भजनमैं 30 - परमेश्‍वरए ताँ तमु क्युइर

ङ क्रोरिमा क्हिजी सेदा ङ्हाँन् लमिंइ

परमेश्‍वरए योर मन्दिर सुम्पिदिमा चु क्वे प्रिंन्। दाऊदए भजन घ्रि।

¹ ओ याहवेह, क्हिजी ङ गैरुउँइँले कैंडो तेमिंइ, धै ङ म्रोंसि ङए शत्तुरमैं निस्योल् आपिंइमुँ, छतसि ङ क्हिए मिं थेब् लब्मुँ।

² ओ ङए याहवेह परमेश्‍वर, ङ नमा ङइ क्हिने ल्होमिंन् बिसि ग्वार ह्रिइ, धै क्हिजी ङ सल् लमिंइ।

³ ओ याहवेह, क्हिजी ङए सोलाइ क्रोंउँइँले तेमिंइ, धै सिसि क्रोंर ह्‍याब्मैंउँइँले ङलाइ जोगेमिंइ।

⁴ ओ याहवेहए म्हिमैं, खीए ल्हागिर भजन प्रिंन्, धै खीए पबित्र मिंर धन्यबाद पिंन्।

⁵ तलेबिस्याँ खी तिस्याँदे मत्‍त्रे ह्रिस खम्, दिलेया ङ्योए छ्ह तिगोंन् खीजी ल्हयो खरिम्। म्हुँइँस् तिमिंन् मिग्लि युलेया न्हाँगर बिस्याँ सैं तोंल् योंब्मुँ।

⁶ ताँन् सै ठिक तबै त्हेरि ङइ बिइ, “ङ खोंयोंइ ङ्हिंरिब् आरे।”

⁷ ओ याहवेह, क्हिजी ङ ल्होमिंसि ङलाइ नुबै कोंर बोसि थेंमिंइ, दिलेया क्हिजी ह्रोंसए मोंडा लोवामा ङए सैं नइ।

⁸ ओ याहवेह, ङइ क्हिनेन् ग्वार हिइमुँ। ल्होमिंन् बिसि ङइ क्हिनेन् ग्वार ह्रिइमुँ।

⁹ “ङ सियास्याँ क्हिलाइ तो फायदा तमुँ? ङ क्रोंर ह्‍यामा क्हिलाइ तो फायदा तमुँ? स त्हुलइ क्हिलाइ थेब् लम् रो वा? क्हि भर लल् खाँबै परमेश्‍वर ग बिसि स त्हुलइ क्हिए बयन लम् रो वा?

¹⁰ ओ याहवेह ङए ताँ थेमिंनु, ङए फिर ल्हयो खमिंनु! ओ याहवेह, ङलाइ ल्होमिंन्।”

¹¹ ङ क्रोरिमा क्हिजी ङ सैं तोंल् लमिंइ; क्हिजी ङए नइँए ह्रेंग प्लिमिंसि खाँसों ङ्हाँबै क्वें खिमिंइ।

¹² छतसि ङ तोइ आबिल्‍ले टिरिब् आरे, ङ क्हिलाइन थेब् लबै क्वेमैं प्रिंमुँ। ओ ङए याहवेह पारमेश्‍वर, ङ खोंयोंन् बिलै क्हिलाइन धन्यबाद पिंरिब्मुँ।