प्रस्थान 10 - परमेश्वरए ताँ तमु क्युइर८. तिरिमैंउँइँले खबै दु:ख 1 याहवेहजी धबै मोशाने “फारो ङाँर ह्याद्,” बिइ। “तलेबिस्याँ चमैंए म्हाँजोर ङए चु औदिबै चिनुमैं उँइँरिगे बिसि ङइ च नेरो चए के लब्मैंए सैं सारो लमिंब् ग। 2 छ लमा ङइ मिश्रीमैं म्हाँजोर खै-खैबै चिनुमैं उँइँइ बिसि क्हिए च्ह क्वेमैंने बिब्मुँ, झाइले याहवेह ङन् ग बिसि क्हेमैंइ सेब्मुँ।” 3 छतसि मोशा नेरो हारून फारो ङाँर ह्यासि चने बिइ, “हिब्रूमैंए याहवेह परमेश्वरजी क्हिने ‘खोंयों समा क्हि च्योंने तसि ङइ बिब् आङिं?’ बिइ। ‘ङए सेवा लरिगे बिसि ङए म्हिमैं ह्याल् पिंन्। 4 क्हिइ ङए म्हिमैं ह्याल् आपिंस्याँ प्हन्हाँग ङइ क्हिए ह्युलर तिरिमैं पखब्मुँ। 5 तिरिमैंइ स आम्रोंन्ले हुवाब्मुँ। तिस्युउँइँले जोगेसि ङैबै सैमैं नेरो क्ह्योंर म्लोबै ताँन् सिधुँए प्होमैं चमैंइ चवाब्मुँ। 6 क्हिए धिंर, क्हिए के लब्मैंए धिंमैंर नेरो ताँन् मिश्रीमैंए धिंमैंर तिरिइ प्लिंब्मुँ। च्हौ ल्हें दु:ख क्हिए खेमैंइ तिंयाँ समा खोंयोंन् बिलै आम्रोंल,’ बिइ।” च्हौ बिसि मोशा फारो ङाँइँले त्होंसि ह्याइ। 7 फारोए के लब्मैंइ चने “खोंयों समा चुइ ङ्योलाइ दुःख पिंमुँ?” बिइ। “मिश्र ह्युल नास तयाइ बिब क्हिइ आसेइमुँ वा? च म्हिमैंलाइ खेंमैंए याहवेह परमेश्वरए सेवा लबर ह्याल् पिंन्।” 8 झाइले फारोए म्हिमैंइ मोशा नेरो हारून फारो ङाँर पखइ। फारोइ चमैंने बिइ, “ह्यासि क्हेमैंए याहवेह परमेश्वरए सेवा लद्। दिलेया ह्याब्मैं खा-खाब्मैं जा?” 9 मोशाइ बिइ, “ङि, ङिए कोलोमैं, खेब् माँब्मैं, च्ह च्हमिमैं, र-क्युमैं नेरो खेदोमैं किंसि ह्याब्मुँ, तलेबिस्याँ ङिइ याहवेहए ल्हागिर चाड म्हाँदिल् त्हुम्।” 10 फारोइ बिइ, “ङइ च्हमिरिमैं नेरो कोलोमैं क्हेमैंने ह्याल् पिंम् बिस्याँ क्हेमैंए रक्षा लबर याहवेह क्हेमैंनेन् मुँल् त्हुम्! तलेबिस्याँ क्हेमैंए सैंर आछ्याँब ताँमैं मुँ। 11 छ आत! क्हेमैं ह्यासि याहवेहए सेवा लदा ङ्हाँम। छतसि मुँयुँमैं मत्त्रे बोसि ह्याद्।” झाइले फारोए म्हिमैंइ मोशा नेरो हारून फारो ङाँइँले ल्हावाइ। 12 छतमा याहवेहजी मोशाने बिइ, “तिरिमैं मिश्रर खसि तिस्युइ आस्याबै म्रोंर्बै प्याँ-पिं ट्हा-ट्हुमैं ताँन् चवारिगे बिसि मिश्र ह्युलउँइँ ह्रोंसए यो स्योंन्।” 13 छबिमा मोशाइ ह्रोंसए प्हरे मिश्रए फिर स्योंमा याहवेहजी च त्हिंइ नेरो म्हुँइँसा मिश्रर स्यारउँइँले खैं खमिंइ। झाइले न्हाँग तमा स्यारबै खैंइ तिरिमैं पखइ। 14 तिरिमैं मिश्रर खसि ह्युल तिगोंन् टिइ। च्हौ ल्हें तिरि चु भन्दा ओंसों खोंयोंन् बिलै आखल, लिउँइँज्यै या धबै खरिब् आरे। 15 तिरिइ ताँन् क्ल्ह्यो म्लोंगि ब्योंन्ले हुवाइ। धै तिस्युइ आस्याबै मिश्रर्बै ताँन् प्याँ पिं ट्हा ट्हुमैं नेरो सिंधुँर्बै रोमैं तोइ आचैल्ले चवाइ। 16 छतमा फारोइ मोशा नेरो हारून युनन् हुइबर कुलसि “ङइ क्हेमैंए याहवेह परमेश्वर नेरो क्हेमैंए बिरोधर पाप लइ,” बिइ। 17 “छतसि तारे ङ यो छ्युँ लमुँ, ङए पाप तोगोइन क्षमा लद्, धै ङए फिर तखबै चु दुःख खीजी स्योमिंरिगे बिसि क्हेमैंए याहवेह परमेश्वरने यो छ्युँ लसि प्राथना लद्।” 18 छबिमा मोशा फारो ङाँइँले त्होंइ ह्यासि याहवेहने यो छ्युँ लसि प्राथना लइ। 19 झाइले याहवेहजी छ्यो न्हुउँइँले (पश्चिमउँइँले) बेल्ले थेबै खैं खमिंइ, खैंइ तिरिमैं सुएज बिबै मा ङ्युँइउँइँ नोबोइ। मिश्रर तिरि घ्रि या आचै। 20 दिलेया याहवेहजी फारोए सैं सारो लमिंमा चइ इस्राएलीमैं ह्याल् आपिं। ९. मि आम्रोंबै दु:ख 21 याहवेहजी धबै मोशाने बिइ, “छुइमा या था सेबै मिछु खैब मिश्रर तयारिगे बिसि क्हिए यो मुउँइँ स्योंन्।” 22 छबिमा मोशाइ ह्रोंसए यो मुउँइँ स्योंमा मिश्रर सोंगैं समा मिछु खैयाइ। 23 सोंगैं समा मिश्रीमैंइ खाबै म्रोंल् आखाँ, खाबै या ह्रोंसए क्ल्ह्योउँइँले प्रल् आखाँ दिलेया इस्राएलीमैं टिबै क्ल्ह्योर बिस्याँ मि म्रोंरिल। 24 छतमा फारोइ मोशालाइ हुइसि बिइ, “क्हेमैं ह्यासि याहवेहए सेवा लद्! क्हेमैंए च्हमिरिमैं नेरो कोलोमैं या क्हेमैंने ह्यारिगे, दिलेया र-क्युमैं नेरो खेदोमैं मत्त्रे वाथेंन्।” 25 छबिमा मोशाइ बिइ, “ङिए याहवेह परमेश्वरए ल्हागिर ख्रो पिंबर ङिए योर ख्रो पिंबै सैमैं नेरो मिइ ख्रोंबै ख्रोमैं हिइ बोल् पिंल् त्हुम्। 26 खेदोमैं न्होंर्बै को-कोइ ङिइ ह्रोंसए याहवेह परमेश्वर म्हाँदिबर ख्रो पिंल् त्हुम्। ङि चर आफेन् समा याहवेहए मिंर तो तो ख्रो पिंल् त्हुम् बिसि ङिइ आसे। छतसि ङिए खेदोमैं ङिने बालुन् बोयाब्मुँ।” 27 दिलेया याहवेहजी फारोए सैं सारो लमिंमा फारोइ चमैं ह्याल् आपिं। 28 फारोइ मोशाने बिइ, “ङ ङाँइँले ह्याद्। न्ह क्रो मिं क्रोले टिसि ङए ओंसों धबै आखो। तलेबिस्याँ क्हिइ ङए लि ङ्ह्योबै त्हिंइर्न क्हि सिब्मुँ।” 29 मोशाइ बिइ, “क्हिइ बिब् धोंलेन् तरिगे, ङ धबै क्हिए लि खोंयोंन् बिलै ङ्ह्योरिब् आरे।” |
© 2020, Wycliffe Bible Translators, Inc. All rights reserved.
Wycliffe Bible Translators, Inc.