भजनमैं 142 - परमेश्वरए ताँ तमु क्युइरङए ग्वार योंबै क्ल्ह्यो क्हि ग उर मुँमा दाऊदइ चु मस्किल प्राथना लइ। 1 ओरदै ङ याहवेहने ग्वार ह्रिमुँ, ङए फिर ल्हयो खमिंन् बिसि थेबै कै तेदै ङइ याहवेहने यो छ्युँ लम्। 2 ङइ ह्रोंसए ताँमैं खीए उँइँर थेंमुँ, खीने बालुन् ङइ ह्रोंसए दुःख ङेमुँ। 3 ङए सैं च्योंब् तमा ङइ तो लल् त्हुम् बिब क्हिजी सेम्! ङ प्रबै घ्याँर म्हिमैंइ ङए ल्हागिर ङो चुइमुँ। 4 ङए क्योलोउँइँ ङ्ह्योमिंनु, ङए न्हुँ लब खाबै या आरे, ङ ग्वार योंबै क्ल्ह्यो खनिरै आरे। खाबज्यै या ङए वास्ता आल। 5 ओ याहवेह, ङ क्हिनेन् ग्वार ह्रिमुँ; “क्हि ङए ग्वार योंबै क्ल्ह्यो, नेरो सोगोंमैंए ह्युलर ङए चैदिबै सै क्हिन् ग!” बिसि ङइ बिमुँ। 6 ङइ ग्वार ह्रिब थेमिंनु, तलेबिस्याँ ङ थेबै दुःखर फेइमुँ! ङलाइ ल्हाब्मैंउँइँले जोगेमिंनु, तलेबिस्याँ चमैं ङ भन्दा बेल्ले भोंब मुँ! 7 ङइ क्हिए मिं थेब् लल् खाँरिगे बिसि झेलर च्युब् धों तबै दुःखउँइँले ङ फ्रेमिंनु! छले क्हिजी ङए फिर छ्याँब् लब् म्रोंसि ठिक के लब्मैं ङए कारर्ग्युले खागु तखब्मुँ। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.