Tõoma 16 - ZE'ELEGO PAALEGA

Timoti pa'ahɛ Pɔɔl la Silase puan

¹ Ti Pɔɔl kiŋɛ ta paaɛ Dɛɛbi la Lisetira tihi puan, bilam ti ba nyɛ zahera ayima yu'urɛ en yi'iri Timoti, ti a ma dɛna Yuda buuri puan pɔka, dɛna sakereba la ayima, gee ti a sɔ dɛna Giriki nɛra.

² Timoti wa dela se'em ti sakereba la n boi Lisetira la Ikonium la tɔgera a yele suŋa.

³ Ŋwana ti Pɔɔl bɔta ti Timoti wa doohe en, nyaa bahɛ ti a ŋma, Yuuduma la n boi zɛ'se'ehi puan la zuo. Se'ere n sɔi la, ba daa mi' ti Timoti sɔ dela Giriki buuri.

⁴ Ti ban dole kaara tiŋa tiŋa la, ba yeti nɛreba la ze'elego seko ti tuntuneba la kiinduma la en boi Yerusalɛm ku nuurɛ bu ba ti ba dɔla a suŋa la.

⁵ Ba doohe se'em kpemehe lageŋɔ la nɛreba ba sakerɛ puan n bala, ti nɛreba me malum kɛ̃ lageŋɔ la pa'ahɛ daarɛ woo.

Pɔɔl nyɛ la Masedoniya buraa lilegere puan

⁶ Ti ba doohe Firigiya la Galatia sɔ'ɔlum la puan za'a kaaɛ, doohe la Fa'a Sia la n ka bo' ba sore ti ba muulɛ yelehum la Esiya tiŋa puan la zuo.

⁷ Ban wa'am na paaɛ Misiya tiŋa beene zuo la, ba iŋɛ ba puti'irɛ ti ba kɔ'ɔm kɛ̃ Bitiniya tiŋa puan, gee Yezu Sia la ka bo' ba sore,

⁸ bala ti ba doohe Misiya kinkɛleŋa sige, ta paaɛ Torowase.

⁹ Ti yu'uŋɔ ti Pɔɔl ta nyɛ lilegere, ti buraa n yehe Masedoniya tiŋa n bala zɛ'a la en bɛlena yeti, “Wa'am Masedoniya na suŋɛ tɔ.”

¹⁰ Eŋa n nyɛ lilegere dina wa la, ti tu ihege bilam bilam, zigera ti tu yakɛ kiŋɛ Masedoniya, se'ere n sɔi la tu sakɛ ya ti Yinɛ n yi' tu ti tu kiŋɛ ta muulɛ faarɛ la bo' ba .

Lidiya teere

¹¹ Ti tu zom uureŋɔ, ze'ele Torowase, kɔ'ɔm kiŋɛ tuuntɔɔ ta paaɛ Samotirasi, yiimbeere ti tu paaɛ Niyapolise,

¹² ze'ele bilam tole Filipi, kaŋa n de tinkãtɛ Masedoniya tiŋa la puan, me dɛna Aromduma sɔ'ɔlum. Tu yee la tinkana wa puan dabeha fii wa.

¹³ Ti vo'ohego dabeherɛ la ta paaɛ, ti tu yehe tiŋa la yiŋa, kiŋɛ ta pɔra kulaa la, zi'an ti tumam ti'iha ti pu'uhegɔ ze'a wan bɔna la. Tu zi'ire la bilam na la, pɔhɛ tɔgera bɔ'ɔra pɔgehi n lagehɛ na.

¹⁴ Ti pɔka bɔna ba puan kɛleha tɔ, ti ka yu'urɛ yi'ira Lidiya, dɛna pɔka dɛna Yin-zɔta, yehe Tayatira na, kɔɔha fumɔlɔ. Ti Daana la yu'ɛ ka suure ti ka kɛleha Pɔɔl en yeti sɛla la suŋa suŋa.

¹⁵ Kaŋa la ka yire nɛreba la za'a n ta to'e ko'om sua la, ka bɛlena tumam yeti, “Ya han sirum nyɛ mam ti mam dela sakera Daana la puan, wa'am ya na kɛ̃'ɛ̃ra mam yire.” Ka tɔgera la bala tara tara ta nyaŋɛ tɔ.

Ba pagɛ Pɔɔl la Silase

¹⁶ Daarɛ deyima ti tu yɛ'a pu'uhegɔ zi'an la, tu tu'uhɛ la pugela n de yameŋa, ti kulekpa'bɛ'a dɔla ka, ti ka dɛna sɔputega, tari ligeri kina na bɔ'ɔra a daana la doohe la en yeti nɛreba ba yɛla la.

¹⁷ Pugela wa n dole Pɔɔl la tumam la, ka ni ta kaahɛ mɛ bahɛ na yeti, “Nɛrebana wa dela Gaŋɛ za'a Yinɛ la Yamehi, muula faarɛ sore la bɔ'ɔra ya.”

¹⁸ A iti ŋwana wa la dabeha zo'e zo'e. Ti a itegɔ la ba' nyiie Pɔɔl susuya, ti a ŋmɛregɛ yele kulekpa'bɛ'a la yeti, “Yezu Kiresta yu'urɛ la puan ti n bo' fum nuurɛ yɛta fum tole yehe a puan na.” Ti sankaŋa mɛa puan la, ti sɛbɛ'a yehe pugela la puan.

¹⁹ Gee pugela la daan duma la n nyɛ ti ban tari puti'irɛ ti ba wan nyɛ ligeri la tole ya la, ti ba nyɔkɛ Pɔɔl la Silase, vɛ' ba kɛ̃ da'a puan na, tari ba wa'am kpɛ'ɛnduma nɛŋan na.

²⁰ Ban tari ba paaɛ yelegakereba nɛŋan na la, ba yeti, “Buraahi sina wa ba' daani la tu tiŋa wa, ba me dela Yuuduma,

²¹ gee wa'am na pa'ala tu nɛreba wa kiha sɛ'a n dagi ma'a bo' tumam n de Arome duma wa ti tu to'e a dɔla.”

²² Ti nɛrekuuŋɔ la lagum pa' ba poore, zabera la Pɔɔl duma, ti yelegakereba yɛɛhɛ ba lɔgerɔ, gee bo' nuurɛ ti ba ŋmɛ' ba.

²³ Ti ban ŋmɛ ba sagum sagum ba'ahɛ la, ba vu ba ta bahɛ la paka deo puan, gee bo' sɛba n biheri paka deo la nuurɛ ti ba gura ba suŋa.

²⁴ Doohe la ban bo' en nuurɛ se'em la zuo, ti eŋa me tari ba kɛ̃ paka deo la saraa puan ha, ta dikɛ kuto ba' ba nama tabelɛ dɔkãtɛ.

²⁵ La ta paara me woo yu'uŋɔ sunsua bɔba, ti Pɔɔl la Silase pu'uha gee yuuma bɔ'ɔra Yinɛ, ti sɛba ti ba pagɛ la ba la kɛleha.

²⁶ Ba yeti ba bihɛ, ti tiŋa la tinmiiŋo kãtɛ n miim, ti paka deo la ɛ̃berɛ la gbiregera, ti bilam bilam ti paka kulehi la za'a yu'uhɛ, ti zɔtɔ la n ba' nɛreba la za'a lorehe.

²⁷ Gura la en ta ihege nyɛ ti paka deo kulehi la yu'ɛ mɛ gã'a la, ti a fooe a su'a ti a ku a mɛŋa se'ere n sɔi la, a ti'ihɛ ti sɛba ti ba pagɛ ba la za'a yehe zɔ mɛ.

²⁸ Gee Pɔɔl tahɛ en mɛ la kɔkɛ'ɛŋa yeti, “Da pɔgelum fum mɛŋa gee tu woo boi mɛ.”

²⁹ Ti gura wa yi' ti ba tari bugum kɛ̃ na, ti a lu tiŋa Pɔɔl la Silase nɛŋan gbi'ira.

³⁰ Gee nyaa tari ba yehe yiŋa na yele ba yeti, “Naa, Beni ti n wan iŋɛ la n nyɛ faarɛ?”

³¹ Ti ba lerege en yeti, “Nam Daana Yezu, gee fum wan nyɛ faarɛ, fum la fum yire za'a.”

³² Ti ba nyaa tɔgɛ Daana la yelehum la bo' eŋa la sɛba woo n kɛ̃'ɛ̃ri a yire la puan la.

³³ Ti yu'uŋɔ kuŋɔ sankaŋa mɛa puan, ti gura la tari ba kiŋɛ ta di'ihe ba nɔra la, gee ti eŋa la a nɛreba za'a to'e ko'om sua kalam ka gu'um.

³⁴ Ti a nyaa tari ba wa'am a yire na, bo' ba dia, gee ti eŋa la a nɛreba za'a nyɛɛna la bamam n lebege sakereba bo' Yinɛ.

³⁵ Beere n ta yilegɛ la, ti sɛba n gakeri yɛla la tum gureba yeti, “Kiŋɛ ya ta bahɛ ti buraahi la kiŋɛ.”

³⁶ Ti gura la to'e sɔɔleŋa la ta yele Pɔɔl yeti, “Yelegakereba la tum na yeti, tu bahɛ ti ya kiŋɛ. Bala zuo la, ya ta'am yehe nananawa la inma'ahum.”

³⁷ Gee Pɔɔl lerege en yeti, “Ba ŋmɛ tumam mɛ nɛrekuuŋɔ nɛŋan, gee ka nyɛ tu tuure, gee ti tu me dɛna Arome tiŋa wa nɛreba, ti ba le pagɛ tu, gee nyaa bɔta ti ba bahɛ tɔ bããlam? La kan iŋɛ bala. Bahɛ ti ba mɛhi wa'am na tari tu yehe.”

³⁸ Ti gureba la tari yetɔgum la ta bo' yelegakereba la, ti dabeem ke ba, la ba wum ti ba dela Arome tiŋa duma la.

³⁹ Ti ba nyaa wa'am na belum ba, gee nyaa tari ba yehe, gee nyaa yele ba ti ba bahɛ tiŋa la puan.

⁴⁰ Ban yehe paka deo la puan na la, ba kiŋɛ la Lidiya yire. Ban paaɛ nyɛ gee kpemehe sakereba la ba'ahɛ la, ti ba bahɛ tiŋa la puan.