Lilegere 21 - ZE'ELEGO PAALEGA

Saazuo Paalega, la Timpaberɛ Paalega

¹ Ti mam nyɛ saazuo paalega, la timpaberɛ paalega, se'ere en sɔi la, yia saazuo la, la yia timpaberɛ la mɛlum mɛ, ti ateko ka bɔna.

² Ti mam nyɛ tuulum tiŋa la, Yerusalɛm paalega, ti ka ze'ele saazuo ha, Yinɛ zi'an, sigera na, ti Yinɛ maahum ka wuu pɔka en nɔm yɛ'a sire-ele la.

³ Ti mam wum ti kɔkɛ'ɛŋa ze'ele na'am kuka kãtɛ la zuo tɔgɛ bahɛ na yeti, “Bihɛ, Yinɛ yire en bala bɔna la saaleba wa. A wan bɔna la ba, dɛna ba Yinɛ, ti ba dɛna a nɛreba, Yinɛ mɛŋa en wan bɔna la ba.

⁴ A wan duuhe nintahɔ woo ba ninin bahɛ.” Kum kan le bɔna. Si'iŋɔ la kɛlega, la too kan le bɔna, Se'ere en sɔi la, yia yɛla la tole ya.

⁵ Ti se'em en daa zi' na'am kuka kãtɛ la zuo la yeti, “Bihɛ, n iti sɛla woo la paalega. Gee me yele pa'ahɛ yeti, Gulehɛ ŋwana wa biŋe, se'ere en sɔi la, yetɔge buna wa dela sakerɛ gee dɛna sira.”

⁶ Ti a nyaa yele mam yeti, “La tum ya. Mam en de Alifa, la Omega, Pi'ileŋo, la Ba'ahegɔ. Sɛba ti ko'nyuuro tara ba, n wan bo' ba ko'om ti la dɛna bo'olum, ze'ele vom ko'om kulaa la puan na.

⁷ Se'em en nyaŋɛ la, en wan to'e lɔge tuna, ti n dɛna a Yinɛ, ti a dɛna n bia.

⁸ Gee han dɛna dabɛɛbehi la, la sɛba en ka sakɛ la, sɛba ti ba galum ba la, la nɛrekuureba la, yaluntuuma duma la, sɔ̃niniduma, bage kaabereba, la pumparenduma la za'a, ba bɔŋa zi'an ta bɔna la bugum mɔgerɛ la ti tahi taaɛ bugum dita la puan. Yi'i kum la en bala.”

Yerusalɛm paalega la lilegere

⁹ Ti suŋereba bayopɔi la ayima, se'em en zãli ni laahi siyopɔi la en pirɛ la ba'ahegɔ namehegɔ kãra ayopɔi la, wa'am na yele mam yeti, “Wa'ana, n wan pa'alɛ hɔ pɔka la en yeti ka ele la. Pebila la pɔga la.”

¹⁰ Ti a dikɛ mam sia puan, tara mam kiŋɛ zoore kãtɛ, zoore en wugɛ, ta pa'alɛ mam tuulum tiŋa Yerusalɛm, en ze'ele saazuo, ze'ele Yinɛ zi'an sigera na la.

¹¹ Ti ka tari Yinɛ suŋa, nyagera wuu salema zɔtɔ la, nyagera wuu kugesuma la, ana yilaam wuu bihɛ nyagera la.

¹² Ti nangoone kãtɛ, wugɛ kaaɛ ka, ti ka tara nayahi pia la siyi, ti suŋereba pia la bayi' la gura nayahi la. Ti nayaŋa woo puan, ba gulehɛ la Izirale yizuto pia la tuyi' la yu'ura labelɛ bini.

¹³ Dapɔya bɔba, nayahi sitã, zuɔ bɔba nayahi sitã, gɔbega bɔba nayahi sitã, zanɔya bɔba nayahi sitã.

¹⁴ Ti tiŋa la nangoone la me tara ɛ̃ba pia la ayi', ti ɛ̃berɛ woo puan, Pebila la tuntuneba pia la bayi' la yu'ura en gulehɛ labelɛ ɛ̃berɛ woo puan.

¹⁵ Suŋera se'em en tɔgeri bɔ'ɔra mam la zãli la magehegɔ doore en de salema, ti a magehɛ tiŋa la, la ka nayahi la, la ka nangɔɔma la.

¹⁶ Tiŋa la gã' la mɔkɔ mɔkɔ, ti ka luga la woko dɛna buyina la ka yaleŋa. Ti a magehɛ tiŋa la, la a salema magehegɔ doore la, ti ka woko dɛna miila tuhere la kɔbehi sinuu. Tiŋa la woko,la ka yaleŋa, la ka saazuo woko dela buyina.

¹⁷ Gee me makɛ nangɔɔma la, ti bamam me dɛna santira kɔbega, la santira pihinaahi la anaahi. Nɛreba en makere se'em en bala ti suŋera wa daa mageha la.

¹⁸ Kuga suma en nyagere ti ba dikɛ mɛ nangɔɔma la kaaɛ tiŋa la, gee salema ma'a en ani yilaam ti ba dikɛ mɛ tiŋa la mɛŋa.

¹⁹ Tiŋa la nangɔɔma ɛ̃ba la, ba gulɛ de mɛ la kuge suma yima yima kaaɛ. Yia ɛ̃berɛ kugere la dela kuge dɛlemadɛtɔ la sɔbele puuhego, yi'i dela kuge sɔbele puuhego, ta'a dela, kuge pumpɔreŋɔ, naahi dela, kuge sunɛ en nyageri,

²⁰ bunuu dela, kuge mɔlegɔ buyoobe dela, kuge saala en nyagere, buyopɔi dela, kuge dɔboolum, bunii dela, kuge sɔbelegɔ en de dɛlemadɛtɔ. (Beril), buwai' dela, kugere en de dɔboolum. (Topazi), pia dela kuge dɛlemadɛtɔ (Kiresopirase), pia la buyina dɛna kugemɔlegɔ dɔboolum (Yasinte), ti pia la buyi' dɛna, kuge-mɔlepeelego, (Ametesite)

²¹ Ti nayahi pia la siyi la, kayina woo dela nunɔm lɔkɔ. Ti tiŋa sadɔtɔ la woo dɛna salema nyagera wuu kɔleba la.

²² Mam ka nyɛ pu'uhegɔ yire tiŋa la puan, se'ere en sɔi la, ka pu'uhegɔ yire dela Daana Yinɛ la, Gani za'a Daana la, la Pebila la mɛŋa.

²³ Ti wuntɛɛŋa bii ŋmarega niihum yele ka pakɛ tiŋa la, se'ere en sɔi la, Yinɛ suŋa la niihum la en de tiŋa la bugum, ti ka butolela dɛna Pebila la.

²⁴ Tihi za'a wan bihera la a niihum buna kina, ti timpaberɛ wa zuo naduma wan tari ba suŋa wa'am la ka puan na.

²⁵ Tiŋa la nayahi kan malum yu, ti yu'uŋɔ me kan bɔna ka puan.

²⁶ Nɛreba wan zɛ'ɛta tihi tara ba pɛka, la ba na'ahegɔ kina ka puan na.

²⁷ Gee sɛla en de galeŋɔ lɔkɔ kan kɛ̃ ka puan, bii se'em en iti be'em bii pumpɔreŋɔ tuuma. Gee sɛba ma'a yu'ura en gulehɛ bɔna Pebila la Vom gɔŋɔ la puan.