Lilegere 17 - ZE'ELEGO PAALEGA

Pɔge yaalega la bunsilemasio

¹ Ti suŋereba bayopɔi la puan ayima, sɛba en zãli laahi siyopɔi la, wa'am na yele mam yeti, “Wa'ana ti n pa'alɛ hɔ, yiyɛkɛka la en ki'ire lɛm kulaahi wa ti Yinɛ wan ta sagum en se'em.

² Se'em ti timpaberɛ wa zuo na'duma tum yaluntuuma la en, ti timpaberɛ wa zuo nɛreba tum yaalum tuuma la en ta buge wuu ba nyu la daam la.”

³ Lilegere wa puan, ti suŋera wa tari mam sia puan, ta kɛ̃ muuen ha, ti mam ta nyɛ ti pɔka yage bunsilemasio mɔlegɔ zuo, ti tuurɛ yu'ura ma'a gulehɛ lama duŋa la iŋa za'a. Ti duŋa la tara zuto tuyopɔi, la iila pia.

⁴ Ti pɔka wa bagɛ ka mɛŋa la fumɔlɔ en gulɛ la salema, bãhi, la peranini, ti a nu'en a zãli la salema wula, ti ka pirɛ la tuunfi'iha, la a yaalegɔ la dɛgerɔ ma'a.

⁵ Ti yu'urɛ en de sugelum yu'urɛ, gulehɛ lama pɔka la gbi'iri yeti, “Babilɔn kãtɛ la en de yiyɛkɛka la, Yaalegɔ za'a ma la ti timpaberɛ wa za'a galeŋɔ lɔkɔ.”

⁶ Ti mam nyɛ ti pɔka wa buge mɛ la en nyu Yinɛ nɛresunduma ziim, la sɛba en muuli Yezu yele la sukpe'ene la ziim la. Mam en nyɛ ka la, la ba' iŋɛ mam la pakerɛ.

⁷ Gee suŋera la yele mam yeti,“Beni ti la ba' iŋɛ hɔ pakerɛ bala?” N wan yele fum pɔka wa sugelum yele, la duŋa la en tara zuto tuyopɔi, la iila pia ti ka yaga ka zuo la.

⁸ Bunsilemasio la ti fum nyɛ ni la, daa vɔi mɛ, gee ki, gee nyaa bɔna bini ti ku ze'ele boko kãtɛ la en boi tiŋa tiŋa ha la dooe na, ti ba sagum en. Ti sɛba woo en boi timpaberɛ wa zuo ti ba yu'ura ka gulehɛ bɔna vom gɔŋɔ la puan tiŋa wa pi'ileŋo puan na la, la wan ta iŋɛ ba pakerɛ ba han le ta nyɛ bunsilemasio la, beni zuo, ku daa boi mɛ, gee ki, gee le yeti ku vo'e na.

⁹ “Putɛ'se'ere en tari bɔkerɛ n wan baŋɛ dina wa. Zuto tuyopɔi la dela zɔya ayopɔi ti pɔge yiyɛa wa yaga a zuo, gee me ze'ele bo' naduma bayopɔi,

¹⁰ ti ba puan banuu ki, ti ayima vɔna, gee ti ayima la nan ka wa'am na. Gee a han ta wa'am na, a wan bɔna la dabeha fii wa.

¹¹ Gee bunsilemasio seko en daa boi gee ki la, eŋa pa'aheri la banii, lagum pa'ahɛ bayopɔi la ti ba yeti ba sagum ba la puan.

¹² Gee iila pia la me ti fum nyɛ la dela, naduma pia en nan ka to'e sɔ'ɔlum biha, gee ba wan to'e na'am kpe'eŋo, gogo kaareŋa buyina ma'a, tum la bunsilemasio la.

¹³ Bana za'a iŋɛ la puti'irɛ deyina, ti ba dikɛ ba paŋa, la ba kpe'eŋo bo' bunsilemasio la.

¹⁴ Ba wan kɔ' zaberɛ la Pebila la, gee Pebila la wan nyaŋɛ ba. Se'ere en sɔi la, Pebila la en de Daanduma Daana, la Naduma naba. Ti sɛba en boi la en la, a yi' ba mɛ, gee loohe ba ti ba dɛna sakereba.”

¹⁵ Ti suŋera la yele mam yeti, “Ko'om la ti fum nyɛ ni sebo ti yiyɛkɛka la zi' ni bu zuo la, ze'ele bo' la timpaberɛ wa zuo nɛreba, nɛrebɔbegɔ, tihi, la tugum.

¹⁶ Ti iila pia la ti fum nyɛ ni la, bamam la bunsilemasio la wan ta yaaɛ yiyɛkɛka wa, mugehe en ta bahɛ en beele, ba wan aahum a iŋa obe, gee nyɔ' en bugumen.

¹⁷ Se'ere en sɔi la, Yinɛ en lu' ba suya puan, ti ba tum eŋa en boti se'em la, doohe ba dikɛ ba sɔ'ɔlum bo' bunsilemasio la, gura ti Yinɛ yelehum la ta wa'am na tum.

¹⁸ Pɔka la ti fum nyɛ la ze'ele bo' la tinkãtɛ sɛka en sɔi naduma woo en boi timpaberɛ wa zuo biha la.”