Yeremia 26 - Ṅmãle̱ Kroṅkroṅ Le̱

¹ Iuda maṅtše̱ Iehoiakim, Iosia bi le̱, maṅtše̱yeli le̱ šišidšē mli ne̱ke̱ wiemo̱ ne̱ dše̱ Iehowa ṅõ ba ake̱:

² Bo̱ni Iehowa kē̱ ne̱: Yadamo̱ Iehowa we le̱ kpo le̱ no̱, ni Iuda mãdši le̱ fẽ ní baä dšámo̱ ye̱ Iehowa we le̱, okē̱ame̱ wiemo̱i fẽ ní mifã́o ake̱ owie otšõame̱ le̱; kādšie wiemo̱ kome ye̱ mli!

³ Ekole̱ aleenõ *ame̱abo toi, ni ame̱teṅ mofẽmo aakũ ese̱ ke̱-adše̱ egbe̱ fõṅ le̱ no̱, ni maſa mihe ye̱ efõṅ ní misusu ake̱ mafeamo̱ ye̱ amenifemo̱nii fõdši le̱ ahewo̱ le̱ he. *36,3.

⁴ Ni okē̱ame̱ ake̱: Bo̱ni Iehowa kē̱ ne̱: Ke̱dši nyeboomi toi, ní nyenyie mimla ní miṅõ-to nyehĩe le̱ mli,

⁵ ní nyebo mitšũdši, gbalo̱i le̱, ní mitšũo̱ nyeṅõ, ni miteo̱ ši lebi mā̃ṅkpa mitšũo̱ame̱, ši nyeboo toi le̱, awiemo̱i le̱ atoi le̱: 25,4.

⁶ no le̱ mafe ne̱ke̱ šīa ne̱ *tamo̱ Šilo, ni mahã ne̱ke̱ maṅ ne̱ atšṍ lōmo̱ ahã šikpoṅ le̱ no̱ mãdšimãdši fẽ! *7,12-14. 1 Sam. 4,4. 12.

⁷ Ni oso̱foi le̱ ke̱ gbalo̱i le̱ ke̱ maṅ mū le̱ fẽ nu ní Ieremia miwie ne̱ke̱ wiemo̱i ne̱ ye̱ Iehowa we le̱.

⁸ Ni eba mli ake̱, beni Ieremia ewie wiemo̱ fẽ ní Iehowa fã́le̱ ake̱ ewie etšõ maṅ mū le̱ fẽ le̱ egbe nā le̱, oso̱foi le̱ ke̱ gbalo̱i le̱ ke̱ maṅ mū le̱ fẽ mõle̱ ame̱kē̱: Dša ogbo!

⁹ Mẽhewo̱ ogba ye̱ Iehowa gbe̱i amli ake̱: Ne̱ke̱ šĩa ne̱ aatšṍ tamo̱ Šilo, ni ne̱ke̱ maṅ ne̱ aatšṍ amaṅfõ ni moko ehĩṅ mli doṅṅ le̱? Ni maṅ mū le̱ fẽ nā bakpe ši ame̱wo Ieremia he ye̱ Iehowa we le̱.

¹⁰ Ni beni Iuda lume̱i le̱ nu ne̱ke̱ sãdši ne̱ le̱, ame̱dše̱ maṅtše̱ we le̱ ke̱-ba Iehowa we le̱, ni ame̱batrá ši ye̱ Iehowa we le̱ agbó hē le̱ nā.

¹¹ Ke̱ke̱ ni oso̱foi le̱ ke̱ gbalo̱i le̱ kē̱ lume̱i le̱ ke̱ maṅ mū le̱ fẽ ake̱: Nū ne̱ sa gbĕle; edšake̱ egba *eši maṅ ne̱, take̱ bo̱ni nyedientše̱ nyenu ke̱ nyetoii le̱! *Bo̱f. 6,13.

¹² Ke̱ke̱ ni Ieremia kē̱ lume̱i le̱ fẽ ke̱ maṅ mū le̱ fẽ ake̱: Iehowa tšũmi ake̱ mibagba wiemo̱i ní nyenu le̱ fẽ miši šĩa ne̱ ke̱ maṅ ne̱.

¹³ Nohewo̱ le̱ agbe̱ne̱ nyesāa nyegbè̱i ke̱ nyenifemo̱nii le̱, ni nyeboa Iehowa, nye-Nyoṅmo̱ le̱, gbē toi, ni Iehowa aaſa ehe ye̱ nõfõṅ ní ewie ye̱ nyehe le̱ he-wo̱! 7,8.

¹⁴ Ši mi le̱, na, miye̱ nyedeṅ: nyefeami bo̱ni hĩ ke̱ bo̱ni dša ye̱ nyehĩe;

¹⁵ le ke̱ke̱ nyelea ake̱, ke̱dši nyegbemi le̱, lá ní efeko noko nyebalō nyeſie nye ke̱ maṅ ne̱ ke̱ emli bii le̱ ano̱; edšake̱ eye̱ mli le̱le̱ṅ ake̱ Iehowa tšũmi nyeṅõ, koni mibawie ne̱ke̱ wiemo̱i ne̱ fẽ ye̱ nye-toiiaṅ!

¹⁶ Ke̱ke̱ ni lume̱i le̱ ke̱ maṅ mū le̱ fẽ kē̱ oso̱foi le̱ ke̱ gbalo̱i le̱ ake̱: Nū ne̱ esaa gbĕle; edšake̱ Iehowa gbe̱i amli ewie etšõwo̱ ye̱.

¹⁷ Ni šikpoṅ le̱ no̱ onukpai le̱ ateṅ meikomei te ši, ni ame̱kē̱ maṅ le̱ gwabō̱ mū le̱ fẽ ake̱:

¹⁸ Mikaia, Moraštinyo le̱, gba ye̱ Iuda maṅtše̱ Hezekia yino̱, ni eke Iuda maṅ mū le̱ fẽ ake̱: Bo̱ni Iehowa Zebaot kē̱ ne̱: Aahũ Zion tamo̱ ahũo̱ ṅmõ, ni Ierusalem aatšṍ kóikói, ni šĩa le̱ goṅ le̱ aatšṍ kōṅ he groṅṅ ko! Mika 3,12.

¹⁹ Ani gbe Iuda maṅtše̱ Hezekia ke̱ Iuda fẽ gbĕle̱? Ani dšee Iehowa gbeyei moṅ eše ni etao Iehowa hĩegbe̱, ni Iehowa hũ *ſa ehe ye̱ efõṅ ni ewie eši-ame̱ le̱ hewo̱? Ni wo̱ le̱ wo̱o̱fe efõṅ kple ne̱ wo̱ši wo̱susumai lo? *18,8.

²⁰ Ni asaṅ nū ko ye̱ ni gbaä ye̱ Iehowa gbe̱i amli, Uria, Šemaia bi, ni dše̱ Kiriat-Iearim le̱, ni egba eši maṅ ne̱ ke̱ šikpoṅ ne̱ bo̱ pe̱ ní Ieremia wie ne̱.

²¹ Ni beni maṅtše̱ Iehoiakim ke̱ ekãkãlo̱i le̱ fẽ ke̱ elumei le̱ fẽ nu ewiemo̱i le̱, maṅtše̱ le̱ taole̱ agbe. Ši beni Uria nu le̱, eše gbeyei, ni edšo foi ete Mizraim.

²² Ni maṅtše̱ Iehoiakim tšũ hĩĩ komei ke̱-te Mizraim, ame̱dši Elnatan, Akbor bi le̱, ke̱ meikomei ní fata ehe, ni ame̱te Mizraim;

²³ ni ame̱yakpla Uria ke̱-dše̱ Mizraim, ni ame̱ke̱le̱ ba maṅtše̱ Iehoiakim ṅõ, ni egbele̱ ke̱ klante, ni eše̱ egbonyo le̱ efõ maṅbii le̱ agbohĩĩabui le̱ ano̱.

²⁴ Ši *Ahikam, Šafan bi le̱, nine kã Ieremia he, koni akatule̱ awo maṅ le̱ deṅ ni agbele̱. *2 Maṅ. 22,12.