2 Samuel 8 - Ṅmãle̱ Kroṅkroṅ Le̱

¹ Ni ene̱ se̱ le̱ eba mli ake̱ David tſia Filistibii le̱ anii, ni eye ame̱no̱, ni David šõ maṅ wulu le̱ manyofle̱ le̱ ye̱ Filistibii le̱ adeṅ.

² Ni etſia Moab hũ nii, ni eke̱ susumo̱kpã susuame̱, ni ehã ame̱kãmo̱ šikpoṅ, ni ké̱ esusu susumo̱kpãi enyo̱ le̱, ehãa agbeo̱ame̱, ni ké̱ esusu susumo̱kpã kome le̱ ehãa ame̱yi náa wala. Ni Moabbii le̱ tšṍmo̱ David tšũdši, ame̱tšuo̱ onĩa ame̱hãa le̱.

³ Ni asaṅ David tſia Hadadezer, Rehob bi le̱, ni dši Zoba maṅtše̱ le̱, nii, beni eyiṅ ete ake̱ eyaple̱ ešikpoṅ ni ye̱ Eufrate fā le̱ nā le̱ he le̱.

⁴ Ni David mõmo̱ ekpo̱ṅo̱iatše̱mei akpe ke̱ ohai-kpawo, ke̱ nãdsiatše̱mei akpei-nyoṅmai-enyo̱; ni David *flo̱ ame̱ſīlii anā okpo̱ṅo̱i le̱ fẽ anãdši ase̱ fãi, ši ešĩ ame̱teṅ ſīlii oha nā okpo̱ṅo̱i. *Ios. 11,9.

⁵ Ši beni Arambii ni yo̱ Damasko le̱ ba Zoba maṅtše̱ Hadadezer yeli-ke̱-buamo̱ le̱, David gbe Arambii le̱ ateṅ mei akpei-nyoṅmai-enyo̱-ke̱-enyo̱.

⁶ Ni David ke̱ asrafoi to Damasko ní yo̱ Aram le̱, ni Arambii le̱ tšṍmo̱ David tšũdši ní tšuo̱ onĩa hãale̱. Ni Iehowa hãa David yeo̱ kũnim ye̱ hefẽhe ni eyaã.

⁷ Ni David šõ šika tše̱ṅi le̱ ní Hadadezer tšũdši le̱ hĩe le̱, ni eke̱-ba Ierusalem.

⁸ Ni maṅtše̱ David lõ akō̱ble babaō dientše̱ ye̱ Beta ke̱ Berotai, Hadadezer mãdši le̱ amli.

⁹ Ši beni Hamat maṅtše̱ Toi nu ake̱ David etſia Hadadezer ta le̱ fẽ nii le̱,

¹⁰ ke̱ke̱ ni Toi tšũ ebi Ioram ke̱-te maṅtše̱ David ṅõ, ni eyahãle̱ ahekō ni edšō̱le̱, ake̱-ní eke̱ Hadadezer ewu ni etſiale̱ nii le̱, edšake̱ Hadadezer ke̱ Toi ewuwū tai āhũ; ni ehīe dſie̱te̱i nibii ke̱ šika nibii ke̱ akō̱ble nibii ke̱-ba.

¹¹ Ene̱mei hũ maṅtše̱ David dšō̱ no̱ ke̱ Iehowa, ake̱fata dſie̱te̱i ke̱ šika ní dše̱ dšeṅmãdši fẽ ní eye ame̱no̱ le̱ adeṅ ni edšō̱ no̱ eke le̱ he:

¹² nomei dše̱ Aram ke̱ Moab ke̱ Amonbii le̱ ke̱ Filistibii le̱ ke̱ Amalek ke̱ Zoba maṅtše̱ Hadadezer, ní dši Rehob bi le̱, hānii le̱ amli.

¹³ Ni David gbe̱i hehe beni eyagbe Arambii le̱ ateṅ mei akpei-nyoṅma-ke̱-kpānyo̱ ye̱ Ṅō-dšō̱ le̱ mli ní ekũ ese̱ eba le̱. Lal. 60,2.

¹⁴ Ni eto asrafoi ye̱ Edom; Edom mū le̱ fẽ eto asrafoi ye̱ ke̱-kpe; ni Edombii fẽ tšṍmo̱ David tšũdši. Ni Iehowa hãa David yeo̱ kũnim ye̱ hefẽhe ni eyaã. 1 Mose 27,40.

¹⁵ Ni David ye Israel fẽ ne̱ maṅtše̱; ni David kodšoo̱ ni eyeo̱ dšale̱ sane ehãa maṅ le̱ fẽ.

¹⁶ Ni Ioab, Zeruia bi le̱, dši ta le̱ tše̱; ni Iehošafat, Ahilud bi le̱, dši sãdšiaṅmãlo̱; 20,23-26.

¹⁷ ni Zadok, Ahitub bi le̱, ke̱ Ahimelek, Abiatar bi le̱, dši oso̱foi; ni Seraia dši woloṅmãlo̱;

¹⁸ ni Benaia, Iehoiada bi le̱, dši *Keretifoi ke̱ Peletifoi le̱ atše̱; ni David bihĩĩ le̱ dši maṅtše̱ †súolo̱i. *16,18. 1 Sam. 30,11. †1 Kron. 18,17. 1 Maṅ. 4,5.