भजनमैं 114 - परमेश्‍वरए ताँ तमु क्युइर

याहवेहए उँइँर थरथरले त्हारद्

¹ याहवेहजी इस्राएलीमैं मिश्र ह्‍युलउँइँले पखइ, आक्होबै क्युइ पोंबै म्हिमैंए म्हाँजोउँइँले याकूबए परवारमैं त्होंखइ।

² च त्हेरि यहूदा ह्‍युल याहवेहए पबित्र क्‍ल्‍ह्‍यो तयाइ, धै इस्राएल खीए ग्याल्स तइ।

³ याहवेहजी चु के लब् म्रोंसि मा ङ्युँइ भौदियाइ; यर्दन स्यों उल्टोले प्रबर होंइ।

⁴ कोंमैं ङ्हिंसि क्यु साँडेमैं धोंले धै डाँडामैं क्यु झज धोंले उफार्दिबर होंइ।

⁵ ओ मा ङ्युँइ, क्हिलाइ तो तइ? तले भौदियाइ। ओ यर्दन, क्हि तले लिउँइँन एह्‍याल?

⁶ ओ कोंमै, क्यु साँडेमैं धोंले क्हेमैं तले उफार्दिल, ओ डाँडामैं, क्यु झज धोंले क्हेमैं तले उफार्दिल?

⁷ ओ पृथ्‍बी, याहवेहए उँइँर ङ्हिंन्, याकूबए परमेश्‍वरए उँइँर थरथरले त्हारद्;

⁸ खीजी पारालाइ क्युए ङ्ह्‍योखोमैं लमिंइ, धै प्रोलाइ क्युए मुल लमिंइ।