Ezekiel 1 - Ṅmãle̱ Kroṅkroṅ Le̱

¹ Ni eba mli ye̱ afi ní dši nyoṅmai-etẽ le̱ no̱ ye̱ nyõṅ ní dši edſe̱ le̱ no̱ gbĩ ní dši gbĩ enumo̱ le̱ no̱, beni miyo̱ nomi le̱ ateṅ ye̱ *Kebar fā le̱ nā le̱ ake ṅwei gble, ni mina Nyoṅmo̱ he nināi. *10,15

² Nakai nyõṅ le̱ no̱ gbĩ ní dši gbĩ enumo̱ ye̱ maṅtše̱ *Iehoiakin nomṅō̃ afi ní dši enumo̱ le̱ no̱ le̱, *2 Maṅ. 24,15.

³ Iehowa wiemo ba oso̱fo Ezekiel, Busi bi le̱, ṅõ ye̱ Kaldeabii le̱ ašikpoṅ le̱ no̱ ye̱ Kebar fā le̱ nā, ni Iehowa nine ba eno̱ ye̱ dše̱i.

⁴ Ni mikwe̱, ni na, lasũogbĕle ko fã ke̱-dše̱ kōyigbe̱, atatu kple, ke̱ la ní efĩ tó̱o, ni kpe̱mo̱ ebo̱le he ke̱-kpe, ni eteṅgbe̱ hũ noko dšeo̱ kpo tamo̱ šika ní kpe̱o̱ su ye̱ la le̱ teṅ. Y. 10 Kpods. 4,6-8.

⁵ Ni hĩekãlo̱i edſe̱ subãṅ dšeo̱ kpo ye̱ eteṅ; ni bo̱ni ame̱su yo̱ ne̱: ame̱hĩe gbomo subãṅ;

⁶ ni mofẽmo ye̱ hĩei edſe̱, ni ame̱teṅ mofẽmo ye̱ fĩdši edſe̱;

⁷ ni ameãādši le̱ nãdši trõmō̃i ni, ni ame̱nãdši ašiši tamo̱ tšina nanešiši, ni ame̱-he kple̱o̱ tamo̱ akō̱ble ní aša he kãṅkãṅ;

⁸ ni ame̱hĩe gbomo nidši ye̱ ame̱fīdši le̱ ašiši ye̱ ame̱mase̱ii edſe̱ le̱, ni ame̱yi edſe̱ le̱ bo̱ni ame̱hĩeaṅ ke̱ ame̱fĩdši le̱ ye̱ ne̱;

⁹ ame̱fĩdši le̱ eko ke̱ eko tša; ké̱ ame̱mīnyie le̱, ame̱tšṍmo̱o̱ ame̱he: ame̱teṅ mofẽmo nyieo̱ ke̱-yaã ehĩe tē̃.

¹⁰ Ni ame̱hĩe tamo̱ gbomo hĩe, ni ame̱yi edſe̱ le̱ ame̱hĩe dšata hĩe ye̱ ame̱nine-dšŭrõgbe̱, ni ame̱yi edſe̱ le̱ ame̱hĩe tsine hĩe ye̱ ame̱be̱kugbe̱, ni ame̱yi edſe̱ le̱ ame̱hĩe okropoṅ hĩe hũ.

¹¹ Ni ame̱hĩei ke̱ ame̱fīdši le̱ adšadšā mli ye̱ yiteṅgbe̱; mofẽmo fĩdši enyo̱ tša, ni enyo̱ hũ ame̱ke̱-hahā ame̱gbomo-tšei le̱ ahe.

¹² Ni mofẽmo nyieo̱ ke̱-yaä ehĩe tē̃; *heni mumo̱ le̱ yaä le̱, dše̱i ame̱yaä; ké̱ ame̱mīnyie le̱, ame̱tšṍmo̱o̱ ame̱he. *K. 20.

¹³ Ni hĩekãlo̱i le̱ ateṅ le̱ noko dšeo̱ kpo tamo̱ ṅãi la ní tšoo̱ tamo̱ ko̱tii, ni enyienyieo̱ ye̱ hĩekãlo̱i le̱ ateṅ; ni la le̱ kpe̱o̱, ni srawa dše̱o̱ la le̱ mli.

¹⁴ Ni hĩekãlo̱i le̱ šaä foi ke̱-yaä ke̱-baä tamo̱ srawa gbaä.

¹⁵ Ni beni mikwe̱ hĩekãlo̱i le̱, na kokrolonto komekome mãmo̱ šikpoṅ le̱ ye̱ hĩekãlo̱i le̱ amase̱i ye̱ ame̱hĩei edſe̱ le̱.

¹⁶ Kokrolontoi le̱ asu ke̱ ame̱femo̱ tamo̱ Taršiš-te̱ su, ni ame̱yi edſe̱ le̱ ame̱hĩe subãṅ kome, ni ame̱su ke̱ ame̱femo̱ tamo̱ noni kokrolonto ho̱ kokrolonto teṅ.

¹⁷ Ké̱ ame̱mīnyie le̱, ame̱nyieo̱ ame̱-kodši edſe̱ le̱ no̱, ni ké̱ ame̱mīnyie le̱, ame̱tšṍmo̱o̱ ame̱he.

¹⁸ Ame̱gai le̱ kwŏ̱lo̱ ni ame̱he ye̱ gbeyei; ni ame̱gai le̱ ahe eyimo̱ to̱ ke̱ hĩṅme̱ii ke̱-bo̱le ame̱yi edſe̱ le̱ fẽ ke̱-kpe.

¹⁹ Ni kē̱ hĩekãlo̱i le̱ mīnyie le̱, kokrolontoi le̱ hũ nyie ame̱mase̱i; ni ké̱ hĩekãlo̱i le̱ hole ame̱he no̱ ke̱-dše̱ šikpoṅ le̱, bĕle̱ kokrolontoi le̱ hũ ehole ame̱he no̱.

²⁰ Hefẽhe ní mumo̱ le̱ yaä le̱, dše̱i ame̱yaä; ni kokrolontoi le̱ ke̱ame̱ holeo̱ ame̱he no̱ šikōme; edšake̱ hĩekãlo̱i le̱ amumo̱ ye̱ kokrolontoi le̱ amli. K. 12.

²¹ Ké̱ nomei mīnyie le̱, bĕle̱ ene̱mei hũ mīnyie; ni ké̱ nomei wa damo̱ ši le̱, bĕle̱ ene̱mei hũ ewa edamo̱ ši; ni ké̱ nomei hole ame̱he no̱ ke̱-dše̱ šikpoṅ le̱, bĕ̱le̱ kokrolontoi le̱ hũ ke̱ame̱ ehole ame̱he no̱ šikōme; edšake̱ hĩekãlo̱i le̱ amumo̱ ye̱ kokrolontoi le̱ amli.

²² Ni noko ye̱ hĩekãlo̱i le̱ ayiteṅ tamo̱ atatu ní tamo̱ aſiſe̱ hãlãhãlã ní alē̱ mli akete ame̱yiteṅ ye̱ ṅwei. 2 Mose 24,10.

²³ Ni ame̱fĩdši le̱ dša trõmō̃ ye̱ atatu le̱ šiši, eko mikwe̱ eko hĩe, ni mofẽmo ye̱ enyo̱ ní haä ame̱gbomotšei ahe.

²⁴ Ké̱ ame̱mīnyie le̱, minuo̱ ame̱fĩdšiaṅ gbē̱mo̱ tamo̱ nu babaō gbē̱mo̱, tamo̱ Ofe le̱ gbē, hōfemo̱ gbē ní tamo̱ ta gbē,; ši ké̱ ame̱wa ame̱damo̱ ši le̱, bĕle̱ ame̱ṅmē̃ ame̱fĩdši le̱ ahe ame̱ſie ši.

²⁵ Ni ké̱ ame̱wa ame̱damo̱ ši ni ame̱ṅmē̃ ame̱fĩdši ahe ame̱ſie ši le̱, gbē dše̱o̱ atatu ní yo̱ ame̱yiteṅ le̱ mli.

²⁶ Ni noko ní tamo maṅtše̱sẽi ní esu tamo̱ safiro-te̱ dšeo̱ kpo ye̱ atatu ní yo̱ ame̱yiteṅ le̱ no̱, ni ké̱ akwe̱ le̱, noko ní tamo̱ gbomo ye̱ noko ní tamo maṅtše̱sẽi le̱ no̱ ye̱ yiteṅgbe̱. K. 22.

²⁷ Ni mina ake̱ edšidše tamo̱ šika ní kpe̱o̱; ni ke̱-dše̱ ehe su le̱ no̱ ke̱-yaä ṅwei-gbe̱ le̱ la ebo̱lele̱ ke̱-kpe, ni asaṅ ke̱-dše̱ ehe̱ su le̱ no̱ ke̱-kplekeo̱ ši le̱ mina ake̱ etamo̱ la, ní kpe̱mo̱ ebo̱lele̱ ke̱-kpe.

²⁸ Bo̱ni kwābue̱te̱ ní yo̱ atatu mli ye̱ nyoṅmo̱ne̱mo̱ gbĩ no̱ le̱ su yo̱ le̱, nakai kpe̱mo̱ ní bo̱lele̱ ke̱-kpe le̱ yo̱. Ene̱ dši Iehowa anumnyam le̱ kpe̱mo̱ le̱ kpodšiemo̱. Ni beni mina le̱, miho migbē ši ni mike̱ mihĩe bu ši, ni minu moko ní wieo̱ gbē. Kpods. 4,3.