Lilegere 5 - ZE'ELEGO PAALEGA

Gɔŋɔ, la Pebila

¹ Ti mam nyɛ ti se'em en zi' na'am kuka kãtɛ la a zuɔ nu'o puan, ti gɔŋɔ ti ba gulehɛ ku puan, la ku pooren za'a, pɔbɛ ku la daalehum buyopɔi.

² Ti mam nyɛ ti suŋera en de paŋa daana, muula la kɔkɛ'ɛŋa yeti, “ Ani en boi nara ti a lorege gɔŋɔ wa, la a lakɛ daalehum la gee bihɛ ku puan?”

³ Ti se'em ka bɔna tinsuŋan la, bii timpaberɛ wa zuo, bii timpaberɛ wa tiŋa tiŋa ha, wan ta'am lakɛ gɔŋɔ la bihɛ ku puan.

⁴ Ti mam pɔhɛ kɛla ninmu'urɛ, se'ere en sɔi la, se'em ka boi nara a yu'ɛ gɔŋɔ la, bii a bihɛ ku puan.

⁵ Ti kiinduma la ayima yele mam yeti, “Da kɛla. Bihɛ, Gbigenɛ la en yehe Yuda buuri puan na la, se'em tuŋo en yehe Deviti puan na la nyaŋɛ ya, wan ta'am yu'ɛ gɔŋɔ la, la ku daalehum buyopɔi la.”

⁶ Ti mam nyɛ ti na'am kuka kãtɛ la, la bunvɔɔhi banaahi la, la kiinduma la tiŋasuka, ti Pebila ze', ana wuu ba tabelɛ kɔregɛ ka mɛ la, tara iila ayopɔi la nini iyopɔi en de Yinɛ sɛɛhi siyopɔi la, ti Yinɛ tum si timpaberɛ wa zuo zi'an woo na la.

⁷ Ti a kiŋɛ paaɛ to'e gɔŋɔ la se'em en zi' na'am kuka kãtɛ la zuo la zuɔ nu'o la puan.

⁸ En to'e gɔŋɔ la, bunvɔɔhi banaahi la za'a, la kiinduma pihiyi' la banaahi la, lu mɛ Pebila la nama tiŋa, ti ba woo zãla duureŋa duureŋa, la salema laahi ti si pirɛ la nyuuŋo suŋɔ digelum en de Yinɛ nɛre sunduma la pu'uhegɔ.

⁹ Ti ba za'a yuum yuumpaalɛ yeti, “Fum nari mɛ ti fum to'e gɔŋɔ la la fum lorege daalehum se'ere en sɔi la, ba yuum kɔregɛ fum mɛ, ti fum dikɛ fum ziim yɔ to'e nɛre sunduma, buuri woo, tugum woo, nɛreba woo la tihi woo puan bo' Yinɛ.

¹⁰ Fum iŋɛ ba ti ba dɛna la malema duma buuri sɔ'ɔlum, tuna bɔ'ɔra Yinɛ,” ba wan sɔna timpaberɛ wa zuo biha.

¹¹ Ti mam bihɛ, wum suŋereba kuuhi zo'e zo'e en kaaɛ na'am kuka kãtɛ la, la bunduma la, la kiinduma la. Ti ba kãlɛ kɛ̃'ɛra tuha pia la tuha tuha,

¹² yuuna la ba kuuhi za'a yeti, “ Pebila la ti ba kɔregɛ la nari mɛ ti ka to'e paŋa, tarega, yɛm la kpe'eŋo la na'ahegɔ, la suŋa, la sum.”

¹³ Ti mam wum ti bunvua woo en boi tinsuŋan, timpaberɛ wa zuo, la tiŋa tiŋa ha, la ateko puan, la sɛla woo en boi ba puan, ti ba za'a yuuna yeti, “ Se'em daana en zi' na'am kuka kãtɛ la zuo la, la Pebila la, sum, la na'ahegɔ, suŋa la kpe'eŋo dɛna fum dinɛ wuuha wuuha.”

¹⁴ Ti bunvɔɔhi banaahi la yeti, “Taari.” Ti kiinduma la za'a lu tiŋa la na'ahegɔ.