Yeremia 19 - Ṅmãle̱ Kroṅkroṅ Le̱

¹ Bo̱ni Iehowa kē̱ ne̱: Ya ní oyahe gbe̱šõlo̱ sũ kpulu ko, ni oṅõ maṅ le̱ mli onukpai le̱ ke̱ oso̱foi le̱ ateṅ onukpai le̱ ekomei ofata ohe,

² ni odše kpo ke̱-ya *Hinom bi le̱ dšō̱ le̱ ní yo̱ gbe̱šõlo̱i le̱ agbó le̱ nā le̱ mli, ni oyašie̱ wiemo̱i ní makē̱o le̱ ye̱ dše̱i, *K. 11. Y. 7,31.

³ ni okē̱: Nyeboa Iehowa wiemo̱ toi, nye Iuda maṅtše̱mei ke̱ Ierusalembii! Bo̱ni Iehowa Zebaot, Israel Nyoṅmo̱ le̱, kē̱ ne̱: Na, mike̱ *efõṅ baba bie̱ ne̱ no̱, ní mofẽmo ní aanu he le̱ etoii amli aafele̱ heṅṅ; *1 Sam. 3,11. 2 Maṅ. 21,12.

⁴ edšake̱ ame̱kwami, ni ame̱tšake bie̱ ne̱, ni ame̱šã tšofã-ke̱-ṅma ye̱ mli ame̱-hã nyoṅmo̱i krokomei, ní ame̱ ke̱ ame̱tše̱mei le̱ ke̱ Iuda maṅtše̱mei le̱ lee, ni ame̱wo bie̱ ne̱ obõ ke̱ mei ni efeko noko le̱ alá;

⁵ ni ame̱mãmo̱ Baal hei groṅṅi le̱, ni ame̱ke̱ la šãa *ame̱bii le̱ ame̱ṅõ-feo̱ šā̃-afo̱lei ame̱hãa Baal, noni mifã́ko, ni miwieko he hũ, ni esā ebako midſẽṅmo̱ mli le̱. *7,31. 32.

⁶ Nohewo̱ le̱ na, gbĩĩ mība, Iehowa kē̱, ni atšé̱ṅ bie̱ ne̱ Tofet lo Hinom bi le̱ dšō̱ doṅṅ, ši moṅ aatšé̱le̱ awuyeli dšō̱.

⁷ Ni mahã Iuda ke̱ Ierusalem adšina le̱ afe yaka ye̱ bie̱ ne̱, ni mahã ame̱nyõnyõi ye̱ klante nā ye̱ ame̱henye̱lo̱i ahĩe ke̱ mei ní taoo̱ ame̱susuma se̱gbe̱ le̱ adeṅ, ni maṅõ *ame̱gbohĩĩ le̱ mahã ṅwei lofõdši ke̱ šikpoṅ no̱ koloi ni ame̱ye; *7,33.

⁸ ni mahã maṅ ne̱ atšṍ amaṅfõ ke̱ noni hãa aboo̱ tšia: *mofẽmo ní aaho ye̱ dše̱i le̱ ehe aadšõ ehe ni eebo tšia ye̱ ame̱manehũlũ le̱ so̱ṅṅ hewo̱. *18,16.

⁹ Ni mahã *ame̱ye ame̱bihĩĩ alō ke̱ ame̱biyei alō, ni ame̱teṅ mofẽmo aaye enanyo lō, ye̱ yisamo̱ ke̱ fĩmo̱ ní ame̱henye̱lo̱i le̱ ke̱ mei ní taoo̱ ame̱susuma se̱gbe̱ le̱ bahã afĩame̱ le̱ mli! *5 Mose 28,53.

¹⁰ Ke̱ke̱ ni odſa kpulu le̱ ye̱ hĩĩ le̱ ni ke̱o yaä le̱ ahĩe,

¹¹ ni okē̱ame̱ ake̱: Bo̱ni Iehowa Zebaot kē̱ ne̱: *Ne̱ke̱ noṅṅ madſa ne̱ke̱ maṅbii ne̱ ke̱ ne̱ke̱ maṅ ne̱, take̱ bo̱ni adſaä gbe̱šõlo̱ gbé̱ ní ehĩĩ tšăramo̱ doṅṅ le̱; ni aafũame̱ ye̱ †Tofet, edšake̱ gbe̱ be̱ hekoheko doṅṅ. *Ies. 30,14. †Ier. 7,32.

¹² Ne̱ke̱ mafe bie̱ ne̱ ke̱ bie̱bii le̱, Iehowa kē̱, ni mafe maṅ ne̱ tamo̱ Tofet.

¹³ Ni Ierusalem šĩai le̱ ke̱ Iuda maṅtše̱mei le̱ ašĩai le̱ aabuleame̱ tamo̱ heni Tofet yo̱ le̱, šĩai le̱ fẽ ni ame̱šãšā̃ tšofã-ke̱-ṅma ye̱ *ame̱yiteaṅ ame̱bã ṅwei asafo le̱ fẽ, ni ame̱ye ṅkpai ye̱ mli ame̱hã nyoṅmo̱i krokomei le̱. 32,29. Zef. 1,5.

¹⁴ Ke̱ke̱ ni beni Ieremia dše̱ Tofet, heni Iehowa tšũle̱ ake̱ eyagba le̱, eba ni ebadamo̱ Iehowa we le̱ kpo le̱ no̱, ni ekē̱ maṅ mū le̱ fẽ ake̱:

¹⁵ Bo̱ni Iehowa Zebaot, Israel Nyoṅmo̱ le̱, kē̱ ne̱: Na, mike̱ efõṅ fẽ ní miwie ye̱ ne̱ke̱ maṅ ne̱ ke̱ ehe mãdšimãdši le̱ fẽ he le̱ baba ame̱no̱, edšake̱ ame̱fe ame̱he kue̱ṅtilo̱i, koni ame̱kabo miwiemo̱i le̱ atoi.