Ester 5 - Ṅmãle̱ Kroṅkroṅ Le̱

¹ Ni eba mli ake̱ gbĩ ní dši gbĩ etẽ le̱ no̱ le̱ Ester wo emaṅnye atadei, ni eyadamo̱ maṅtše̱ we le̱ mligbe̱ kpo le̱ no̱, ye̱ maṅtše̱ we le̱ ṅe̱le̱no̱; ni maṅtše̱ le̱ tá emaṅtše̱sẽi le̱ no̱ ye̱ maṅtše̱we le̱ šĩa le̱ nāgbe̱ le̱ ṅe̱le̱no̱.

² Ni eba mli ake̱, beni maṅtše̱ le̱ na maṅnye Ester damo̱ kpo le̱ no̱ le̱, ehīe ba nyam ye̱ ehĩe, ni maṅtše̱ le̱ *wó šika maṅtše̱tšo le̱ ní ehĩe le̱ ne̱ etšõ Ester. Ke̱ke̱ ni Ester tši be̱ṅke̱, ni eke̱ enine bata maṅtše̱tšo le̱ nābu. *4,11; 8,4.

³ Ni maṅtše̱ le̱ kē̱le̱ ake̱: Meni feo̱o, maṅnye Ester? ni meni hũ otaoo̱? Aahão āhũ ke̱-yaši maṅtše̱yeli le̱ mlidšā po.

⁴ Ni Ester kē̱: *Ke̱dši esa maṅtše̱ hĩe le̱, no le̱ maṅtše̱ ke̱ Haman aba okplõ ni miṅmẽo̱le̱ ṅme̱ne̱ le̱ he. *1,19.

⁵ Ke̱ke̱ ni maṅtše̱ le̱ kē̱: Nyeyatsē̱a Haman ke̱-baä mrãmrã, koni wo̱fe bo̱ni Ester kē̱ le̱! Ke̱ke̱ ni maṅtše̱ le̱ ke̱ Haman ba okplõ ní Ester eṅmẽ le̱ he.

⁶ Ni maṅtše̱ le̱ kē̱ Ester ye̱ wein okplõ le̱ he ake̱: *Meni obio̱? ni aahão; ni meni otaoo̱? Aafe ahão āhũ ke̱-yaši maṅtše̱yeli le̱ mlidšā po! *9,12.

⁷ Ke̱ke̱ ni Ester here no̱ ni ekē̱: Noni mibio̱ ní mitaoo̱ dši:

⁸ Ke̱dši mihĩe eba nyam ye̱ maṅtše̱ hĩe, ni ke̱dši esa maṅtše̱ hĩe ake̱ eehã noni mibio̱ le̱, ni eefe noni mitaoo̱ le̱, no le̱ maṅtše̱ ke̱ Haman aba okplõ ni mibaṅmẽame̱ le̱ he; ni wó̱ le̱ mafe bo̱ni maṅtše̱ kē̱ le̱.

⁹ Ke̱ke̱ ni Haman dše kpo nakai gbĩ le̱ ke̱ nyã́mo̱ ke̱ mliflimo̱. Ši beni Haman na Mordekai ye̱ maṅtše̱ koi le̱ ši ake̱ etee ši ehããle̱, ni asaṅ etšii ehe tete, Haman mli wo Mordekai la naakpa.

¹⁰ Ši kẽle̱ Haman ye ehe no̱, ni eyiṅ ete ewe le̱. Ke̱ke̱ ni etšũ ayatšé̱ enanemei ke̱ eṅã Zereš ke̱-ba.

¹¹ Ni Haman gbaame̱ enii ni ená le̱ he nyam ke̱ ebii ayifále̱ ke̱ bo̱ni maṅtše̱ le̱ ewole̱ onukpa ke̱ boni ewó eno̱ fè lume̱i le̱ ke̱ maṅtše̱ tšũdši le̱.

¹² Ni Haman sā kē̱ ake̱: Maṅnye Ester po hãã mokomoko ke̱ maṅtše̱ le̱ aba okplõ ni eṅmẽ le̱ he, ake̱ dša mi; ni wó̱ hũ ekpēmi ke̱ maṅtše̱ le̱ ke̱-mīya eṅõ.

¹³ Ši kẽle̱ ene̱ fẽ efeemi šī, gbĩĩabo̱ ni minaä Mordekai, Iudanyo le̱, tá maṅtše̱ koi le̱ ši ne̱.

¹⁴ Ke̱ke̱ ni eṅã Zereš ke̱ enanemei le̱ fẽ kē̱le̱ ake̱: Hã ní afe tšo ní kwo̱le̱ hĩe ninetalo̱i nyoṅmai-enumo̱, ni wō̱ le̱ okē̱ maṅtše̱ le̱, ní ase̱ṅ Mordekai ye̱ no̱. Ke̱ke̱ ni oke̱ maṅtše̱ le̱ aya okplõ le̱ he ke̱ nyã́mo̱! Ni wiemo̱ le̱ ṅõ Haman nā, ni ehã afe tšo le̱.