भजनमैं 113 - परमेश्‍वरए ताँ तमु क्युइर

मु नेरो पृथ्बी ङ्ह्‍योबर याहवेह कुरम्

¹ याहवेहए मिं थेब् लद्! ओ याहवेहए सेवा लब्मैं, खीए मिं थेब् लद्! खीए मिं क्वेद्!

² तोगोउँइँले खोंयोंन् बिलै याहवेहए मिं थेब् तरिगे!

³ त्हिंयाँ प्योबै त्हे सेरो त्हिंयाँ लिबै त्हे समन् खीए मिं थेब् तल् त्हुम्!

⁴ याहवेहजी ताँन् ह्रेंमैंए फिर ग्याल्स लम्, धै खीए मान मु भन्दा नुब मुँ बिसि ताँन् म्हिमैंने उँइँमिंन्! खीए मिंर क्वे प्रिंब मु भन्दा नुब मुँ।

⁵ ङ्योए याहवेह परमेश्‍वर धों तब खाब् मुँ? खी ताँन् भन्दा नुबै क्‍ल्‍ह्‍योर म्रुँ तसि क्हुँम्,

⁶ दिलेया मु नेरो पृथ्बी ङ्ह्‍योबर खी कुरम्।

⁷ खीजी आयों आख्युब्मैं त्हुलउँइँले रेमिंम्, धै ङ्हाँदुमैं मेब्रोए रासउँइँले क्वेमिंम्।

⁸ खीए म्हिमैंए क्रथे मिंथेमैंने प्रे ग्याल्स लबै ल्हागिर खीजी चमैं टिल् पिंम्।

⁹ थरिस्योलाइ खीजी सैं तोंल्‍ले टिबै ल्हागिरि परवा पिंम्। याहवेहए मिं थेब् लद्!