हिब्रू 10 - परमेश्वरए ताँ तमु क्युइर1 यहूदी ठिम तारे तखबै क्ह्रोंसेंन्बै ताँमैं धों तब आङिं, तारे तखबै क्ह्रोंसेंन्बै छ्याँबै सैमैंए छरि मत्त्रे ग। छतसि बर्ष ह्रोंसे परमेश्वरए मिंर पिंबै ख्रोमैंइ ख्रो पिंबै म्हिमैंए ताँन् पाप ख्रुमिंल् आखाँ। 2 ख्रोमैंइ म्हिमैंए पाप ख्रुमिंल् खाँस्याँ सालै ह्रोंसे म्हिमैंइ ख्रो पिंरिल् आत्हुमल, आङिं वा? तलेबिस्याँ तिखेर्न ख्रो पिंब्मैंए पाप त्होयास्याँ, चए लिउँइँ चमैंए सैंर पाप आतमल। 3 दिलेया चु ख्रो पिंमा म्हिमैंइ सालै ह्रोंसे खेंमैंए पाप सैंर मैंम्, 4 तलेबिस्याँ र क्युए कोइ म्हिमैंए पाप त्होल् आखाँ। 5 छतसि येशू ख्रीष्ट चु ह्युलर युमा खीजी परमेश्वरने छ बिइ, “क्हिजी ख्रो नेरो भेटिमैं आम्है, दिलेया क्हिजी ङए ल्हागिर ज्यु घ्रि बनेइ। 6 तलेबिस्याँ खेदोमैं ख्रो पिंबै क्ल्ह्योर होम लबइले क्हि सैं आतों, झाइले पाप ख्रुबै ल्हागिर ख्रो पिंलेया क्हि सैं आतों। 7 छतसि ङइ बिइ, ‘ओ परमेश्वर, ङए बारेर छ्वेर प्ह्रिब् धोंले क्हिए सैंर मैंबै ताँ पूरा लबर ङ युइमुँ।’” 8 ओंसोंन् खीजी बिइ, “ख्रो, भेटिमैं, खेदोए होम लब, पाप ख्रुबै ल्हागिर ख्रोमैं क्हिइ आम्है, चु सैमैं क्हिलाइ आचैदि, चु सैमैं म्रोंसि क्हि सैं आतों।” (चु ताँन् ठिमलाइ चैदिबै सैमैं ग।) 9 च लिउँइँ खीजी बिइ, “ओ परमेश्वर, क्हिए सैंर मैंबै ताँ पूरा लबर ङ युइमुँ।” छले परमेश्वरजी ओंसोंबै ख्रो पिंबै रोस स्योवासि चए क्ल्ह्योर ख्रीष्टजी पिंबै ख्रो थेंमिंब्मुँ। 10 तलेबिस्याँ येशू ख्रीष्टजी परमेश्वरए सैंर मैंबै ताँ पूरा लमिंइ। छतसि येशू ख्रीष्टजी खीए ज्यु खोंयोंइ तरिबै ख्रो तिब्ले पिंबइले ङ्यो पबित्र लमिंइमुँ। 11 यहूदी ख्रो पिंबै खेगिमैंइ त्हिंइ ह्रोंसे ख्रो पिंमुँ। दिलेया छाबै ख्रोइ म्हिमैंए पाप खोंयोंइ त्होल् आखाँ। 12 दिलेया ख्रीष्टजी म्हिमैं पापउँइँले फ्रेमिंबर ख्रो घ्रि मत्त्रे पिंइ। च ख्रो खोंयोंइ तरिम्, धै खी परमेश्वरए क्योलोउँइँ टिइमुँ। 13 झाइले परमेश्वरजी ख्रीष्टए शत्तुरमैं खीए प्हले न्होंर आलन् समा ख्रीष्टजी पैंरिम्। 14 तलेबिस्याँ खीजी पबित्र लमिंबै म्हिमैंलाइ खोंयोंइ तरिबै ख्रो घ्रिउँइँलेन् पबित्र लमिंइमुँ। 15 पबित्र प्ल्हज्यै या ङ्योने चु ताँए ग्वाइ पिंइमुँ। ओंसों खीजी छ बिइमुँ, 16 “चु त्हिंइ लिउँइँ चमैंने फैबै ङए बाछा चुन् ग, ङइ चमैंए खोंर ङए ठिम थेंमिंब्मुँ, धै चमैंए सैंर ङए ठिम प्ह्रिमिंब्मुँ।” 17 अझै खीजी छ बिइमुँ, “चमैंए पाप नेरो आछ्याँबै केमैं ङइ धबै खोंयोंइ मैंरिब् आरे।” 18 छतसि ताँन् पाप क्षमा तयाबइले तारे पापए ल्हागिर अर्को ख्रो आचैदि। परमेश्वरए चेंदो ह्याले 19 छतसि ओ अलि-अङाँमैं, येशूए कोजी लमा “ताँन् भन्दा पबित्र क्ल्ह्योर” होंबै भों ङ्योइ योंइमुँ। 20 ङ्योए ल्हागिर छारा नेरो खोंयोंइ आखाँबै छ्ह योंबै घ्याँ खीजी थोंमिंइ। खीए ज्यु ख्रो पिंबइले ङ्यो पर्दउँइँले तसि “ताँन् भन्दा पबित्र क्ल्ह्योर” होंल् खाँम्। 21 परमेश्वरए म्हिमैंलाइ छेनाले छैं लबै ल्हागिर ङ्योए खेगि क्रथे घ्रि मुँ। 22 छतसि ङ्योए आछ्याँबै सैंमैं चोखो लसि पबित्र क्युइ ङ्योए ज्यु ख्रुमिंइ, छतसि छ्याँबै सैंइ खीए फिर बिश्वास लसि खीए फिर सैं केंसि ङ्यो परमेश्वरए उँइँर ह्याले। 23 ङ्योइ खीए फिर बिश्वास लसि थेंबै आशार सैं ङ्हिरि आलल्ले भोंसि तसि टिले, तलेबिस्याँ ङ्योने बाछा फैबै परमेश्वर भर लल् खाँब मुँ। 24 घ्रिइ घ्रिलाइ म्हाँया लदै छ्याँबै के लरिबै ल्हागिर ङ्योइ खैले चमैंए सैं भोंन् लमिंब च ताँ सैंर मैंले। 25 को-कोइल संगतिर आह्याबै बानि तम्, दिलेया प्रभु युबै त्हिंइ चेंदोन् मुँ बिब क्हेमैंइ सेबइले घ्रिइ घ्रिलाइ संगतिर ह्याल् त्हुम् बिदै ङ्यो ताँन् खागु तब आपिले। 26 तलेबिस्याँ क्ह्रोसंन्बै ताँ सेसेया ङ्योइ ह्रना-ह्नन् पाप लइ बिस्याँ पाप त्होमिंबै ल्हागिर तारे अरू ख्रो आरे। 27 बरु ङ्हिंन् ङ्हाँबै दण्ड पैंसि टिल् त्हुम्, धै परमेश्वरए बिरोध लब्मैंलाइ नास लवाबै मिए राबा मत्त्रे तब्मुँ। 28 मोशाइ प्ह्रिबै ठिम आम्हाँदिबै म्हिए बारेर म्हि ङ्हिंदे सोंदेए ग्वाइ तइ बिस्याँ च म्हि ल्हयो आयोंल्ले सिल् त्हुम्। 29 छतसि क्हेमैं ह्रोंसन् मैंन्दि: को-कोइ परमेश्वरए च्हलाइ प्हलेइ प्लेम्। धै परमेश्वरजी बाछा फैबै कोइ चमैंलाइ पापउँइँले पबित्र लमिंलेया चमैंइ च को तो धोंइ आङ्हाँ। धै ह्रोंसलाइ दयाम्हाँया लबै पबित्र प्ल्हए आब्रु वाम्। छाबै म्हिइ झन् कति थेबै दण्ड योंलै। 30 तलेबिस्याँ “बदला किंबै के ङल् ग, म्हिमैंइ खैबै के लइमुँ छाबन् नों ङइ पिंम्।” बिब परमेश्वरन् ग बिसि ङ्योइ सेइमुँ। खीजी धबै बिइमुँ, “याहवेहजी खीए म्हिमैंए निसाफ लब्मुँ।” 31 सोगों परमेश्वरए योर फेब ङ्हिंन् ङ्हाँबै ताँ ग। 32 च ह्याबै त्हिंइमैं मैंन्, परमेश्वरए चारबै ह्वे योंबै लिउँइँ खैबै दुःख योंलेया क्हेमैं बिश्वासर भोंसि तइ टिल। 33 खोंयों म्हिमैंइ क्हेमैंए आब्रु वासि म्हि आच्हिल्ले पोंइ, खोंयों अरूमैंइ दुःख योंमा क्हेमैं या चमैंनेन् दुःख योंल् त्हुइ। 34 झेलर मुँब्मैंलाइ क्हेमैंइ ल्होमिंइ, ह्रोंसए सै न्होर अरूमैंइ लुडिवालेया क्हेमैं सैं तोंसिन् सैदिइ, तलेबिस्याँ क्हेमैंल च सै न्होर भन्दा थेब खोंयोंन् बिलै तरिबै स्वाबै सै न्होर मुँ बिसि क्हेमैंइ सेल। 35 छतसि क्हेमैंइ लबै बिश्वास आपिद्, क्हेमैंए ल्हागिर थेबै इनाम मुँ। 36 परमेश्वरजी बिब् धोंले के लब नेरो खीजी बाछा फैसि पिंम् बिबै सै योंबै ल्हागिर क्हेमैं बिश्वासर भोंसि तइ टिल् त्हुम्। 37 तलेबिस्याँ “तारे तिस्यार्न युम् बिबै येशू युब्मुँ, खी युबर क्हैल् लरिब् आरे। 38 ङए उँइँर ठिक के लबै म्हि बिस्याँ बिश्वासउँइँलेन् सोरिब्मुँ, दिलेया च ङ ङाँइले स्योयास्याँ ङ चने तोंरिब् आरे।” 39 दिलेया ङ्यो लिउँइँ स्योसि नास तब्मैं न्होंर्बै आङिं, ङ्योम् बिश्वास लसिन् सोरिब्मैं न्होंर्बै ग। |
© 2020, Wycliffe Bible Translators, Inc. All rights reserved.
Wycliffe Bible Translators, Inc.