भजनमैं 16 - परमेश्वरए ताँ तमु क्युइरपरमेश्वरए फिर बिश्वास लबै प्राथना। दाऊदइ प्ह्रिबै मिक्ताम। 1 ओ परमेश्वर, ङ जोगेमिंन्, तलेबिस्याँ ङ क्हिए प्हलेर ग्वार योंबर खइमुँ। 2 ङइ याहवेहने बिइमुँ, “क्हि ङए प्रभु ग; ङए ल्हागिर क्हि मत्त्रे छ्याँब ग, अरू तो सै या छ्याँब आरे।” 3 इस्राएल ह्युलर्बै परमेश्वरए म्हिमैं बेल्ले कालदिब मुँ, चमैं म्रोंसि ङ सैं तोंरिम्। 4 दिलेया अरू देउतमैंए लिलि प्रब्मैंइ ह्रोंसए फिर्न ल्हें दुःख थौदिम्। च देउतमैंए मिंर कोए ख्रो ङइ पिंरिब् आरे, धै ङए सुँइ चमैंए मिं किंरिब् आरे। 5 ओ याहवेह, ङइ योंल् त्हुबै सैमैं पिंब क्हिन् ग ङलाइ चैदिबै ताँन् सै क्हिजी पिंम्, ङए छ्ह या क्हिए योर्न मुँ। 6 ङए ल्हागिर क्हिजी थेंमिंबै साँद बेल्ले छ्याँबै सैं तोंबै क्ल्ह्योर मुँ। क्ह्रोंसेंन, ङइ खेमैंए सै न्होर योंइँमुँ। 7 ङलाइ लोदा सैंदा लबै याहवेहए मिं ङ थेब् लब्मुँ, ङए खोंइ म्हुँइँसरै या ङलाइ लोदा सैंदा लम्। 8 ङइ याहवेह खोंयोंइन ङए ओंसों थेंइमुँ। ङए क्योलोउँइँ खी मुँ, छतसि ङ छाइ छुइ तरिब् आरे। 9 छतसि ङए सैं तोंइमुँ, ङए ज्यु या ढुक्क मुँ, 10 तलेबिस्याँ क्हिजी ङए प्ल्हलाइ क्रोंर वाथेंरिब् आरे, धै ह्रोंसए पबित्र म्हिए ज्यु क्हिजी क्राँल् पिंरिब् आरे। 11 क्हिजी खोंयोंइ आखाँबै छ्ह योंबै घ्याँ ङलाइ उइमिंइमुँ; क्हिने त्होमा ङए सैं बेल्ले तोंन् लमिंब्मुँ; क्हिए क्योलो योर खोंयोंन् बिलै सैं तोंल् योंम्। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.