Lilegere 4 - ZE'ELEGO PAALEGA

Saazuo ha na'ahegɔ

¹ Ŋwana en tole la, ti mam biha, ti tinsuŋan ha, kuleŋa yu'ɛ bahɛ. Ti yia kua sɛka ti mam pun wum ni ti ka tɔgera bɔ'ɔra mam ana wuu tintanɛ en peeberi la, yele mam yeti, “Zom ka'lam na, ti n pa'alɛ hɔ sɛla en wan iŋɛ ŋwana wa pooren.”

² Kalam ti mam pun bɔna Sia la puan, paaɛ bini. Tinsuŋan ha la, mam nyɛ ti na'am kuka kãtɛ en ze', ti nɛra ayima zi'a ka zuo.

³ Ti se'em en zi' ka zuo la nyagere mɛ wuu tuulum kuga en de dɛlemadɛtɔ la mɔlegɔ, ti sɛla en kaaɛ na'am kuka kãtɛ wa mum la dɛna, gumatia tahɔ en ani biin wuu tuulum kuge sabela la.

⁴ Ti sɛla en ze' kaaɛ na'am kuka kãtɛ wa mum, dela na'am kugehi pihiyi' la sinaahi, ti sɛba en zi' na'am kugehi sina wa zuto dɛna kiinduma pihiyi' la banaahi en bagɛ la na'am fupɛɛla, ti salema muhi vuga ba zuto.

⁵ Ti sɛla en ze'eti na'am kuka kãtɛ la puan na, dela saa bugum en nyagere, la dameŋa la saa tahega, gee ti na'am kuka kãtɛ wa nɛŋan na, bugum zɛlehi siyopɔi en ze' dita, dɛna Yinɛ sɛɛhi siyopɔi la.

⁶ Na'am kuka kãtɛ mɛa nɛŋan, sɛla en gã' wuu salema ateko la, ana yilaam. Ti sɛla en kaaɛ na'am kuka kãtɛ la, ka luga anaahi la za'a, dela bunvɔɔhi banaahi, ti ba zi'an woo tara nini, ba nɛŋa la ba poore za'a .

⁷ Ti se'em en boi yia la ana wuu gbigenɛ, ti se'em en tagelɛ la me ana wuu lɔlega, ti ta'a daana la tara nɛŋa en ani wuu asaala nɛŋa la, ti naahi daana la nɛŋa ana wuu tugeho en ɛgeri la.

⁸ Ti bunvɔɔhi sinaahi wa ayima woo tari la kelumpagehi siyoobe, pirɛ la nini ba yiŋa, la ba puan. Ti bulika la yu'uŋɔ za'a, ba kɔ'ɔm yuuna mɛ ka malum gɔ'ɔra. Ba yuuni yeti, “Fa'a, Fa'a, Fa'a, Daana Yinɛ, Gani za'a daana, se'em en daa de, gee kelum dɛna, gee wan wa'am na.”

⁹ Ti saŋa woo, bunduma wa han ni na'ahera, gee pɛgera, gee pu'uha se'em daana en zi' na'am kuka kãtɛ la zuo la, se'em en boi wuuha wuuha la,

¹⁰ Kiinduma pihiyi la banaahi la ni lu la aliko, se'em daana en zi' na'am kuka kãtɛ la zuo la nɛŋan, na'aha eŋa se'em daana en boi wuuha wuuha la. Ba ni vugehe ba muhi la lobe la na'am kuka kãtɛ la nɛŋan, gee yuuna yeti,

¹¹ “Fu nari mɛ, tu Daana la tu Yinɛ, ti fum to'e pɛka la na'ahegɔ la paŋa, se'ere en sɔi la, fum naam sɛla woo , ti fum sumboolum zuo ti ba bɔna, ti fum en naam ba.”