ क्हिलाइ लोदा-सैंदा लसि क्हिए फिर्न मि छरिब्मुँ।

⁹ क्हेमैं बुद्धि आरेबै घोडा नेरो खच्‍चर धों आतद्! चमैंलाइ तार झोंबै ल्हागिर लगाम नेरो पैए प्हरे चैदिम्, आस्याँ क्हिइ चमैंलाइ तार झोंल् आखाँ।”

¹⁰ दुष्‍ट म्हिमैंइ ल्हें दुःख योंल् त्हुब्मुँ, दिलेया याहवेहए फिर भर लब्मैंलाइ बिस्याँ खीजी खोंयोंइ आनुबै म्हाँया लसि रक्षा लमुँ।

¹¹ ओ ठिक के लब्मैं, याहवेहजी लबै केमै मैंसि सैं तोंसि कै तेद्, ओ छ्याँबै सैं प्ह्‍याब्मैं, सैं तोंदै खीए जयजय लद्।