हितोपदेश 9 - परमेश्‍वरए ताँ तमु क्युइर

बुद्धि योंसि छ्याँब् तद्

¹ बुद्धिइ ह्रोंसए धिं बनेइमुँ; चइ त्हो ङिउलो क्योइमुँ।

² भत्‍तेरए ल्हागिर चइ र-क्यु सैइमुँ; लिंबै अँगुरए प्हा नेरो चबै सैमैं टेबलर थेंइमुँ।

³ चइ ह्रोंसए केब्स्योमैं कुलइमुँ, धै सहरए नुबै क्ल्ह्‍योउँइँले,

⁴ “ओ बुद्धि आरेब्मैं चुर खो!” बिदै ताँनलाइ हुइमुँ,

⁵ धै “खो, ङने बालु चदु, ङने मुँबै लिंबै अँगुरए प्हा थुँन्।

⁶ आछ्याँबै के लब्मैंने आप्रद्, ताँ क्होद् धै लोद्। छलस्याँ क्हेमैं सोब्मुँ,” बिम्।

⁷ खैच्हिजिले पोंबै म्हिलाइ लोदा सैंदा लमा उल्टोन् फापेल् लमुँ, दुष्‍ट म्हिलाइ हौदिमा ह्रोंसलन् न्होह्रों तम्।

⁸ खैच्हिजिले पोंबै म्हिलाइ आहौदिद्, आस्याँ चइ क्हि हेल लब्मुँ; दिलेया बुद्धि मुँबै म्हिलाइ हौदिमा चइ क्हिलाइ म्हाँया लब्मुँ।

⁹ बुद्धि मुँबै म्हिलाइ अर्थि पिंमा च झन ह्रब्-सेब् तब्मुँ; ठिक के लबै म्हिलाइ लोमिंमा चइ झन् च्हैंब् मैंब् लल् खाँब्मुँ।

¹⁰ याहवेहने प्रे ङ्हिंब्मैंइ बुद्धि योंम्, पबित्र परमेश्‍वरलाइ ङोसेबै म्हि च्हैंब् मैंब् लल् खाँम्।

¹¹ तलेबिस्या ङउँइँलेन् क्हिइ ह्रिंबै छ्ह योंब्मुँ, धै क्हि खिब् माँब् तन् समन् सोब्मुँ।

¹² क्हि बुद्धि मुँब् तइ बिस्याँ, बुद्धिइन क्हिलाइ इनाम पिब्मुँ; दिलेया खैच्हिजिले पोंस्याँ क्हिज्यै दु:ख योंब्मुँ।

बुद्धि आरबै च्हमिरि

¹³ बुद्धि आरबै च्हमिरि थेबै कै तेसि पोंम्; च छ्यनपर्गन आरेब् नेरो ताँ आक्होब् तम्।

¹⁴ च ह्रोंसए धिंर्बै म्रार धै सहरर्बै ताँन भन्दा नुबै क्‍ल्‍ह्‍योर टिमा

¹⁵ चए रेउँइँले सरासर ह्रोंसए घ्याँर ह्‍यारिब्मैंलाइ

¹⁶ “ओ बुद्धि आरब्मैं ओ ताँ आक्होब्मैं, चुर खो!” बिदै हुइम्।

¹⁷ धै “ह्‍योइरि थुँबै क्यु लिंब तम्, लोइरि चबै क्हें ङाँबो खम्।” बिसि चइ बिम्।

¹⁸ दिलेया च ङाँर ह्‍याब्मैं क्रोंर फेनेम्, धै चए योर फेब्मैंइ कालए सुँर फेनेबै या था आसे।