1 Samuel 13 - Ṅmãle̱ Kroṅkroṅ Le̱

¹ Saul ye maṅtše̱ afi kome; ni beni eye maṅtše̱ le̱ afii enyo̱ ye̱ Israel no̱ le̱,

² Saul hala mei akpei-etẽ ye̱ Israel ehã ehe; ame̱teṅ mei akpei-enyo̱ ke̱ Saul yo̱ Mikmaš ke̱ Betel goṅ le̱ no̱, ni mei akpe hũ ke̱ Ionatan yo̱ Gibea ye̱ Benyamin. Ni maṅ le̱ mli mei ni eſe̱ le̱, edšie ame̱teṅ mofẽmo gbe̱ ke̱-te ebū mli.

³ Ni *Ionatan yatſia Filistibii le̱ asrafoi ni yo̱ Geba le̱ anii; ni Filistibii le̱ nu he. Ke̱ke̱ ni Saul kpã te̱tre̱mantre̱ ke̱-kpẽle šikpoṅ le̱ no̱ fẽ ekē̱: Aha Hebribii le̱ anu! *14,49.

⁴ Ni Israel mū le̱ fẽ nu ake̱: Saul eyatſia Filistibii le̱ asrafoi le̱ anii, ni Israel he edše fũ hũ ewo Filistibii le̱. Ni abua maṅ le̱ nā ke̱-kpe ni ame̱tiu Saul ke̱-te Gilgal.

⁵ Ke̱ke̱ ni Filistibii le̱ bua ame̱he nā ke̱-kpe ni ame̱ke̱ Israel abawu, ame̱hĩe ſīlii akpei-nyoṅmai-etẽ ke̱ okpo̱ṅo̱i-atše̱mei akpei-ekpa ke̱ ta ni fá tamo̱ ṅšo̱ nā šĩa; ni ame̱fă ke̱-ba, ni ame̱babo̱ nsra ye̱ Mikmaš ye̱ Bet-Aven bokãgbe̱.

⁶ Ni beni Israel hĩĩ le̱ na ake̱ efīame̱, edšake̱ āhao maṅ le̱, ke̱ke̱ ni maṅ le̱ yatētē ame̱he ye̱ bui amli ke̱ kow̌eii amli ke̱ te̱sāi amli ke̱ mõdši amli ke̱ fo̱dši amli.

⁷ Ni Hebribii le̱ ekomei efo Iordan ke̱-te Gad ke̱ Gilead šikpoṅ le̱ no̱. Ši Saul le̱ eye̱ Gilgal lolo, ni mei le̱ fẽ nyie ese̱ ni ame̱he mīkpokpo.

⁸ Ni emẽ *gbĩĩ kpawo ye̱ be ni Samuel eto le̱ nā; ši Samuel baa Gilgal; ni maṅ le̱ gbe̱ ſã ye̱ ehe. *10,8.

⁹ Ke̱ke̱ ni Saul kē̱: Nyeke̱ šã-afo̱le le̱ ke̱ šidā-afo̱lei le̱ abahãami ye̱ bie̱. Ni esă šã-afo̱le le̱.

¹⁰ Ni eba mli, beni egbe šã-afo̱le le̱ šã nā pe̱ le̱, na, Samuel ba; ni Saul dše kpo ke̱le̱ yakpe, koni eflale̱.

¹¹ Ni Samuel kē̱: Meni ofe ne̱? Ni Saul kē̱: Edšake̱ mina ake̱ maṅ le̱ egbe̱ eſã ye̱ mihe, ni bo hũ obaa ye̱ gbĩ ni ato le̱ no̱, ni Filistibii le̱ ebua ame̱he nā ke̱-kpe ye̱ Mikmaš,

¹² nohewo̱ le̱ mikē̱: Agbene̱ Filistibii le̱ aakpleke ši abatuami ye̱ Gilgal, ni mikpako Iehowa fai; nohewo̱ ni mimla mihĩe, ni mišã šã-afo̱le le̱.

¹³ Ni Samuel kē̱ Saul ake̱: Oye kwašiai asane; oyeko Iehowa, o-Nyoṅmo̱ le̱, kitã ní ewoö le̱ no̱; edšake̱ kũle̱ kpako Iehowa bawadše omaṅtše̱yeli le̱ ye̱ Israel no̱ ke̱-ya nāno̱.

¹⁴ Ši agbe̱ne̱ le̱ omaṅtše̱yeli le̱ damo̱ṅ ši. Iehowa etao le̱dientše̱ *etšui nā nū ko ehã ehe, ni Iehowa ewole̱ emaṅ le̱ no̱ lumo̱; edšake̱ oyee kitã ni Iehowa woö le̱ no̱. *Bo̱f. 18,22.

¹⁵ Ni Samuel te ši ni edše̱ Gilgal ete Gibea ye̱ Benyamin. Ni Saul kane mei ni ke̱le̱ yo̱ dše̱i le̱, ame̱yi aafe hĩĩ ohai-ekpa.

¹⁶ Ni Saul ke̱ ebi Ionatan ke̱ mei ní fata ame̱he le̱ hĩ Geba ye̱ Benyamin; ši Filistibii le̱ bo̱ nsra ye̱ Mikmaš.

¹⁷ Ni ofõyelo̱i gbla ame̱mli asafokui etẽ ni ame̱fã ke̱-dše̱ Filistibii le̱ ansra le̱ṅ: asafoku kome tšṍ Ofra gbe̱ le̱ no̱ ke̱-te Šual šikpoṅ le̱ no̱,

¹⁸ ni ku kome hũ tšṍ Bet-Horon gbe̱ le̱ no̱, ni ku kroko le̱ tšṍ hũsũ ni kă ke̱-yaä Zeboim dšō̱ le̱ṅ gbe̱ le̱ no̱ ke̱-te ṅã le̱ no̱ gbe̱.

¹⁹ Agbe̱ne̱ *sõlo̱ ko sõlo̱ ko be̱ Israel šikpoṅ mū le̱ fẽ no̱; edšake̱ Filistibii le̱ kē̱o̱ ake̱: Ké̱ afe nakai le̱, no le̱ Hebribii le̱ aasõ klantei lo akplo̱i aha ame̱he. *Kodš. 5,8.

²⁰ Ši Filistibii le̱ aṅõ, Israelbii le̱ fẽ yaä, ni ame̱teṅ mofẽmo yatſaä etšinakō̱i ke̱ ededa ke̱ elema ke̱ ekō̱i nā ye̱ dše̱i.

²¹ Kẽle̱ ame̱ye̱ kitai ni ake̱-dšo̱ō̱ tšinakō̱ii le̱ ke̱ adedai le̱ ke̱ ninēmo̱-dadei le̱ ke̱ lemai le̱ anā, ni ake̱-sãa tšina kplamo̱dadei le̱ hũ.

²² Ni eba mli ake̱ tawū gbĩ le̱ no̱ le anaa klante lo akplo̱ ko ye̱ mei ní fata Saul ke̱ Ionatan he le̱ ateṅ mokomoko deṅ; ši Saul ke̱ ebi Ionatan deṅ pe̱ ana eko ye̱.

²³ Ni Filistibii le̱ asrafoi le̱ fã ke̱-te Mikmaš tšṍmo̱he le̱.