1 Samuel 28 - Ṅmãle̱ Kroṅkroṅ Le̱

¹ Ni eba mli ye̱ nakai gbĩĩ le̱ amli ake̱ Filistibii le̱ buabua ame̱taĩ le̱ anã, nĩ ame̱bo̱ nsra ni ame̱ke̱ Israel ayawu. Ni Akiš kē̱ David ake̱: Ná ole ake̱ oke̱mi baya ta le̱, bo ke̱ owebii le̱.

² Ni David kē̱ Akiš ake̱: No le̱ bo hũ obana noni otšũlo̱ batšu! Ni Akiš kē̱ David ake̱: Nohewo̱ le̱ maṅōo mafe miyitšo hebulo̱ gbĩĩ abo̱ fẽ!

³ Agbe̱ne̱ Samuel *egbo, ni Israel mū le̱ fẽ efóle̱ ni ame̱tole̱ ye̱ Rama ye̱ le̱dientše̱ emã le̱ṅ. Nĩ Saul hũ †eſĩe okōmfoi ke̱ klamo̱i fẽ ke̱-dše̱ šikpoṅ le̱ ne̱. *25,1. †2 Mose 22,13.

⁴ Ni beni Filistibii bua ame̱he nā ni ame̱babo̱ nsra ye̱ Šunem le̱, Saul hũ bua Israel mū le̱ fẽ nā ke̱-kpe, ní ame̱yabo̱ nsra ye̱ Gilboa.

⁵ Ni beni Saul ná Filistibii le̱ ata le̱, eše gbeyei ni etšui fã naakpa.

⁶ Ni Saul yabi nii ye̱ Iehowa ṅõ, ši Iehowa hereele̱ no̱, ye̱ lamõi amli dšio, ye̱ *urim nā dšio, ye̱ gbalo̱i anā dšio. *2 Mose 29,30. 1 Sam. 14,37; 23,9.

⁷ Ke̱ke̱ ni Saul kē̱ etšũdši le̱ ake̱: Nyeyataoa yō *okõmfo ko nyehãami, ni maya eṅõ ní mayabi nii ye̱ eṅõ. Ni etšũdši le̱ kē̱le̱ ake: Na, yō ekõmfo ko ye̱ Endor. *Bo̱f. 13,15.

⁸ Ni Saul tšake ehe ni ewo atade kroko, ni eyiṅ ete, ni hĩĩ enyo̱ fata ehe, ni ame̱ba yō le̱ ṅõ nyōṅ, ni ekē̱: Femo̱ nii ohãmi, ni ohã moni mawo egbe̱i atã matšõo le̱ aba.

⁹ Ši yō le̱ kē̱le̱ ake̱: Na, bodientše̱ ole noni Saul efe le̱, bo̱ni ekpãtã okõmfoi ke̱ klamo̱i ahĩe ye̱ šikpoṅ le̱ no̱; ni mẽba otšṍo̱ misusuma tšõne, koni ohã agbemi?

¹⁰ Ke̱ke̱ ni Saul na Iehowa etšõle̱ ekē̱: Gbĩĩabo̱ kẽ ní Iehowa hĩe kã ne̱, sō ko sō ko tēreṅo ye̱ ne̱ke̱ sane ne̱ hewo̱!

¹¹ Ke̱ke̱ ni yō le̱ kē̱: Namo mihã aba? Ni ekē̱: Hã Samuel aba!

¹² Ni beni yō le̱ na Samuel le̱, ebo ke̱ gbē wale̱; ni yō le̱ kē̱ Saul ake̱: Mẽba ni olakami ne̱ke̱? ši bo dši Saul!

¹³ Ni maṅtše̱ le̱ kē̱le̱ ake̱: Kāše gbeyei! ši meni ona? Ni yō le̱ kē̱ Saul ake̱: Mina sisa ko mīfã kpo ke̱-mīdše̱ šikpoṅ šiši ke̱-mība.

¹⁴ Ni ekē̱le̱ ake̱: Té esu yo̱ tēṅ? Ni ekē̱: Nūmo ko mīfã ke̱-mība, ni ebu mama yū. Ni Saul yo ake̱ Samuel ni; ni eke̱ ehĩe bu ši ni ekotole̱.

¹⁵ Ni Samuel kē̱ Saul ake̱: Mẽhewo̱ obagba mina, ni ohã mibadše ne̱? Ni Saul kē̱: Efīmi naakpa; edšake̱ Filistibii le̱ ke̱mi dſere ta no̱, ni Nyoṅmo̱ edše mise̱, ni eheree mino̱ doṅṅ, ye̱ gbalo̱i anā dšio, ye̱ lamõi amli dšio; nohewo̱ mibatšē̱o ne̱, koni ohã male noni mafe.

¹⁶ Ni Samuel kē̱: Ni mẽba obio̱mi nii, ni ona ake̱ Iehowa edše ose̱ ni etšṍ ohenye̱lo̱ le̱?

¹⁷ Bo̱ni Iehowa tšṍ mino̱ ewie le̱, efe nakai; edšake̱ Iehowa ešõ maṅtše̱yeli le̱ ye̱ odeṅ, ni eke̱-hã onanyo ni dši David le̱;

¹⁸ edšake̱ oboo Iehowa gbē toi, ni oyee emlifũ ni nā wa le̱ no̱ ye̱ *Amalek ne̱, nohewo̱ ni Iehowa feo ne̱ke̱ ṅme̱ne̱ ne̱. *15,18. 19.

¹⁹ Ni asaṅ Iehowa aaṅõ bo ke̱ Israel fẽ awo Filistibii le̱ adeṅ; ni *wó̱ ni dši wó̱ le̱ bo ke̱ obihĩĩ le̱ ke̱mi aabahĩ ši; asaṅ Iehowa aato Israel ta le̱ awo Filistibii le̱ adeṅ. *31,6.

²⁰ Ke̱ke̱ ni amrõ le̱ Saul fle̱o̱ ke̱-dše̱ ṅwei egbē ši, edšake̱ eše gbeyei naakpa ye̱ Samuel wiemo̱i le̱ ahewo̱; hewale̱ komeflo be̱ emli; edšake̱ eyeko nokonoko ſaneſane ke̱ nyōṅnyōṅ fẽ.

²¹ Ke̱ke̱ ni yō le̱ ba Saul ṅõ, ni ena ake̱ ehao naakpa, ni ekē̱le̱ ake̱: Na, oweyō ebo ogbē toi, ni mike̱ miwala tete ehĩe mideṅ, ni miho owiemo̱i ni oke̱mi wie le̱ atoi.

²² Nohewo̱ le̱ agbe̱ne̱, ofai ne̱, bo hũ bo oweyō gbē toi, ni ohã maṅō abolo atrõma ko mamã ohĩe ní oye, koni oná hewale̱, ke̱ oyi gbe̱ ni ōya le̱.

²³ Ši ekplẽẽ ni ekē̱: Miyee! Ši etšũ-dši le̱ ke̱ yō le̱ fẽ nyẽ eno̱; ni ebo ame̱-gbē toi, ni ete ši ye̱ šikpoṅ lo̱ ni eho etá sā le̱ no̱.

²⁴ Ni yō le̱ ye̱ tšinabi ko ní ewo fo̱ ye̱ šĩa le̱, ni ehe fe oyá ni egbele̱, ni eṅõ mãmu ní ekpo̱to̱ ní eṅõ-šã abolo akpĩtĩ;

²⁵ ni eke̱-mã Saul ke̱ etšũdši le̱ ahĩe, ni ame̱ye. Ke̱ke̱ ni ame̱te ši ni ame̱yiṅ ame̱te nakai nyō le̱ṅ.