Tõoma 19 - ZE'ELEGO PAALEGA

Pɔɔl boi Ɛfisu

¹ Apolos n boi Korinti la, ti Pɔɔl doohe la tinkãra zo'e zo'e puan tole wa'am na paaɛ Ɛfisu, zi'an ti a nyɛ zahereba basɛba.

² Ti a yele ba yeti, “Yan lebege sakereba la, ya to'e Fa'a Sia la?” Ti ba lerege yeti, “Aayi, tumam pun ka wum ti Fa'a Sia boi.”

³ Ti Pɔɔl soke ba yeti, “Gee ba daa sɔ yamam ko'om la la ani puan?” Ti ba lerege yeti, “Yɔn ko'om sua la puan.”

⁴ Ti Pɔɔl yele ba yeti, “Yɔn ko'om sua la dela suteere ko'om sua. A daa yeti nɛreba la yeti, ba nam se'em n wan wa'am eŋa pooren na la. Yezu n bala.”

⁵ Nɛreba la n wum ŋwana la, ba nyaa sɔ ba ko'om la Daana Yezu yu'urɛ la puan.

⁶ Ti Pɔɔl n dikɛ a nu'uhi pagelɛ ba zuto la, ti Fa'a Sia la sige ba zuo, ti ba tɔgɛ zɛlempaala, gee purɛ.

⁷ Ba za'a de wuu nɛreba pia la ba yi'.

⁸ Ti Pɔɔl kina zamehegɔ yire la puan tara tara ŋmarehi sitã, tɔgera yelehum la la ninmu'urɛ, gee ŋmɛ'ɛra nɔkpe'ene se'ere n wan bahɛ ti nɛreba la bɔkɛ Yinɛ sɔ'ɔlum yɛla la.

⁹ Gee basɛba kɔ'ɔm kãbɛ suure zagehɛ yelehum la, gee yaala Sore la nɛreba la nɛŋan la, ti Pɔɔl bahɛ ba, gee tari sakereba la kina zamehegɔ yire ti ba yi'ira Tairanuse la puan, ta pa'ala pa'ali seko ti nɛreba wan bɔkɛ ba daare woo.

¹⁰ A iti la bala tara tara la yuuma ayi', ti la ŋwana wa bahɛ sɛba woo n boi Esiya dɛna Yuda buuri bii Giriki buuri la woo wum Daana yelehum la.

Seva dayɔɔhi

¹¹ Ti Yinɛ dɔla Pɔɔl puan tuna paŋa tuunkãra sɛ'a n boi si tɔka,

¹² ti ba nyaa tara Pɔɔl nɛnduuhega bii a fuo tanɛ n kalum a iŋa kina pagela bã'duma zuo ti ba bã'ahi bahera ba, ti kulekpa'bɛ'ɛhi ɛgera yɛhera na gee bahera nɛreba.

¹³ Ti Yuda buuri la puan sɛba eere sa'aha sɛbɛ'ɛhi me zigɛ ti ba dikɛ Daana Yezu yu'urɛ la sa'ahɛ kulekpa'bɛ'ɛhi n boi sɛba puan la, yɛta yeti, “N sa'ari fum mɛ Yezu se'em ti Pɔɔl muula a yele la puan.”

¹⁴ Budibeto tuyopɔi n de Yuuduma pu'uhegɔ malema nɛŋadaana ti a yu'urɛ yi'ira Seva, en zigeri ita ŋwana wa.

¹⁵ Gee Kulekpa'bɛ'a la lerege ba yeti, “Han dɛna Yezu mam mi, la Pɔɔl mam mi' gee yamam dela bani?”

¹⁶ Ti Buraa la ti kulekpa'bɛ'a la bɔna ka puan la ɛkɛ ba' ba, gbirege la ba ta nyaŋɛ ba za'a, ti ba zɔ yire la puan yehe na bɛɛla gee pɔgelum.

¹⁷ Yele dina wa n lu sɛba woo n boi Ɛfisu puan tuban la, Yuda buuri la Giriki buuri la woo n boi Ɛfisu puan ani la suram la dabehekãtɛ, gee ti ba zɛkera Daana Yezu yu'urɛ la.

¹⁸ Ti zo'e zo'e la n lebege sakereba la me purɛ ba be'em gee pa'alɛ bamam n ni tuna se'em la.

¹⁹ Ti sɛba me n ni tuna tiim tuuma la me kekeko me va ba tiim gɔnɔ la na nyɔ' tɔ nɛreba nɛŋan. Ban magehɛ gɔnɔ la bihɛ la, tu wan koohe ni paaɛ wuu salempɛɛlega tuha pihinuu.

²⁰ Ŋwana ti Daana yelehum malum zɔ'ɔra la paŋa gee tɔ'ɔra zi'an woo.

Ɛfisu gbiregeri

²¹ Yele ana wa woo n iŋɛ ba'ahɛ la, Pɔɔl maahum mɛ Sia la puan ti a doohe Masedoniya la Akaiya tihi puan gee nyaa tole Yerusalɛm. A yele bo' a mɛŋa yeti, “N han paaɛ bilam, n wan ba'ahɛ paaɛ Arome.”

²² Bala ti a tum a suŋereba bayi', Timoti la Erastuse, ti ba kiŋɛ Masedoniya, gee ti eŋa mɛŋa yee Esiya yuue fii wa.

²³ Sankaŋa puan la ti gbiregeri kãtɛ en sige, doohe Sore la zuo.

²⁴ Buraa yu'urɛ n yi'iri Demetereyose, en de salempɛɛlega kuta, nyaa dikɛ salempɛɛlega kure Atemis tinganɛ la, ti tuun-dina wa tari ligeri tuunkãtɛ na bo' tuntuneba.

²⁵ Ti a kã'ahɛ nɛrebana wa woo, la nɛresɛba woo n lagum tuna tuun-ana taaba lagehɛ taaba na yele ba yeti, “N taaba wa, ya mi' ti tu tarega wa yehe la tuun-ana wa puan.

²⁶ Ya me nyɛ ya, gee me wum ti, dagi Ɛfisu ma'a puan, gee la ŋwani ti Esiya wa puan za'a, Pɔɔl wa doohe pã'ahɛ mɛ gee vɛ' nɛrekuuŋɔ yehe, doohe la en tɔgeri yeti, yina sɛ'a ti ba dikɛ nu'uhi maalɛ la dagi yina.

²⁷ Ŋwana wa tari la nyɔ̃pɔ̃hega kina na, dagi la tu tuuma wa ma'a n wan bahɛ yoo, gee tinganɛ kãtɛ Atemis en de bage kãtɛ zɔŋɔ la wan lebege kɛhega lɔkɔ, ti ba faaɛ a pansɛka ti a tara ta'am lagehɛ Esiya tiŋa wa, la timpaberɛ wa za'a ti ba kina na'aha en la.”

²⁸ Ban wum ŋwana wa la, la wuŋɛ ba mɛ ti ba suya nyiie, ti ba kaahɛ tagurega yeti, “Ɛfisuduma Atemis n gani za'a.”

²⁹ Ti gbiregeri sige tiŋa la puan, ti nɛreba zɔ kalam kiŋɛ de'eŋo yire la puan, gee vɛ'ɛra Gayɔse la Aristakuse n de Masedoniya, dole Pɔɔl ɛɛra la.

³⁰ Ti Pɔɔl bɔta ti a gɛregɛ nɛrekuuŋɔ la ha, gee ti a zahereba la ka sakɛ bo' en.

³¹ Ti Esiya kpɛ'ɛnduma sɛba n de Pɔɔl zɔduma la tum sɔɔleŋa bo' en na ti a da makɛ nɛ na'arɛ de'eŋo yire la puan.

³² Gee bala ma'a la ti nɛrekuuŋɔ la nyaa yabera bura bura. Bana yɛta sɛla, ti bana me yɛta sɛla ha, se'ere n sɔi la, ba ka mi' ban boi zi'an, gee ti ba zo'e zo'e me ka mina se'ere zuo ti ba lagehɛ na.

³³ Ti nɛrekuuŋɔ la basɛba ka'ana Alɛgezanda la ti Yuuduma la za'ɛ en bahɛ na. Ti Alɛgezanda wa doohe yibehɛ nɛreba la ti nɛreba la go'e, gee nyaa zigera en wan iŋɛ se'em tɔgɛ suŋɛ a mɛŋa nɛreba la nɛŋan.

³⁴ Gee nɛreba la n ta baŋɛ ti a dela Yuda buuri la, ti ba dikɛ gogo kaareŋa ayi' la, kaahɛ la nɔyinɛ baha na yeti, “Ɛfisu yinɛ Atemis n gani za'a.”

³⁵ Gee tiŋa la gɔnguleha en ta bahɛ ti nɛreba la go'e la, a yele ba yeti, “Ɛfisu tiŋambiihi wa, ani n gee ka mina ti Ɛfisu wa n biheri Atemis se'em n gani za'a la zɔŋɔ la, la bage se'ere saazuo ha lu na la?

³⁶ Yele ana wa n kan ta'am sugɛ la zuo, la dela ya ana bããlam gee da kabelɛ tum tuunse'ere yoo.

³⁷ Yan tari buraahi wa wa'am na ka'lam na wa, si ka fa' tu zɔŋɔ wa puan sɛla bii tu' tu bagerɛ wa.

³⁸ Bala zuo la, Demetereyose la a kuteba taaba la n naaɛ la en wa han tara la se'ere la nɛre se'em, tugum deto la gã' mɛ, ti sɛba n gakeri yɛla bɔna. Bahɛ ti ba paaɛ bilam la ba tɔgɛ ban tari se'ere la taaba la.”

³⁹ Ya han le bɔta ti ya baŋɛ la se'ere pa'ahɛ, ba paaɛ sɛba n biheri nɛreba yɛla la zi'an.

⁴⁰ Se'ere n sɔi la, tu ka zaaɛ ba kɛɛ tɔ zina ti tu gbiti mɛ. Se'ere n sɔi la, tu ka tari se'ere ti tu wan yele doohe gbiregeri dina puan.”

⁴¹ En tɔgɛ ŋwana ba'ahɛ la, a yele nɛreba la mɛ ti ba yiregɛ.